Proverbs 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Cuˇ yiˍ cawˬ ve yaˇ paˍ lehˬ awˬ pa maˍ piˇ ve tawˇ hta‸ na yuˬ puiˉ ve yoˬ. Ya‸ hkʼaˇ, nyi ma uiˍ ve chaw lehˬ yawˇ ve ya‸ kuiˬ hta‸ maˇ nyi mawˬ puiˉ.

2Da‸ ve chaw lehˬ shu awˬ bon kʼaw‸ te hkʼaw‸ piˇ ve hta‸ gʼa tuˬ yoˬ. Ya‸ hkʼaˇ, shu hta‸ heˍ caˇ ve chaw lehˬ gʼa meu‸ jehˇ tuˬ yoˬ.

3Nawˬ tawˇ yaw ve hta‸ shaˍ ti‸ taˍ leh, nawˬ ve a sha‸ hta‸ ha‸ shaˉ-oˆ. Hkʼa deh‸ maˇ dawˇ nyi leh tawˇ yaw ve chaw lehˬ, a shu yawˇ awˬ to hta‸ te luˬ chehˇ ve yoˬ.

4Bawˬ ve chaw lehˬ yawˇ heuˆ gaˇ ve mawˇ hta‸ gʼa tuˬ ve maˇ heˆ. Kanˉ te kaiˬ ve chaw lehˬ yawˇ heuˆ gaˇ ve mawˇ hta‸ gʼa tuˬ yoˬ.

5Hteˇ ve cawˇ ve chaw lehˬ heˍ ve hta‸ canˇ ve yoˬ. Ya‸ hkʼaˇ, haiˬ ve chaw yaw ve tawˇ lehˬ ya‸ taw tuˬ cawˬ ve yoˬ.

6Hteˇ ve cawˇ ve awˬ ceuˬ lehˬ, te‸ chiˉ venˇbaˆ maˇ cawˬ ve chaw hta‸ ha‸ shaˉ piˇ ve yoˬ. Ya‸ hkʼaˇ, haiˬ ve awˬ ceuˬ lehˬ venˇbaˆ yaˇ hta‸ paiˍ piˇ lawˬ ve yoˬ.

7Chaw teˇ hpaˍ hpaˍ paw sha ve chaw hkʼe te ve yoˬ. Ya‸ hkʼaˇ, yawˇ hui te‸ chiˉ maˇ cawˬ. Chaw teˇ hpaˍ hpaˍ haˍ gʼawˇ yaˇ hkʼe te ve yoˬ. Ya‸ hkʼaˇ, yawˇ hui paw sha jaˇ ve yoˬ.

8Paw sha ve chaw lehˬ, yawˇ ve a sha‸ gʼa ponˬ tuˬ hpu shi maˇ maˇ gʼa yehˇ ve yoˬ. Ya‸ hkʼaˇ, haˍ gʼawˇ ve chaw hta‸ chaw teˇ gʼaˇ ka‸ maˇ ca ho piˇ.

9Hteˇ ve cawˇ ve chaw lehˬ, hkʼaˬ htaˆ ka‸ ba chehˇ ve awˬ gʼeuˆ hkʼe hpeh‸ ve yoˬ. Ya‸ hkʼaˇ, haiˬ ve chaw lehˬ suh kʼai chehˇ ve awˬ gʼeuˆ hkʼe hpeh‸ ve yoˬ.

10Nyi ma uiˍ ve chaw lehˬ dawˇ haˍ tuˬ hta‸ te tawˆ la puiˉ ve yoˬ. Shu geh dawˇ hkʼaˇ lawˬ ve lehˬ leuˉ leh da‸ jaˇ ve yoˬ.

11Nawˬ hpu hkʼa sha sha-ehˬ ca gʼa ve kʼo, hkʼa sha sha-ehˬ mehˉ kʼai tuˬ yoˬ. Hkeu‸ ve haˍ ve hkʼaw ca gʼa taˍ ve hpu lehˬ, nawˬ geh leuˉ leh chehˇ yeˬ tuˬ yoˬ.

12Dawˇ law tuˬ mehˉ kʼai ve kʼo, nyi ma htawˇ luˬ kʼai ve yoˬ. Nawˬ dawˇ law taˍ ve hkʼe biˇ la ve teˇ yanˇ, nawˬ ve nyi ma htawˇ ha lehˬ tuˬ biˇ la ve yoˬ.

13Shu da‸ ve dawˇ hkʼaˇ piˇ laˇ ve hta‸ nawˬ maˇ ha‸ yuˬ ve kʼo, nawˬ lehˬ dawˇ haˍ tuˬ hta‸ gʼa hpuˇ tuˬ yoˬ. Shu da‸ ve dawˇ hkʼaˇ piˇ laˇ ve hta‸ na yuˬ leh te-o. Nawˬ gawˬ lehˍ gʼa chehˇ tuˬ yoˬ.

14Cuˇ yiˍ cawˬ ve chaw hui maˍ laˇ ve tawˇ lehˬ a sha‸ te‸ piˇ lawˬ ve iˉ kaˆ gʼuiˬ tuˇ hpeh‸ ve yoˬ. Nawˬ dawˇ haˍ tuˬ hta‸ gʼa hpuˇ ve teˇ yanˇ, tawˇ oˇ ve teˇ hpaˍ nawˬ hta‸ ponˬ laˇ tuˬ yoˬ.

15Cuˇ yiˍ cawˬ ve chaw lehˬ, shu yawˆ yan ve hta‸ gʼa hkanˍ ve yoˬ. Ya‸ hkʼaˇ, shu yonˍ maˇ gʼa ve chaw lehˬ, luˬ ve sheˆ ve ya‸ kʼaw hkʼoˆ lo chehˇ taˍ ve yoˬ.

16Cuˇ yiˍ cawˬ ve chaw lehˬ, kanˉ teˇ ceuˬ ceuˬ maˇ te sheˍ gʼuˇ suhˍ, awˉ lawˉ dawˇ nyi puiˉ ve yoˬ. Ya‸ hkʼaˇ, cuˇ yiˍ maˇ cawˬ ve chaw lehˬ, dawˇ tawˆ ve hkʼe te kʼai ve yoˬ.

17Yonˍ maˇ gʼa ve chaw hta‸ tawˇ tcuh ve lehˬ, sho‸ sha‸ tuˬ hta‸ te tawˆ la puiˉ ve yoˬ. Ya‸ hkʼaˇ, yonˍ gʼa ve chaw lehˬ na sha ve tawˇ hta‸ yuˬ veu laˇ gʼa ve yoˬ.

18Maˇ henˇ yuˬ puiˉ ve chaw lehˬ haˍ gʼawˇ leh awˬ me‸ awˬ hponˇ luˬ kʼai tuˬ yoˬ. Shu maˍ piˇ ve tawˇ hta‸ na yuˬ ve chaw lehˬ shu taˍ uiˍ ve hta‸ gʼa hkanˍ tuˬ yoˬ.

19Heuˆ gaˇ ve mawˇ hta‸ gʼa ve leh, hkʼaˬ ma ha lehˬ tuˬ cawˬ ve le. Cuˇ yiˍ maˇ cawˬ ve chaw lehˬ, a shu yawˇ ve venˇbaˆ hta‸ maˇ dawˇ hpfuhˆ puiˉ.

20Cuˇ yiˍ cawˬ ve chaw hta‸ awˬ chawˇ te-o. Nawˬ htawˇ cuˇ yiˍ cawˬ la tuˬ yoˬ. Cuˇ yiˍ maˇ cawˬ ve chaw hta‸ awˬ chawˇ te ve kʼo, nawˬ htawˇ gʼa luˬ gʼa sheˆ tuˬ yoˬ.

21Dawˇ haˍ tuˬ awˬ ceuˬ lehˬ, venˇbaˆ yaˇ teˇ hpaˍ awˬ hkʼaˇ suh gʼa‸ yuˬ toˇ chehˇ ve yoˬ. Ya‸ hkʼaˇ, hteˇ ve cawˇ ve chaw lehˬ da‸ ve awˬ bon hta‸ gʼa tuˬ yoˬ.

22Da‸ ve chaw lehˬ a shu yawˇ ve awˬ hawehˍ teˇ hpaˍ awˬ pon, awˬ shinˉ teh taˉ piˇ puiˉ ve yoˬ. Ya‸ hkʼaˇ, venˇbaˆ yaˇ hui ve hpu shi mawˇ jeˬ lehˬ hteˇ ve cawˇ ve chaw hui geh gaˬ puiˉ ve yoˬ.

23Baˬ taˍ ve ti mi lehˬ, haˍ gʼawˇ ve chaw hui awˬ pon caˬ shiˍ maˇ maˇ tawˆ la piˇ ve yoˬ. Ya‸ hkʼaˇ, maˇ hteˇ maˇ cawˇ ve chaw lehˬ, ti mi oˇ ve hta‸ hkʼe leˇ baˬ taˍ ve yoˬ.

24Nawˬ ve yaˇ hta‸ nawˬ maˇ maˍ piˇ ve kʼo, nawˬ lehˬ yaˇ hta‸ ha‸ ve maˇ heˆ. Nawˬ yawˇ hta‸ ha‸ ve kʼo, yawˇ hta‸ nawˬ maˍ piˇ tuˬ yoˬ.

25Hteˇ ve cawˇ ve chaw lehˬ caˇ tuˬ dawˬ tuˬ hkʼa biˇ cawˬ ve yoˬ. Ya‸ hkʼaˇ, haiˬ ve chaw lehˬ hkʼaˬ htaˆ ka‸ gʼa meu‸ jehˇ chehˇ ve yoˬ.

← Chapter 12 Jump to: Chapter 14 →