2 Chronicles 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Kuramu yakola omwaliiro gw'ekikomo gwa mikono amakumi abiri obuwanvu, emikono amakumi abiri obugazi, n'emikono kkumi obusimba.

2Yaweesa Ennyanja mu kyuma ekisaanuuse, nga neekulungirivu; okuva ku mugo okutuuka ku mugo nga ya mikono kkumi obugazi. Obugulumivu nga ya mikono etaano; okugyetoolooza olukoba olupima nga luba lwa mikono asatu obuwanvu.

3Ate wansi w'omugo Ennyanja yali esibiddwako ebifaananyi by'ente ennume kkumi buli mukono okwetooloola wonna. Ente zaali ziweeseddwa mu nnyiriri bbiri, nga zonna n'Ennyanja biri ekintu kimu.

4Ennyanja yali etuuziddwa ku nte ennume kkumi na bbiri, essatu nga zitunudde mambuka, essatu buvanjuba, essatu maserengeta, n'essatu bugwanjuba. Ennyanja okwo kwe yali etudde, ng'ebyensuti byazo bitunuulidde entobo y'Ennyanja.

5Omubiri gw'Ennyanja nga gwenkana obugazi bw'ekibatu; omugo gwayo nga guli ng'omugo gw'ekikopo, era nga guli ng'omugo gw'ekimuli ky'eddanga ekyanyizza. Yali egendamu bati z'amazzi enkumi ssatu.

6Yakolayo ebinaabirwamu kkumi eby'okwolezaamu; ebitaano n'abissa ku ddyo n'ebitaano ku kkono, bye byali eby'okwolezangamu byonna ebyabanga eby'okuweereza mu kitambiro ekyokye; bakabona bo baali ba kunaabiranga mu Nnyanja.

7Yakolayo n'ebikondo by'ettawaaza kkumi ng'etteeka bwe lyali ligamba ku byo, n'abissa mu Kiggwa: bitaano ku ddyo, bitaano ku kkono.

8Yakola emmeeza kkumi n'azissa mu Kiggwa, ettaano ku ddyo n'ettaano endala ku kkono. Era yakola ne ebibya eby'okumansira kikumi ebya zaabu.

9Yakola n'oluggya lwa bakabona, n'oluggya olunene n'emiryango gy'oluggya, emiryango n'agibikka n'ekikomo.

10Ennyanja yagissa ku ludda olw'emaserengeta, ebuvanjuba, wammangako.

11Kuramu yakola ensuwa, ebitiiyo, n'ebibya ebimansira. Kuramu bw'atyo n'amaliriza omulimu gwonna ogwa kabaka Solomoni mu Kiggwa ky'Omukama:

12empagi bbiri, enkata ezaakula ng'ebibya, ku ntwe z'empagi ebbiri; obutimba obubiri obutimbiddwa ku nkata ebbiri ezaakula ng'ebibya ezaali ku ntwe z'empagi;

13ennyiriri bbiri ez'amakomamawanga ku buli katimba akatimbiddwa ku nkata ezaakula ng'ebibya ezaali ku ntwe z'empagi;

14obutandaalo n'ebinaabirwamu byakwo;

15Ennyanja n'ente ennume ekkumi n'ebbiri wansi waayo;

16ensuwa, ebitiiyo, n'entoozo. Ebintu byonna Kuramu-Abi bye yakolera kabaka Solomoni olw'Ekiggwa ky'Omukama yabikola mu kikomo ekizigule.

17Kabaka yabikozeseza mu butiba obw'ebbumba mu lusenyi lwa Yorudani, wakati wa Sukkoti ne Zareda.

18Solomoni ebintu byonna bye yakozesa byali bingi nnyo; obuzito bw'ekikomo tebwamanyika.

19Solomoni yakola byonna eby'okukozesa mu Kiggwa ky'Omukama: Omwaliiro ogwa zaabu; emmeeza eya zaabu okw'okuteekebwa Emigaati egy'Okwolesebwa;

20ebikondo by'ettawaaza mu zaabu atatabuddwamu kirala, n'ettawaaza zaabyo, zaakire mu maaso g'Awatukuvu Ennyo ng'etteeka bwe ligamba;

21ebimuli, ettawaaza ne magalo byonna nga bikole mu zaabu omugumu;

22makansi, ebibya eby'okumansira, ebijiiko n'ebyoterezo, nga bya zaabu atatabuddwamu kirala; enzigi ensiige zaabu ez'Ekiggwa: enzigi ez'omunda ez'Awatukuvu Ennyo n'enzigi ez'Eddiiro nga nazo za zaabu.

← Chapter 3 Jump to: Chapter 5 →