Proverbs 27

Lahu Bible Edited © Thailand Bible Society and Bible Society of Myanmar, 2010, 2020.

← Chapter 26 Jump to: Chapter 28 →

1Shawˉ pawˍ awˬ pon nyi ma taˇ uiˍ. Ya‸ nyi leh shawˉ pawˍ awˬ kaˍ lo hkʼaˬ hkʼe hpeh‸ la tuˬ ve hta‸ nawˬ maˇ shiˍ.

2Shu nawˬ hta‸ chiˇ mvuh laˇ piˇ-oˆ. Nawˬ awˬ to hta‸ nawˬ taˇ chiˇ mvuh.

3Haˉ pui shiˍ leh shehˉ shiˍ ve naˬ naˆ lehˬ, cuˇ yiˍ maˇ cawˬ ve chaw hui te tawˆ la ve dawˇ haˍ tuˬ hkʼe taw naˬ naˆ maˇ hehnˇ.

4Nyi ma zuhˆ ve teˇ ceuˬ lehˬ, haiˬ leh te luˬ te sheˆ puiˉ ve yoˬ. Ya‸ hkʼaˇ, oˇ ve htawˇ shu hta‸ hkawehˉ ve nyi ma hkʼe taw kawˆ tuˬ maˇ cawˬ sheˍ.

5Te ya‸ ve chaw hta‸ maˇ maˍ piˇ leh ta‸ iˉ gawˬ lehˍ chehˇ taˍ ve a‸ kehˉ, deˇ maˍ piˇ ve lehˬ da‸ leuˉ ve yoˬ.

6Awˬ chawˇ teˇ gʼaˇ dawˆ hpehˇ laˇ ve lehˬ, canˇ paˍ teˇ gʼaˇ boˆ nu laˇ ve a‸ kehˉ da‸ leuˉ ve yoˬ.

7Nawˬ awˍ caˇ bvuhˆ taˍ ve kʼo, pehˇ gʼuiˬ hta‸ ka‸ jaw kʼai puiˉ ve yoˬ. Ya‸ hkʼaˇ, nawˬ meu‸ chehˇ ve kʼo, hkʼaˇ ve caˇ tuˬ htawˇ mehˬ ve caˇ tuˬ hpeh‸ la ve yoˬ.

8Yehˬ hkʼaw tawˆ kʼai taˍ ve chaw lehˬ, awˬ hpui teh hta‸ hpaˆ da‸ kʼai ve ngaˆ hkʼe hpeh‸ ve yoˬ.

9Awˬ pe‸ hawnˉ ve naˍmanˇ hawnˉ lehˬ, nawˬ hta‸ nyi ma sha la piˇ ve yoˬ. Ya‸ hkʼaˇ, dawˇ haˍ tuˬ lehˬ nawˬ ve nyi ma hta‸ pe‸ hkoˇ piˇ lawˬ ve yoˬ.

10Nawˬ ve awˬ chawˇ leh nawˬ pa ve awˬ chawˇ teˇ hpaˍ hta‸ taˇ leunˇ kʼai piˇ. Nawˬ dawˇ haˍ kuiˬ lo gaˬ htaˇ, nawˬ viˉ nawˬ nyi hta‸ taˇ ca gʼaˇ va. Nawˬ paˇ nawˬ kui lo chehˇ ve awˬ chawˇ teˇ hpaˍ lehˬ, vuiˇ kuiˬ lo chehˇ taˍ ve nawˬ viˉ nawˬ nyi a‸ kehˉ nawˬ hta‸ ga laˇ gʼa ve yoˬ.

11Yaˇ paˍ-oˬ, cuˇ yiˍ cawˬ ve chaw hpeh la piˇ-oˆ. Oˇ hkʼe hpeh‸ ve kʼo ngaˬ ha lehˬ tuˬ yoˬ. Ngaˬ hta‸ venˇbaˆ ca ve chaw hta‸ ngaˬ kʼaw‸ yaw hkʼaw‸ piˇ tuˬ tawˇ cawˬ tuˬ yoˬ.

12Dawˇ nyi puiˉ ve chaw lehˬ kawˆ tuˬ dawˇ haˍ tuˬ gaˬ la chehˇ ve hta‸ shiˍ leh, jaw kʼai puiˉ ve yoˬ. Maˇ dawˇ nyi puiˉ ve chaw lehˬ, awˬ gʼuˇ suhˍ caˉ kʼai leh dawˇ haˍ tuˬ hta‸ gʼa hpuˇ ve yoˬ.

13Shu ve jeˬ hta‸ ga shaiˍ piˇ tuˬ ka ti‸ ca te ve maˇ dawˇ nyi puiˉ ve chaw lehˬ, yawˇ ve mawˇ jeˬ shonˇ kʼai tuˬ te chehˇ ve yoˬ.

14Mvuhˇ shawˉ teˇ na‸ tu leh a shu yawˇ ve awˬ chawˇ hta‸ awˬ hkawˇ bvuhˬ chaweh tawˇ kuˬ yaw piˇ ve chaw lehˬ, yawˇ hta‸ hkeu piˇ ve hkʼe hpeh‸ ve yoˬ.

15Tawˇ maˇ ve yaˇ miˇ lehˬ, teˇ jaˆ peuˬ teˇ jaˆ ce la chehˇ ve mvuhˇ yeˬ gʼuiˬ hkʼe hpeh‸ ve yoˬ.

16Nawˬ yawˇ hta‸ hkʼaˬ hkʼe te leh ta‸ iˉ chehˇ tcuh piˇ gʼa tuˬ ve le. Nawˬ mvuhˇ haw hta‸ jehˇ tcuh taˍ gʼa aw laˇ. Naˍmanˇ hta‸ la‸ sheh hkʼaw yuˬ tiˍ taˍ gʼa aw laˇ.

17Sho hta‸ yehˇ leh sho hta‸ tcuhˆ la tuˬ shiˍ ve hkʼe, chaw yaˇ lehˬ teˇ gʼaˇ geh teˇ gʼaˇ henˇ yuˬ chehˇ ve yoˬ.

18Maˉ nawˆ cehˬ hta‸ ha‸ shaˉ ve kʼo, maˉ nawˆ shiˍ gʼa caˇ ve yoˬ. Awˬ shehˍ hpaˇ ve mawˇ hta‸ ha‸ shaˉ puiˉ ve awˬ ceˬ lehˬ taˍ uiˍ taˍ mvuh ve hta‸ gʼa hkanˍ tuˬ yoˬ.

19Iˉ kaˆ hkʼaw nawˬ nyi leh gʼa mawˬ ve awˬ han lehˬ, nawˬ ve awˬ han hpeh‸ ve yoˬ. Nawˬ ve nyi ma hkʼaw gʼa mawˬ ve awˬ ceuˬ htawˇ, nawˬ ve awˬ to hpeh‸ ve yoˬ.

20Chaw yaˇ ve sheˉ lai puiˉ ve nyi ma lehˬ, suh mvuhˇmiˬ hkʼa shuˍ hpeh‸ ve yoˬ. Oˇ kaˬ lo chaw hkʼaˬ nyiˇ gʼaˇ awˬ pon ka‸ chehˇ kuiˬ cawˬ ve yoˬ.

21Aˬ miˍ lehˬ hpu leh shi hta‸ lawˇ nyi ve yoˬ. Chaw teˇ gʼaˇ ve awˬ liˇawˬ hkʼaˇ hta‸ htawˇ lawˇ nyi hpeh‸ ve yoˬ.

22Chaw luˬpaˍ teˇ gʼaˇ hta‸ suh law‸ law‸ dawˆ piˇ ve htawˇ, yawˇ awˬ hkʼaw lo cawˬ ve haiˬ ve nyi ma hta‸ yuˬ tawˆ piˇ maˇ gʼa.

23Nawˬ ve nuˇ leh yawˬ teˇ hpaˍ hta‸ hkʼa deh‸ nyi ha‸ shaˉ-oˆ.

24Awˬ lawn kʼo, hpu shi mawˇ jeˬ lehˬ co co yeˬ chehˇ ve maˇ heˆ. Chaw ceuˬ teˇ hpaˍ htawˇ co co maˇ yeˬ.

25Zuhˇ hta‸ gʼeu‸ yuˬ ve htawˇ, hkʼaw‸ nawˉ teˇ pawˆ kʼaw‸ caˍ tawˆ la ve yoˬ.

26Nawˬ ve yawˬ hta‸ awˬ mvuh nuˆ leh veu‸ kʼaˇ te veu‸ ve yoˬ. Nawˬ ve aˉ che‸ hta‸ hawˇ leh, miˬguiˬ vuiˬ ve yoˬ.

27Cawˬ taˍ sheˍ ve aˉ che‸ teˇ hpaˍ hta‸ cuˉ gʼuiˬ nyiˉ leh, nawˬ ve yehˬ yaˇ kʼa yaˇ leh nawˬ ve awˬ ceˬ teˇ hpaˍ hta‸ taw piˇ ve yoˬ.

← Chapter 26 Jump to: Chapter 28 →