1 Chronicles 15

Luganda (BIBU1) (BIBULIYA ENTUKUVU)

← Chapter 14 Jump to: Chapter 16 →

1Dawudi bwe yamala okwezimbira amayumba mu Kibuga kya Dawudi, Ssanduuku ya Katonda n'agitegekera ekifo, n'agisimbira weema.

2Awo Dawudi n'agamba nti: “Ssanduuku y'Omukama si ya kwetikkibwanga buli asanga, wabula Baleevi bokka Omukama be yalonda okugitwala n'okumuweereza emirembe gyonna.”

3Dawudi n'akuŋŋaanya Yisirayeli yenna mu Yeruzaalemu, okuleeta Ssanduuku y'Omukama mu kifo kyayo kye yali agitegekedde.

4Yayitirako bazzukulu ba Aroni n'Abaleevi bano:

5mu bazzukulu ba Kewati: Wuriyeli, omukulu waabwe, ne baganda be kikumi mu abiri;

6mu bazzukulu ba Merari: Asaaya, omukulu waabwe, ne baganda be kikumi mu asatu;

7mu bazzukulu ba Gerusoni: Yoweli, omukulu waabwe, ne baganda be kikumi mu asatu;

8mu bazzukulu ba Elizafani: Semaaya, omukulu waabwe, ne baganda be ebikumi bibiri;

9mu bazzukulu ba Keburoni: Eliyeli, omukulu waabwe, ne baganda be kinaana;

10ne mu bazzukulu ba Wuzziyeli: Amminadabu, omukulu waabwe, ne baganda be kikumi mu kkumi na babiri.

11Awo Dawudi n'ayita Zadoki ne Abiyatari bakabona, n'Abaleevi: Wuriyeli, Asaaya, Yoweli, Semaaya, Eliyeli ne Amminadabu,

12n'abagamba nti: “Mmwe mukulira ennyumba z'Abaleevi eza bajjajjaabwe; mwetukuze wamu ne baganda bammwe, Ssanduuku y'Omukama Katonda wa Yisirayeli mugireete mu kifo kye ngitegekedde.

13Kubanga mmwe Abaleevi temwagiggyayo mu kusooka, Omukama Katonda wa Yisirayeli kyeyava atusitukiramu, kubanga tetwamwebuuzaako ku ngeri gye twali tuteekwa okukikolamu.”

14Awo bakabona n'Abaleevi ne beetukuza baleete Ssanduuku y'Omukama Katonda wa Yisirayeli.

15Bazzukulu ba Leevi ne baleeta Ssanduuku ya Katonda ng'emisituliro bagitadde ku bibegabega nga Musa bwe yali alagidde ng'aggya ku kigambo ky'Omukama.

16Dawudi yasaba abakulu b'Abaleevi mu baganda baabwe balondemu abayimbi bayimbire ku bivuga: entongooli, ennanga n'ensaazo, nga bakooloobya n'essanyu.

17Abaleevi ne balonda: Emani mutabani wa Yoweli; ne mu baganda be: Asafu mutabani wa Berekiya; okuva mu baganda baabwe ab'omu bazzukulu b'Abamerari: Etani mutabani wa Kusaaya.

18Baabalonderako ne baganda baabwe ababaddirira: Zakariya mutabani wa Yaaziyeli, Semiramoti, Yekiyeli, Wunni, Eliyabu, Benaaya, Maaseeya, Mattitiya, Elifeleku, Mikuneeya, era ne Obedi-Edomu ne Yeyeli abaggazi.

19Abayimbi Emani, Asafu ne Etani be baali ab'okukuba ensaazo ez'ekikomo;

20Zakariya, Aziyeli, Semiramoti, Yekiyeli, Wunni, Eliyabu, Maaseeya, Benaaya ba ntongooli endeegere ku Alamoti.

21Mattitiya, Elifeleku, Mikuneeya, Obedi-Edomu, Yeyeli, Azaziya ba nnanga endeegere ku seminiti.

22Kenaniya omukulu w'Abaleevi abayimbi ye yalabiriranga eby'okuyimba kubanga yali muyimbi mukugu.

23Berekiya ne Elukana baali baggazi ba Ssanduuku.

24Bakabona Sebaniya, Yosafati, Netaneli, Amasayi, Zakariya Benaaya ne Eliyezeri baali bakufuuwa makondeere mu maaso g'Essanduuku ya Katonda; Obedi-Edomu ne Yekiya bo baali baggazi ba Ssanduuku.

25Awo Dawudi, abakadde mu Yisirayeli n'abagabe b'ebibinja ne bagenda okuggyayo Ssanduuku y'Endagaano y'Omukama, okugiggya mu nnyumba ya Obedi-Edomu mu ssanyu.

26Kubanga Katonda yayamba Abaleevi abaali batwala Ssanduuku y'Endagaano y'Omukama, ne batambira ente ennume musanvu n'endiga ennume musanvu.

27Dawudi yali ayambadde ekkanzu ey'obufumbo, n'Abaleevi bonna abaali batwala Ssanduuku, n'abayimbi ne Kenaniya eyali akulira eby'okuyimba, bonna nga bambadde nga ye. Dawudi yali ayambadde efodi ey'olugoye.

28Yisirayeli yenna n'aleeta Ssanduuku y'Endagaano y'Omukama n'obuluulu n'amaloboozi ag'eŋŋombe, amakondeere, ensaazo, n'okuvuga kw'entongooli n'ennanga.

29Ssanduuku y'Endagaano y'Omukama bwe yali eyingira mu Kibuga kya Dawudi, Mikali, muwala wa Sawulo, n'atunula wansi ng'ayima mu ddirisa n'alaba kabaka Dawudi nga yeebuukiza, azina, n'amunyooma mu mutima gwe.

← Chapter 14 Jump to: Chapter 16 →