Proverbs 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Haˍ gʼawˇ ve htawˇ hteˇ ve cawˇ ve chaw lehˬ, heˍ puiˉ ve chaw luˬ paˍ a‸ kehˉ da‸ leuˉ ve yoˬ.

2Hkʼaˬ ma coˇ caˇ gaˇ ve nyi ma cawˬ ve htawˇ, cuˇ yiˍ maˇ cawˬ ve kʼo awˬ bon maˇ cawˬ. Nyi ma ngeh ve chaw lehˬ dawˇ haˍ kuiˬ lo gʼa gaˬ tuˬ yoˬ.

3Chaw teˇ hpaˍ hpaˍ haiˬ ve kanˉ hta‸ te leh gʼa luˬ gʼa sheˆ ve teˇ yanˇ, Gʼuiˬsha hta‸ venˇbaˆ taˍ puiˉ ve yoˬ.

4Paw sha ve chaw lehˬ awˬ chawˇ ca gʼa puiˉ jaˇ ve yoˬ. Ya‸ hkʼaˇ, haˍ gʼawˇ ve chaw lehˬ yawˇ cawˬ taˍ ve awˬ chawˇ hta‸ ka‸ maw maw ha‸ shaˉ taˍ maˇ gʼa.

5Shaˉ nanˉ hkʼaw nawˬ tawˇ heˍ yaw ve kʼo, ciˍ yanˍ ve hta‸ gʼa hkanˍ tuˬ yoˬ. Ponˬ kuiˬ maˇ cawˬ.

6Chaw uiˍ chaw mvuh teˇ hpaˍ hta‸ a shu ka‸ awˬ chawˇ ca te gaˇ ve yoˬ.

7Haˍ gʼawˇ ve chaw hta‸ yawˇ ve awˬ viˉ awˬ nyi teˇ hpaˍ ka‸ awˬ chawˇ maˇ te gaˇ. Yawˇ awˬ chawˇ maˇ cawˬ. Yawˇ hkʼaˬ ma coˇ caˇ leh ca ve htawˇ, awˬ chawˇ teˇ gʼaˇ ka‸ ca maˇ gʼa.

8Nawˬ ve awˬ to hta‸ ha‸ leh hkʼa henˇ gʼa ve awˬ ceuˬ hkʼa peu-eˬ hta‸ henˇ yuˬ-o‸. Henˇ taˍ peuˬ ve teˇ hpaˍ hta‸ dawˇ nawˇ taˍ ve kʼo, nawˬ uiˍ la da‸ la tuˬ yoˬ.

9Shaˉ nanˉ hkʼaw tawˇ hkʼa heˍ yaw ve chaw hkʼa peu-eˬ ciˍ yanˍ ve hta‸ maˇ gʼa ponˬ. Yawˇ lehˬ gʼa dawˇ haˍ jaˇ tuˬ yoˬ.

10Chaw luˬ paˍ lehˬ paw sha jaˇ ve chaw maˇ hpeh‸ la cawˇ. Awˬ ceˬ paˍ htawˇ chaw uiˍ chaw mvuh teˇ hpaˍ awˬ hkʼoˆ awˬ hoˉ maˇ te cawˇ.

11Nawˬ lehˬ dawˇ nyi puiˉ ve chaw hpeh‸ ve kʼo, nyi ma zuhˆ ve hta‸ yeunˇ hkanˍ puiˉ tuˬ yoˬ. Chaw teˇ gʼaˇ gʼaˇ nawˬ hta‸ te ya‸ laˇ ve kʼo, yawˇ hta‸ venˇbaˆ hpehˇ piˇ ve lehˬ da‸ jaˇ ve awˬ hkʼaˇ hpeh‸ ve yoˬ.

12Jawˇmawˇ nyi ma zuhˆ ve lehˬ, kuˬ chehˇ ve laˇ caˬ shiˉ hkʼe hpeh‸ ve yoˬ. Ya‸ hkʼaˇ, yawˇ awˬ bon te laˇ ve lehˬ, mvuhˇ yeˬ gʼuiˬ hkʼe hpeh‸ ve yoˬ.

13Cuˇ yiˍ maˇ cawˬ ve yaˇ paˍ lehˬ awˬ pa hta‸ luˬ kʼai piˇ gʼa ve yoˬ. Deˇ puiˉ hkanˬ puiˉ ve awˬ miˇ ma lehˬ teˇ jaˆ peuˬ teˇ jaˆ ce la chehˇ ve mvuhˇ yeˬ gʼuiˬ hkʼe hpeh‸ ve yoˬ.

14Chaw yaˇ lehˬ a shu yawˇ ve awˬ pa awˬ e geh awˬ shinˉ laiˉ ceuˬ gʼa puiˉ ve yoˬ. Ya‸ hkʼaˇ, Gʼuiˬsha ceh tiˉ yawˇ hta‸ cheuˬ ve awˬ miˇ ma ca piˇ gʼa ve yoˬ.

15Bawˬ ve chaw teˇ hpaˍ zuh‸ muiˉ kʼa mehˬ jaˇ ve yoˬ. Ya‸ hkʼaˇ, gʼa meu‸ jehˇ ve yoˬ.

16Gʼuiˬsha ve awˬliˇtawˇhkawˇ hta‸ na yuˬ-o‸. Nawˬ maw maw gʼa te‸ chehˇ tuˬ yoˬ. Nawˬ maˇ na yuˬ ve kʼo gʼa suh tuˬ yoˬ.

17Nawˬ haˍ gʼawˇ ve chaw hta‸ ga piˇ ve kʼo, Gʼuiˬsha hta‸ chiˇ piˇ ngaˬ piˇ ve hkʼe hpeh‸ ve yoˬ. Gʼuiˬsha nawˬ hta‸ kʼaw‸ shaiˍ laˇ tuˬ yoˬ.

18Nawˬ ve yaˇ teˇ hpaˍ a sha‸ i sheˍ htaˇ ka‸ maˍ piˇ-oˆ. Nawˬ oˇ hkʼe maˇ te ve kʼo, yawˇ hui a shu yawˇ awˬ to hta‸ te luˬ tuˬ nawˬ awˬ gʼaˇ piˇ chehˇ ve hkʼe hpeh‸ ve yoˬ.

19Chaw teˇ gʼaˇ gʼaˇ nyi ma zuhˆ ve kʼo, yawˇ te tawˆ la ve hta‸ keunˍve hkʼe hkanˍ piˇ lawˬ-o‸. Nawˬ yawˇ hta‸ teˇ pawˆ ga piˇ jaw ve kʼo, laiˉ pawˆ gʼa kʼaw‸ ga piˇ tuˬ sheˍ ve yoˬ.

20Nawˬ lehˬ shu dawˇ hkʼaˇ piˇ laˇ ve hta‸ na leh henˇ yuˬ gaˇ puiˉ ve nyi ma cawˬ ve kʼo, nawˬ cuˇ yiˍ cawˬ la tuˬ yoˬ.

21Chaw yaˇ lehˬ kanˉ hkʼaˇ laiˉ ceuˬ dawˇ nyi leh gu taˍ puiˉ ve yoˬ. Ya‸ hkʼaˇ, Gʼuiˬsha a loˍ cawˇ ve ceh tiˉ biˇ la tuˬ yoˬ.

22Tuˬ ve chaw lehˬ awˬ me‸ awˬ hponˇ maˇ cawˬ. Haˍ gʼawˇ ve chaw lehˬ heˍ puiˉ ve chaw a‸ kehˉ da‸ leuˉ ve yoˬ.

23Gʼuiˬsha hta‸ yawˆ yan-o. Nawˬ co zuhˬ ha zuhˬ cawˬ leh, gawˬ lehˍ gʼa chehˇ tuˬ yoˬ.

24Chaw teˇ hpaˍ hpaˍ bawˬ jaˇ leh, a shu yawˇ ve maw‸ kʼaw hkʼaw caˇ tuˬ yuˬ keu ve ceh ka‸ maˇ te gaˇ ve yoˬ.

25Te‸ chiˉ maˇ shiˍ ve chaw hui awˬ pon henˇ kuiˬ jawˬ kuiˬ hpeh‸ tuˬ, nyi ma uiˍ ve chaw hta‸ ciˍ yanˍ piˇ cawˇ ve yoˬ. Nawˬ lehˬ cuˇ yiˍ cawˬ ve chaw hpeh‸ ve kʼo, shu deˇ maˍ laˇ ve hta‸ henˇ yuˬ puiˉ tuˬ yoˬ.

26Awˬ me‸ awˬ hponˇ maˇ cawˬ leh ya‸ taw hkawˇ maˇ shiˍ ve chaw lehˬ, a shu yawˇ ve awˬ pa hta‸ hkʼa mvuhˇ hkʼa na te leh, a shu yawˇ ve awˬ e hta‸ gʼa‸ kʼoˬ puiˉ ve yoˬ.

27Yaˇ paˍ-oˬ, nawˬ awˬ gʼuˇ suhˍ maˇ kʼaw‸ caˉ henˇ kʼai ve kʼo, nawˬ hkʼa shiˍ taˍ ve teˇ hpaˍ htawˇ mehˉ kʼai tuˬ yoˬ.

28Shu hta‸ naˬ tuˬ kʼoˆ ve shaˉ hkiˆ lehˬ maˇ hteˇ maˇ cawˇ ve shaˉ hkiˆ hpeh‸ ve yoˬ. Haiˬ ve chaw lehˬ cha‸ chiˆ ve kanˉ hta‸ nyi ma cawˇ ve yoˬ.

29Haiˬ ve dawˇ hkʼaˇ cawˬ ve chaw luˬ paˍ lehˬ awˬ tehˬ awˬ na jaw‸ ve hta‸ gʼa hkanˍ tuˬ yoˬ.

← Chapter 18 Jump to: Chapter 20 →