1 Chronicles 20

Luganda (BIBU1) (BIBULIYA ENTUKUVU)

← Chapter 19 Jump to: Chapter 21 →

1Ku ntandikwa y'omwaka, obudde bakabaka mwe batera okugendera mu ntalo, Yowabu yatwala eggye, n'afufuggaza ensi y'Abammoni, n'ajja n'azinda Rabba. Naye Dawudi yasigala mu Yeruzaalemu. Yowabu ekibuga n'akikuba n'akifuula matongo.

2Dawudi n'aggya ku mutwe gwa kabaka waabwe engule. Yazuula nti engule yali ezitowa talenta eya zaabu nnamba, ng'etoneddwako amayinja ag'omuwendo. Ne bagissa ku mutwe gwa Dawudi. Era Dawudi n'anyagulula ekibuga, n'atwala omunyago munene nnyo.

3Abantu abaalimu yabaggyamu n'abasalira ogw'okukola n'emisumeeni, n'ensuuluulu ez'ebyuma n'embazzi. Bw'atyo bwe yakola ne ku bibuga byonna eby'Abammoni. Olwo Dawudi n'akomawo mu Yeruzaalemu n'eggye lyonna.

4Oluvannyuma lwa bino, waabalukawo olutalo n'Abafilisitiini e Gezeri. Ku olwo Sibbekayi Omukusa n'atta Sippayi ow'omu lulyo lw'Abarefa. Abafilisitiini ne bafufuggazibwa.

5Era waaliwo olutalo n'Abafilisitiini, Elukanani mutabani wa Yayiri n'atta Lakumi muganda wa Goliyati Omugitti, eyalina olunyago lw'effumu lye olwenkana omuti okulangirwa engoye.

6Era waaliwo olutalo mu Gati, omwali omusajja omuwagguufu, eyalina engalo mukaaga ku buli kibatu n'obugere mukaaga ku buli kigere; byonna wamu amakumi abiri mu bina. N'oyo naye yali asibuka mu Rafa.

7Bwe yajoogereza Yisirayeli, naye Yonatani mutabani wa Simewa, muganda wa Dawudi, n'amutta.

8Abasajja abo baali basibuka mu Rafa mu Gati. Baafiira mu mikono gya Dawudi n'egy'abasajja be.

← Chapter 19 Jump to: Chapter 21 →