Proverbs 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Yaˇ paˍ teˇ hpaˍ-oˬ, nawˬ hui ve awˬ pa maˍ laˇ ve tawˇ teˇ hpaˍ hta‸ hkʼa deh‸ na yuˬ-o‸. Nawˬ hui oˇ hkʼe te ve kʼo, shiˍ puiˉ ve cuˇ yiˍ cawˬ la tuˬ yoˬ.

2Ngaˬ nawˬ hui hta‸ maˍ laˇ chehˇ ve awˬ ceuˬ lehˬ, da‸ ve awˬ ceuˬ ceh tiˉ hpeh‸ ve yoˬ. Chi hta‸ pa taw hkʼaˬ htaˆ ka‸ dawˇ nawˇ taˍ-o‸.

3Ngaˬ yaˇ paˍ ehˉ hpeh‸ chehˇ sheˍ htaˇ, ngaˬ pa ngaˬ hta‸ chi hkʼe kʼoˆ maˍ laˇ ve yoˬ.

4Ngaˬ kʼoˆ laˇ chehˇ ve tawˇ hta‸ tawnˇ taˍ-o‸. Teˇ pawˆ ka‸ taˇ leunˇ kʼai piˇ. Ngaˬ kʼoˆ ve hkʼe te-o. Oˇ hkʼe te ve kʼo, nawˬ gʼa te‸ chehˇ tuˬ yoˬ.

5Cuˇ yiˍ hta‸ ca-o. Ngaˬ kʼoˆ laˇ ve tawˇ hta‸ taˇ leunˇ piˇ.

6Cuˇ yiˍ hta‸ taˇ baˬ taˉ. Yawˇ nawˬ hta‸ ha‸ shaˉ taˍ laˇ tuˬ yoˬ. Yawˇ hta‸ ha‸-o‸. Yawˇ nawˬ hta‸ gawˬ lehˍ chehˇ tcuh laˇ tuˬ yoˬ.

7Cuˇ yiˍ hta‸ ca ve lehˬ uiˍ jaˇ ve kanˉ teˇ maˬ hpeh‸ ve yoˬ. Nawˬ hkʼa ca gaˇ ve awˬ ceuˬ teˇ hpaˍ awˬ hkʼaw lo, shiˍ puiˉ ve cuˇ yiˍ hta‸ leuˉ leh ca-o.

8Cuˇ yiˍ hta‸ ha‸-o‸. Yawˇ nawˬ hta‸ uiˍ la mvuh la piˇ gʼa ve yoˬ. Yawˇ hta‸ boˆ nu-o. Yawˇ nawˬ hta‸ awˬ me‸ awˬ hponˇ piˇ laˇ tuˬ yoˬ.

9Yawˇ lehˬ awˬ me‸ awˬ hponˇ cawˬ ve nawˬ ve shi uˉ tcuhˍ hpeh‸ ve yoˬ, teh‸ ngaˬ hta‸ kʼoˆ laˇ ve yoˬ.

10Yaˇ paˍ-oˬ, ngaˬ ve tawˇ hta‸ na sheˍ. Oˇ hkʼe te ve kʼo, nawˬ co zuhˬ ha zuhˬ cawˬ tuˬ yoˬ.

11Ngaˬ nawˬ hta‸ cuˇ yiˍ leh da‸ ve ya‸ kʼaw beˆ maˍ laˇ taˍ peuˬ.

12Nawˬ lehˬ cuˇ yiˍ cawˬ ve awˬ hkʼaw lo ya‸ kʼaw toˇ kʼai chehˇ ve kʼo, nawˬ hta‸ te‸ chiˉ tawˍ taˍ laˇ gʼa tuˬ ve maˇ heˆ. Nawˬ gʼuiˇ ve htawˇ hkui htiˇ poˬ paiˍ tuˬ ve maˇ heˆ.

13Nawˬ hkʼa henˇ gʼa taˍ peuˬ ve teˇ hpaˍ hta‸ hkʼaˬ htaˆ ka‸ dawˇ nawˇ taˍ-o‸. Nawˬ ve cuˇ yiˍ lehˬ nawˬ ve a sha‸ hpeh‸ ve yoˬ.

14Haiˬ ve chaw hui kʼai ve chehˇ kuiˬ lo taˇ kʼai. Yawˇ hui te ve hkʼe taˇ gʼa‸ te.

15Haiˬ ve awˬ ceuˬ hta‸ jaw kʼai leh, nawˬ ve ya‸ kʼaw hta‸ hteˇ lehˍ kʼai-o.

16Haiˬ ve chaw lehˬ cha‸ chiˆ ve kanˉ teˇ ceuˬ ceuˬ maˇ gʼa te taˉ ve ceh ceh, zuh‸ muiˉ kʼa maˇ gʼa ve yoˬ.

17Haiˬ ve leh cha‸ chiˆ ve kanˉ lehˬ, yawˇ hui ve caˇ tuˬ dawˬ tuˬ hkʼe hpeh‸ ve yoˬ.

18Hteˇ ve cawˇ ve chaw hui toˇ kʼai ve ya‸ kʼaw lehˬ, mvuhˇ nyi tawˆ la chehˇ ve hkʼe hpeh‸ leh shaˬ te shaˬ awˬ gʼeuˆ ba la chehˇ ve yoˬ.

19Ya‸ hkʼaˇ, haiˬ ve chaw hui ve ya‸ kʼaw lehˬ, mvuhˇ hpeu‸ ve awˬ yanˇ hkʼa shuˍ naˆ ho‸ jaˇ ve yoˬ. Yawˇ hui paiˍ ve htawˇ, aˬ hto‸ ma hta‸ hkui htiˇ poˬ paiˍ ve hta‸ yawˇ hui maˇ shiˍ.

20Yaˇ paˍ-oˬ, ngaˬ kʼoˆ maˍ laˇ chehˇ ve tawˇ teˇ hpaˍ hta‸ hkʼa deh‸ na yuˬ-o‸.

21Tawˇ oˇ ve teˇ hpaˍ nawˬ geh taˇ mehˉ kʼai piˇ. Nawˬ ve nyi ma hkʼaw hkʼaˬ htaˆ ka‸ dawˇ nawˇ taˍ leh, tawnˇ taˍ-o‸.

22Oˇ ve teˇ hpaˍ hta‸ shiˍ leh na yuˬ chehˇ ve chaw lehˬ, a sha‸ te‸ ve leh chehˇ sha cawˬ sha ve hta‸ gʼa tuˬ yoˬ.

23Nawˬ hkʼaˬ hkʼe dawˇ ve hta‸ shaˍ ti‸ taˍ-o‸. Nawˬ ve a sha‸ te‸ hkʼaˇ lehˬ, nawˬ ve dawˇ hkʼaˇ hta‸ cawˬ ve yoˬ.

24Maˇ hteˇ maˇ cawˇ ve tawˇ hta‸ taˇ yaw. Heˍ ve tawˇ leh na maˇ sha ve tawˇ hta‸ taˇ yaw.

25Hteˇ ve cawˇ ve awˬ hkʼaw lo awˬ gʼuˇ suhˍ hteˇ lehˍ nyi peu-o. Ya‸ taw ve awˬ hkʼaw lo nawˬ ve mehˆ hpfuhˇ hta‸ taˇ faˉ taˍ.

26Nawˬ te tuˬ ve kanˉ hta‸ hkʼa deh‸ gu taˍ-o‸. Oˇ hkʼe te ve kʼo, nawˬ hkʼa te ve kanˉ teˇ ceuˬ le le da‸ la tuˬ yoˬ.

27Haiˬ ve awˬ ceuˬ hta‸ jaw kʼai leh, gʼuˇ suhˍ hteˇ lehˍ kʼai-o. Nawˬ ve hkui piˍ teˇ piˍ ka‸ maˇ gʼa ya‸ kʼai tuˬ shaˍ ti‸ taˍ-o‸.

← Chapter 3 Jump to: Chapter 5 →