Proverbs 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to: Chapter 11 →

1Chi ve lehˬSawˉla‸monˍ ve tawˇ naˉ ve tawˇ teˇ hpaˍ hpeh‸ ve yoˬ. Cuˇ yiˍ cawˬ ve yaˇ paˍ lehˬ awˬ pa hta‸ ha lehˬpiˇ leh, haiˬ ve yaˇ paˍ lehˬ awˬ e hta‸ dawˇ haˍ piˇ ve yoˬ.

2Maˇ hteˇ maˇ cawˇ ve hkʼaw ca gʼa taˍ ve hpu shi mawˇ jeˬ lehˬ, nawˬ hta‸ te‸ chiˉ awˬ bon te laˇ maˇ gʼa. Ya‸ hkʼaˇ, hteˇ ve cawˇ ve hta‸ te ve teˇ ceuˬ lehˬ, nawˬ ve a sha‸ hta‸ ponˬ laˇ gʼa ve yoˬ.

3Gʼuiˬsha lehˬ da‸ ve chaw teˇ hpaˍ hta‸ meu‸ jehˇ kaˆ jehˇ piˇ lawˬ tuˬ ve maˇ heˆ. Ya‸ hkʼaˇ, Yawˇ lehˬ haiˬ ve chaw hui hta‸ yawˇ hui loˍ ve mawˇ piˇ tuˬ ve maˇ heˆ.

4Nawˬ bawˬ ve kʼo gʼa haˍ gʼawˇ tuˬ yoˬ. Kanˉ te ve chaw lehˬ paw sha la tuˬ yoˬ.

5Dawˇ nyi puiˉ ve chaw lehˬ, awˬ shiˍ awˬ nu meh la ve teˇ yanˇ gʼeu‸ yuˬ puiˉ ve yoˬ. Caˬ gʼeu‸ yanˇ htaˇ zuh‸ chehˇ ve chaw lehˬ chaw luˬ paˍ hpeh‸ ve yoˬ.

6Da‸ ve chaw lehˬ awˬ bon gʼa tuˬ yoˬ. Ya‸ hkʼaˇ haiˬ ve chaw teˇ gʼaˇ yaw ve tawˇ lehˬ, maˇ cawˇ ve awˬ ceuˬ hta‸ faˉ taˍ puiˉ ve yoˬ.

7Da‸ ve chaw hta‸ shu hkʼaˬ htaˆ ka‸ dawˇ nawˇ chehˇ tuˬ yoˬ. Ya‸ hkʼaˇ, haiˬ ve chaw hta‸ shu leunˇ kʼai tuˬ yoˬ.

8Dawˇ nyi puiˉ ve chaw lehˬ, shu piˇ ve da‸ ve dawˇ hkʼaˇ hta‸ ha‸ yuˬ puiˉ ve yoˬ. Tcuhˉ kuiˬ maˇ cawˬ ve tawˇ hta‸ yaw ve chaw lehˬ luˬ kʼai sheˆ kʼai tuˬ yoˬ.

9Hteˇ ve cawˇ ve chaw lehˬ gawˬ lehˍ gʼa chehˇ ve yoˬ. Ya‸ hkʼaˇ, maˇ hteˇ maˇ cawˇ ve chaw lehˬ shu hpeh yuˬ ve hta‸ gʼa hkanˍ tuˬ yoˬ.

10Hteˇ ve cawˇ ve awˬ hkʼaw lo shaˉ hkiˆ maˇ hkanˍ ve chaw lehˬ gʼa dawˇ haˍ ve yoˬ. Ya‸ hkʼaˇ, hteˇ ve cawˇ ve awˬ hkʼaw lo tawˇ yaw ve chaw lehˬ cawˇ da‸ hawˍ da‸ tuˬ te shehˍ hpaˇ hpeh‸ ve yoˬ.

11Da‸ ve chaw teˇ gʼaˇ ve tawˇ lehˬ, a sha‸ te‸ piˇ lawˬ ve iˉ kaˆ gʼuiˬ tuˇ hkʼe hpeh‸ ve yoˬ. Ya‸ hkʼaˇ, haiˬ ve chaw teˇ gʼaˇ ve tawˇ lehˬ maˇ cawˇ ve awˬ ceuˬ hta‸ faˉ taˍ puiˉ ve yoˬ.

12Canˇ ve teˇ ceuˬ lehˬ, dawˇ haˍ tuˬ awˬ ceuˬ hta‸ te tawˆ la puiˉ ve yoˬ. Ya‸ hkʼaˇ, ha‸ pehnˇ ve teˇ ceuˬ lehˬ venˇbaˆ hpehˇ piˇ puiˉ ve yoˬ.

13Dawˇ shiˍ puiˉ ve chaw lehˬ, na sha ve tawˇ yaw puiˉ ve yoˬ. Ya‸ hkʼaˇ, cuˇ yiˍ maˇ cawˬ ve chaw lehˬ, ciˍ yanˍ ve hta‸ gʼa hkanˍ ve yoˬ.

14Cuˇ yiˍ cawˬ ve chaw lehˬ, hkʼa gʼa ve cuˇ yiˍ hkʼa peu-eˬ hta‸ ha‸yuˬ taˍ ve yoˬ. Ya‸ hkʼaˇ, chaw luˬ paˍ tawˇ yaw ve teˇ yanˇ, dawˇ haˍ tuˬ ve awˬ ceuˬ awˬ paˇ neˇ lo gaˬ la ve yoˬ.

15Hpu shi mawˇ jeˬ lehˬ, paw sha paˍ hta‸ ha‸ shaˉ piˇ leh, haˍ gʼawˇ ve teˇ ceuˬ lehˬ haˍ ve gʼawˇ ve chaw hta‸ te luˬ te sheˆ piˇ ve yoˬ.

16Da‸ ve hta‸ te ve pa taw gʼa ve awˬ bon lehˬ, a sha‸ te‸ ve teˇ ceuˬ yoˬ. Ya‸ hkʼaˇ, venˇbaˆ teˇ ceuˬ lehˬ venˇbaˆ hta‸ kʼaw‸ maˇ la piˇ ve yoˬ.

17Shu maˍ piˇ ve hta‸ na yuˬ ve chaw lehˬ, a sha‸ gʼa te‸ chehˇ tuˬ yoˬ. Ya‸ hkʼaˇ, a shu yawˇ ve venˇbaˆ hta‸ faˉ taˍ ve chaw lehˬ gʼa dawˇ haˍ tuˬ yoˬ.

18Shu hta‸ canˇ ve nyi ma hta‸ faˉ taˍ ve chaw lehˬ, chaw heˍ paˍ hpeh‸ ve yoˬ. Shu ve awˬ lawn ca kʼoˆ toˇ ve chaw htawˇ, chaw luˬ paˍ hpeh‸ ve yoˬ.

19Nawˬ tawˇ shaˬ yaw maˇ ve kʼo, shaˬ venˇbaˆ cawˬ maˇ la ve yoˬ. Nawˬ cuˇ yiˍ cawˬ ve kʼo ta‸ iˉ gawˬ lehˍ chehˇ taˍ tuˬ yoˬ.

20Da‸ ve chaw teˇ gʼaˇ yaw ve tawˇ lehˬ, da‸ ve hpu hkʼe hpeh‸ ve yoˬ. Haiˬ ve chaw teˇ gʼaˇ ve tawˇ lehˬ te‸ chiˉ awˬ bon maˇ cawˬ.

21Da‸ ve chaw teˇ gʼaˇ yaw ve tawˇ lehˬ, shu awˬ pon awˬ bon cawˬ ve yoˬ. Ya‸ hkʼaˇ, cuˇ yiˍ maˇ cawˬ ve chaw lehˬ a shu yawˇ awˬ to hta‸ yawˇ tiˇ pehˍ chehˇ ve yoˬ.

22Nawˬ paw sha la ve lehˬ, Gʼuiˬsha ve awˬ bon hta‸ pa taw yoˬ. Kanˉ gʼaˇ hte‸ te ve pa taw paw sha la ve maˇ heˆ.

23Cha‸ chiˆ ve kanˉ hta‸ te ve chaw lehˬ, chaw luˬ paˍ hpeh‸ ve yoˬ. Dawˇ nyi puiˉ ve chaw lehˬ cuˇ yiˍ awˬ hkʼaw lo ceh tiˉ ha lehˬ chehˇ puiˉ ve yoˬ.

24Hteˇ ve cawˇ ve chaw lehˬ, yawˇ heuˆ gaˇ ve awˬ ceuˬ hta‸ gʼa ve yoˬ. Ya‸ hkʼaˇ, haiˬ ve chaw lehˬ yawˇ dawˇ kawˆ chehˇ ve awˬ ceuˬ hta‸ gʼa tuˬ yoˬ.

25Mvuhˇ haw mvuhˇ yeˬ lonˉ laˬ leh, haiˬve chaw hta‸ meuˆ chiˇ veu ve yoˬ. Ya‸ hkʼaˇ hteˇ ve cawˇ ve chaw lehˬ, gawˬ lehˍ gʼa chehˇ ve yoˬ.

26Bawˬ ve chaw hta‸ nawˬ kanˉ taˇ tcuh. Yawˇ lehˬ nawˬ awˬ pon ciˬ hkehˇ tuˬ leh, nawˬ ve mehˆ shiˍ awˬ pon mvuhˇ hkʼawˇ mvuhˍ ve hkʼe hpeh‸ tuˬ yoˬ.

27Gʼuiˬsha hta‸ yawˆ yan-o. Oˇ hkʼe te ve kʼo, nawˬ co zuhˬ ha zuhˬ gʼa chehˇ tuˬ yoˬ. Haiˬ ve chaw lehˬ suh yanˇ maˇ gaˬ sheˍ ka‸ suh-e ve yoˬ.

28Da‸ ve chaw hui ve dawˇ law kuiˬ leh, ha lehˬ tuˬ awˬ ceuˬ hpeh‸ ve yoˬ. Ya‸ hkʼaˇ, haiˬve chaw hui ve dawˇ law kuiˬ te‸ chiˉ maˇ cawˬ.

29Gʼuiˬsha lehˬ hteˇ ve cawˇ ve chaw hta‸ ha‸ shaˉ piˇ ve yoˬ. Ya‸ hkʼaˇ, te ya‸ ve chaw hta‸ Yawˇ te luˬ te sheˆ piˇ ve yoˬ.

30Hteˇ ve cawˇ ve chaw lehˬ, hkʼaˬ htaˆ ka‸ gawˬ lehˍ gʼa chehˇ ve yoˬ. Ya‸ hkʼaˇ, haiˬ ve chaw lehˬ mvuhˇmiˬ hkʼaw gʼa te‸ chehˇ tuˬ ve maˇ heˆ.

31Hteˇ ve cawˇ ve chaw lehˬ, cuˇ yiˍ cawˬ ve tawˇ hta‸ yaw ve yoˬ. Ya‸ hkʼaˇ, cha‸ chiˆ ve tawˇ hta‸ yaw ve chaw lehˬ, tawˍ taˍ ve hta‸ gʼa hkanˍ tuˬ yoˬ.

32Hteˇ ve cawˇ ve chaw lehˬ, na sha ve tawˇ yaw puiˉ ve yoˬ. Ya‸ hkʼaˇ, haiˬ ve chaw lehˬ shu hta‸ naˬ tuˬ ve tawˇ ceh tiˉ yaw ve yoˬ.

← Chapter 9 Jump to: Chapter 11 →