Proverbs 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Yaˇ paˍ-oˬ, ngaˬ kʼoˆ laˇ ve tawˇ hta‸ hkʼaˬ htaˆ ka‸ dawˇ nawˇ taˍ leh, ngaˬ te tcuh ve kanˉ teˇ hpaˍ hta‸ teˇ pawˆ ka‸ taˇ leunˇ piˇ.

2Ngaˬ kʼoˆlaˇ ve hkʼe te-o. Oˇ hkʼe te ve kʼo nawˬ gʼa te‸ chehˇ tuˬ yoˬ. Nawˬ ve mehˆ shiˍ hta‸ ha‸ shaˉ chehˇ ve hkʼe, ngaˬ maˍ laˇ chehˇ ve tawˇ teˇ hpaˍ hta‸ hkʼa deh‸ ha‸ shaˉ taˍ-o‸.

3Ngaˬ ve tawˇ teˇ hpaˍ hkʼaˬ htaˆ ka‸ nawˬ geh cawˬ taˍ piˇ-oˆ. Nawˬ ve nyi ma shiˍ hkʼoˆ lo bvuh‸ keu taˍ-o‸.

4Cuˇ yiˍ teˇ ceuˬ hta‸ nawˬ ve awˬ nyi ma hkʼe shawˍ leh, shiˍ puiˉ ve nyi ma hta‸ nawˬ ve awˬ chawˇ hkʼe shawˍ taˍ-o‸.

5Oˇ ve teˇ hpaˍ lehˬ, nawˬ hta‸ shu miˇ ma ve la‸ sheh hkʼaw maˇ gʼa gaˬ tuˬ ha‸ shaˉ laˇ tuˬ yoˬ.

6Teˇ pawˆ htaˇ ngaˬ yehˬ hkʼaw chehˇ taˍ leh, yehˬ miˉ ehˉ hkʼaw nyi peu chehˇ htaˇ,

7ya‸ kʼaw hkʼoˆ lo yaˇ nehˬ laiˉ gʼaˇ te toˇ chehˇ ve hta‸ ngaˬ gʼa mawˬ ve yoˬ. Oˇ kaˬ lo chaw luˬ paˍ teˇ gʼaˇ htawˇ te toˇ chehˇ ve yoˬ.

8Yawˇ lehˬ yaˇ miˇ teˇ gʼaˇ chehˇ taˍ kuiˬ yehˬ paˇ lo hpanˍ kʼai chehˇ ve yoˬ.

9Mehˆ muiˉ naˆ la paˇ neˇ htaˇ, yaˇ miˇ oˇ ve yawˇ hta‸ gʼa mawˬ ve yoˬ.

10Yaˇ miˇ oˇ ve lehˬ meh maˬ lanˉ hkʼa shuˍ veu‸ deh taˍ leh, awˬ hkʼaˇ gu chehˇ ve yoˬ.

11Yawˇ lehˬ ya‸ taw hkawˇ maˇ shiˍ ve yaˇ miˇ hpeh‸ leh, ya kʼaw hkʼoˆ te toˇ chehˇ ve yoˬ.

12Teˇ pawˆ pawˆ ya‸ kʼaw ceˍ lo law taˍ puiˉ leh, teˇ pawˆ pawˆ tcuh hkʼaw lo te toˇ chehˇ puiˉ ve yoˬ.

13Yawˇ lehˬ chaw luˬ paˍ oˇ ve hta‸ behˇ kʼuˉ taˍ leh boˆ nu piˇ ve yoˬ. Peuˬ hkʼaw‸ nawˉ yawˇ hta‸ hkʼa deh‸ nyi taˍ leh,

14Ya‸ nyi ngaˬ ca tuˉ tanˇ kʼaw‸ la ve yoˬ. Aˉ hkʼaw lo shaˍ teˇ hpaˍ cawˬ taˍ sheˍ ve yoˬ.

15Chi hta‸ pa taw, ngaˬ nawˬ hta‸ ca tawˆ nyi la ve yoˬ. Ngaˬ nawˬ hta‸ hpuˇ da‸ gaˇ jaˇ ve yoˬ.

16Ngaˬ ve zuh‸ hpui hta‸ Eˇjiˇtu‸ mvuhˇmiˬ lo laˬ ve da‸ jaˇ ve hpa yuˬ hkʼawˇ taˍ ve yoˬ.

17Muˉraˍ leh naˍmanˇ hawnˉ teˇ hpaˍ ka‸ hkʼa deh‸ shehˆ taˍ ve yoˬ.

18Ngaˬ geh laˬ-o‸. Teˇ haˉ mvuhˇ hkʼa htiˇ ngaˬ huiˉ maˬ teˇ geh kʼuˉ zuh‸ taˍ-a veuˬ.

19Ngaˬ ve awˬ hpawˇ lehˬ chi beu‸ aˉ hkʼaw lo maˇ chehˇ. Yawˇ vuiˇ kuiˬ lo tawˆ kʼai peuˬ.

20Yawˇ geh lo hpu htawˇ maˇ maˇ yuˬ kʼai taˍ ve yoˬ. Nyiˇ shinˉ hkʼaw‸ nawˉ maˇ heˆ kʼo, yawˇ kʼaw‸ gaˬ la tuˬ ve maˇ heˆ, teh‸ yawˇ hta‸ kʼoˆ piˇ ve yoˬ.

21Yaˇ miˇ oˇ ve lehˬ, hawˉ hkʼaˆ paˍ oˇ ve hta‸ beˬ yuˬ leh yawˇ geh shiˍ kʼai ve yoˬ.

22Yawˇ lehˬ tiˉ pehˍ kuiˬ lo sheh kʼai chehˇ ve nuˇ paˍ lonˉ leh, va hkʼaw lo‸-e chehˇ ve hkuiˉ zuhˬ hkʼa shuˍ, yaˇ miˇ oˇ ve hkʼaˇ suh gʼa‸ kʼai ve yoˬ.

23Yawˇ lehˬ, pehˍ hkʼaw lo‸-e chehˇ ve ngaˆ ehˉ hkʼa shuˍ hpeh‸ ve yoˬ. Luˬ kuiˬ sheˆ kuiˬ lo kʼai chehˇ ve hta‸ yawˇ maˇ shiˍ.

24Chi hta‸ pa taw yaˇ teˇ hpaˍ-oˬ, ngaˬ kʼoˆ laˇ chehˇ ve tawˇ hta‸ na sheˍ.

25Chi hkʼe ve yaˇ miˇ nawˬ hui hta‸ taˇ beˬ gʼa piˇ lawˬ. Yawˇ hkʼaˇ suh taˇ gʼa‸ kʼai.

26Yawˇ lehˬ chaw laiˉ gʼaˇ hta‸ te luˬ piˇ jaw peuˬ leh, gʼaw maˇ peuˬ htaˇ hkʼa gaˬ maˇ jaˇ ve chaw hui hta‸ suh-e piˇ lawˬ peuˬ ve yoˬ.

27Nawˬ hui yawˇ ve yehˬ hkʼaw lo‸-e ve kʼo, nawˬ hui lehˬ suh mvuhˇmiˬ lo kʼai ve ya‸ kʼaw hkʼoˆ lo huˉ taˍ peuˬ ve yoˬ.

← Chapter 6 Jump to: Chapter 8 →