Proverbs 21

Lahu Bible Edited © Thailand Bible Society and Bible Society of Myanmar, 2010, 2020.

← Chapter 20 Jump to: Chapter 22 →

1Gʼuiˬsha lehˬ iˉ kaˆ lawˬ hta‸ yawˇ kʼai piˇ lawˬ gaˇ ve teˇ hpawˇ lo kʼai piˇ gʼa ve hkʼe, jawˇmawˇ ve nyi ma hta‸ htawˇ hkʼa sha sha-ehˬ yuˬ hpfuhˆ piˇ gʼa ve yoˬ.

2Nawˬ te chehˇ ve kanˉ lehˬ cawˇ jaˇ peuˬ, teh‸ nawˬ dawˇ taˍ ve yoˬ. Ya‸ hkʼaˇ, Gʼuiˬsha lehˬ nawˬ ve dawˇ hkʼaˇ hta‸ suhˉ jehˬ chehˇ ve hta‸ dawˇnawˇ-oˆ.

3Cawˇ ve da‸ ve kanˉ hta‸ tiˉ te-o. Oˇ hkʼe te ve lehˬ, tuˉ tanˇ tuˬ awˬ ceuˬ yuˬ laˬ ve a‸ kehˉ Yawˇ nyi ma cawˇ ve yoˬ.

4Haiˬ ve chaw teˇ hpaˍ ve nyi ma hkʼaw maˇ da‸ ve dawˇ hkʼaˇ hkʼa biˇ cawˬ taˍ ve yoˬ. Chi hkʼe ve nyi ma lehˬ venˇbaˆ cawˬ ve yoˬ.

5Nawˬ hkʼa deh‸ gu taˍ ve hkʼaw kanˉ te ve kʼo, caˇ leuˉ dawˬ leuˉ hkʼa biˇ cawˬ tuˬ yoˬ. Ya‸ hkʼaˇ, nawˬ hkʼa deh‸ maˇ te ve kʼo caˇ law‸ tuˬ ve maˇ heˆ.

6Maˇ hteˇ maˇ cawˇ ve awˬ hkʼaw lo nawˬ ca gʼa taˍ ve hpu shi mawˇ jeˬ lehˬ, teˇ hkui tiˉ mehˉ kʼai tuˬ yoˬ. Nawˬ htawˇ suh kuiˬ lo gʼa gaˬ tuˬ yoˬ.

7Haiˬ ve chaw lehˬ haiˬ ve kanˉ hta‸ te ve pa taw, gʼa luˬ gʼa sheˆ tuˬ yoˬ. Yawˇ hui lehˬ da‸ ve kanˉ hta‸ maˇ te gaˇ puiˉ.

8Venˇbaˆ cawˬ ve chaw lehˬ kʼaw‸ ve ya‸ kʼaw hta‸ te toˇ chehˇ ve yoˬ. Venˇbaˆ maˇ cawˬ ve chaw lehˬ da‸ ve kanˉ hta‸ tiˉ te ve yoˬ.

9Yehˬ hkʼaw lo tawˇ maˇ ve awˬ miˇ ma geh gʼa chehˇ taˍ ve a‸ kehˉ, yehˬ hkʼoˆ lo gʼa taˆ mui taˍ ve lehˬ leuˉ leh da‸ jaˇ ve yoˬ.

10Haiˬ ve chaw lehˬ shu hta‸ ya‸ gaˇ puiˉ ve yoˬ. Shu hta‸ ha kʼaˉ ve nyi ma maˇ cawˬ.

11Haiˬ ve chaw ciˍ yanˍ ve hta‸ gʼa hkanˍ ve teˇ yanˇ, maˇ dawˇ nyi puiˉ ve chaw shaˍ ti‸ gʼa ve yoˬ. Cuˇ yiˍ cawˬ ve chaw lehˬ yawˇ gʼa henˇ taˍ ve teˇ hpaˍ hta‸ na yuˬ puiˉ ve yoˬ.

12Hteˇ ve cawˇ ve Gʼuiˬsha lehˬ, haiˬ ve chaw hui ve yehˬ kʼa hkʼaw hkʼaˬ hkʼe hpeh‸ chehˇ ve hta‸ shiˍ chehˇ ve yoˬ. Yawˇ lehˬ chaw oˇ ve teˇ hpaˍ hta‸ luˬ kʼai piˇ tuˬ yoˬ.

13Haˍ gʼawˇ ve chaw kuˬ hawˬ ve awˬ hkawˇ hta‸ nawˬ maˇ na yuˬ piˇ ve kʼo, nawˬ kuˬ hawˬ ve teˇ yanˇ chaw teˇ gʼaˇ ka‸ na yuˬ laˇ tuˬ ve maˇ heˆ.

14Chaw teˇ gʼaˇ gʼaˇ nawˬ hta‸ nyi ma zuhˆ ve kʼo, baˬ kuiˬ lo hkʼawˇ piˇ ve la‸ shawnˍ lehˬ yawˇ hta‸ nyi ma kʼaw‸ sha la piˇ tuˬ yoˬ.

15Hteˇ ve cawˇ ve kanˉ hta‸ te ve kʼo, da‸ ve chaw ha lehˬ ve yoˬ. Ya‸ hkʼaˇ, haiˬ ve chaw nyi ma luˬ ve yoˬ.

16Da‸ ve hta‸ te hkawˇ maˇ shiˍ ve chaw hta‸ suh ve teˇ ceuˬ law nyi chehˇ taˍ ve yoˬ.

17Awˬ me‸ awˬ hponˇ, a pehˉ meuˇ gʼuiˬ leh da‸ ve caˇ tuˬ teˇ hpaˍ lehˬ, nawˬ hta‸ paw sha la piˇ gʼa tuˬ ve maˇ heˆ.

18Da‸ ve chaw hta‸ te luˬ piˇ gaˇ ve chaw lehˬ, luˬ kuiˬ sheˆ kuiˬ lo gʼa gaˬ tuˬ yoˬ.

19Tawˇ maˇ ve awˬ miˇ ma geh gʼa chehˇ taˍ ve a‸ kehˉ, heh puiˉ hkʼaw lo gʼa ca chehˇ taˍ ve lehˬ leuˉ leh da‸ jaˇ ve yoˬ.

20Cuˇ yiˍ cawˬ ve chaw lehˬ paw sha leh awˬ me‸ awˬ hponˇ cawˬ ve yoˬ. Ya‸ hkʼaˇ, cuˇ yiˍ maˇ cawˬ ve chaw lehˬ yawˇ hui ca gʼa taˍ ve hpu hta‸ haˆ haˆ yehˇ baˬ ve yoˬ.

21Shu hta‸ ha kʼaˉ puiˉ leh hteˇ ve cawˇ ve chaw lehˬ, co zuhˬ ha zuhˬ cawˬ tuˬ yoˬ. Shu yawˇ hta‸ yawˆ yan leh taˍ uiˍ taˍ mvuh piˇ tuˬ yoˬ.

22Cuˇ yiˍ cawˬ ve ma‸ poˍ lehˬ ma‸ yaˇ hkʼa biˇ chehˇ taˍ ve venˇ hta‸ bawˆ yuˬ leh, venˇ oˇ ve hta‸ te luˬpiˇ gʼa ve yoˬ.

23Nawˬ maˇ sho‸ sha‸ gaˇ ve kʼo, nawˬ tawˇ yaw ve hta‸ shaˍ ti‸ hkʼa deh‸ taˍ-o‸.

24Nyi ma kʼaw‸ ve chaw ngaˬ hta‸ maˍ laˇ-oˆ. Oˇ hkʼe te ve kʼo nyi ma uiˍ ve, caˆ muiˬ ve, leh shu awˬ pon maˇ dawˇ nyi puiˉ ve chaw ngaˬ nawˬ hta‸ maˍ laˇ tuˬ yoˬ.

25Kanˉ te bawˬ ve chaw lehˬ a shu yawˇ awˬ to hta‸ tiˇ pehˍ chehˇ ve yoˬ.

26Yawˇ lehˬ, yawˇ heuˆ gaˇ ve awˬ ceuˬ hta‸ tiˉ dawˇ nyi chehˇ puiˉ ve yoˬ. Ya‸ hkʼaˇ, hteˇ ve cawˇ ve chaw lehˬ shu hta‸ ha lehˬ ha kʼa tanˇ piˇ ga piˇ puiˉ ve yoˬ.

27Haiˬ ve chaw hui yuˬ laˬ ve tuˉ tanˇ tuˬ hta‸ Gʼuiˬsha canˇ ve yoˬ.

28Heˍ puiˉ ve chaw shaˉ hkiˆ hkanˍ ve tawˇ hta‸ shu maˇ yonˍ. Ya‸ hkʼaˇ, dawˇ nyi puiˉ ve chaw yaw ve tawˇ hta‸ shu na yuˬ ve yoˬ.

29Hteˇ ve cawˇ ve chaw lehˬ a shu yawˇ awˬ to hta‸ yonˍ chehˇ ve yoˬ. Haiˬ ve chaw lehˬ shu yonˍ gʼa tuˬ gʼaˇ hte‸ gʼa coˇ caˇ ve yoˬ.

30Gʼuiˬsha nawˬ geh maˇ chehˇ ve kʼo, nawˬ hkʼaˬ ma cuˇ yiˍ cawˬ lehˬshiˍ puiˉ ve htawˇ te‸ chiˉ awˬ bon maˇ cawˬ.

31Ma‸ bawˆ tuˬ awˬ pon nawˬ iˉ mvuhˇ maˇ maˇ ca gʼa hpeh‸ ve yoˬ. Ya‸ hkʼaˇ, nawˬ hta‸ gʼaˇ shehˍ hpaˇ hpeh‸ la piˇ ve lehˬ Gʼuiˬsha yoˬ.

← Chapter 20 Jump to: Chapter 22 →