Proverbs 29

Lahu Bible Edited © Thailand Bible Society and Bible Society of Myanmar, 2010, 2020.

← Chapter 28 Jump to: Chapter 30 →

1Shu laiˉ pawˆ maˍ piˇ ve hta‸ nyi ma heh leh maˇ na yuˬ puiˉ ve chaw lehˬ, teˇ nyi kʼo gʼa luˬ gʼa sheˆ tuˬ yoˬ.

2Hteˇ ve cawˇ ve chaw uˉ peunˍ ve teˇ yanˇ, mvuhˇ miˬ yaˇ teˇ hpaˍ ha lehˬ ve yoˬ. Haiˬ ve chaw uˉ peunˍve teˇ yanˇ, mvuhˇmiˬ yaˇ teˇ hpaˍ dawˇ haˍ ve yoˬ.

3Cuˇ yiˍ cawˬ ve yaˇ paˍ lehˬ awˬ pa hta‸ ha lehˬ piˇ ve yoˬ. Meh maˬlanˉ hta‸ awˬ chawˇ te leh hpu hkʼe leˇ yehˇ baˬ ve yaˇ paˍ lehˬ, awˬ pa ve awˬ me‸ awˬ hponˇ hta‸ te luˬ ve yoˬ.

4Jawˇmawˇ lehˬ hteˇ ve cawˇ ve awˬ ceuˬ hta‸ ha‸ ve kʼo, mvuhˇ yaˇ miˬ yaˇ teˇ hpaˍ awˬ gʼaˇ uiˍ la ve yoˬ. Ya‸ hkʼaˇ, yawˇ lehˬ hpu hta‸ ha‸ ve kʼo, yawˇ ve mvuhˇmiˬ luˬ kʼai tuˬ yoˬ.

5A shu yawˇ ve awˬ chawˇ hta‸ heˍ caˇ ve chaw lehˬ, a shu yawˇ awˬ to hta‸ va htaw chehˇ ve yoˬ.

6Chaw yaˇ teˇ hpaˍ lehˬ a shu yawˇ te taˍ ve venˇbaˆ hta‸ pa taw, htaw taˍ ve va hta‸ yaw ve yoˬ. Ya‸ hkʼaˇ, hteˇ ve cawˇ ve chaw lehˬ ha lehˬ ha kʼa gʼa chehˇ ve yoˬ.

7Da‸ ve chaw lehˬ haˍ gʼawˇ ve chaw hui awˬ pon dawˇ nyi puiˉ ve yoˬ. Haiˬ ve chaw lehˬ chi hkʼe ve hta‸ maˇ shiˍ.

8Shu awˬ pon maˇ dawˇ nyi puiˉ ve chaw lehˬ venˇ yaˇ teˇ hpaˍ hta‸ sho‸ sha‸ tuˬ te ve yoˬ. Cuˇ yiˍ cawˬ ve chaw lehˬ awˬ ceuˬ hkʼa peu-eˬ ve hta‸ gawˬ lehˍ cawˬ la piˇ ve yoˬ.

9Chaw luˬ paˍ hta‸ shaˉnanˉ lo tawˇ ca te da‸ ve lehˬ, te‸ chiˉ tcuhˉ kuiˬ maˇ cawˬ. Yawˇ nyi ma zuhˆ leh cha‸ chiˆ ve tawˇ ceh tiˉ yaw tuˬ yoˬ.

10Chaw hta‸ tiˇ pehˍ ve chaw lehˬ hteˇ ve cawˇ ve chaw hta‸ canˇ ve yoˬ. Ya‸ hkʼaˇ, hteˇ ve cawˇ ve chaw lehˬ chaw oˇ hkʼe ve teˇ hpaˍ hta‸ ha‸ shaˉ piˇ ve yoˬ.

11Cuˇ yiˍ maˇ cawˬ ve chaw lehˬ, nyi ma zuhˆ leh shu hta‸ deˇ puiˉ ve yoˬ. Ya‸ hkʼaˇ, dawˇ nyi puiˉ ve chaw lehˬ yeunˇ hkanˍ leh ta‸ iˉ chehˇ taˍ puiˉ ve yoˬ.

12Uˉ peunˍ shehˍ hpaˇ lehˬ maˇ heˆ heˆ ve shaˉ hkiˆ hta‸yonˍ leh na yuˬ ve kʼo, yawˇ ve a ma‸ lonˉ hkʼa peu-eˬ htawˇ chaw heˍ paˍ teˇ hpaˍ hpeh‸ ve yoˬ.

13Haˍ gʼawˇ ve chaw hta‸ maˇ kʼoˆ, yawˇ hta‸ fawˉ mehˍ piˇ chehˇ ve chaw hta‸ maˇ kʼoˆ, Gʼuiˬsha lehˬ mehˆ shiˍ hkʼa shuˍ shuˍ piˇ taˍ ve yoˬ.

14Jawˇmawˇ lehˬ haˍ gʼawˇ ve chaw hui hpawˇ chehˇ leh suhˉ jehˬ piˇ ve kʼo, yawˇ maw maw gʼa uˉ peunˍ chehˇ tuˬ yoˬ.

15Jaw‸ maˍ piˇ ve teˇ ceuˬ lehˬ, yaˇ ehˉ awˬ pon da‸ ve awˬ hkʼaˇ hpeh‸ ve yoˬ. Hkʼe leˇ hpehˇ baˬ taˍ ve kʼo, a shu yawˇ ve awˬ e hta‸ ya‸ taw tuˬ te piˇ ve yoˬ.

16Haiˬ ve chaw uˉ peunˍ ve teˇ yanˇ, haiˬ ve awˬ ceuˬ cawˬ maˇ la ve yoˬ. Ya‸ hkʼaˇ, yawˇ hui ce kʼai ve hta‸ da‸ ve chaw teˇ hpaˍ gʼa mawˬ tuˬ yoˬ.

17Nawˬ ve yaˇ hta‸ maˍ piˇ-oˆ. Nawˬ hkʼaˬ htaˆ ka‸ gʼa ha lehˬ chehˇ tuˬ yoˬ. Yawˇ nawˬ hta‸ ya‸ taw piˇ lawˬ tuˬ ve maˇ heˆ.

18Gʼuiˬsha maˇ uˉ peunˍ ve chaw ceuˬ lehˬ, awˬ liˇ awˬ hkʼaˇ maˇ ca ve chaw ceuˬ hpeh‸ ve yoˬ. Gʼuiˬsha ve awˬliˇtawˇhkawˇ hta‸ na yuˬ ve chaw lehˬ gʼa ha lehˬ ve yoˬ.

19Awˬ ceˬ paˍ hta‸ tawˇ yaw leh maˍ piˇ ve ceh te ve lehˬ maˇ law‸ taˬ. Yawˇ na gʼa ve ka‸ nawˬ ve tawˇ hta‸ na yuˬ tuˬ ve maˇ heˆ.

20Chaw luˬ paˍ lehˬ hkʼa deh‸ maˇ dawˇ nyi leh tawˇ yaw ve chaw a‸ kehˉ dawˇ law kuiˬ cawˬ sheˍ ve yoˬ.

21Awˬ ceˬ paˍ hkʼa lawˬ ve mawˇ hta‸ piˇ ve chaw lehˬ, maˇ maw maw yawˇ ve mawˇ hkʼa peu-eˬ awˬ ceˬ oˇ ve gʼa kʼai tuˬ yoˬ.

22Nyi ma haˆ haˆ zuhˆ puiˉ ve chaw lehˬ, ya‸ da‸ jiˆ da‸ tuˬ maˇ maˇ te tawˆ la puiˉ ve yoˬ.

23Nyi ma uiˍ ve mvuh ve chaw lehˬ, paiˍ tuˬ yoˬ. Ya‸ hkʼaˇ, nyi ma nuˇ nehˬ ve chaw lehˬ, shu chiˇ uiˍ chiˇ mvuh ve hta‸ gʼa hkanˍ tuˬ yoˬ.

24Chaw hkʼawˇ hta‸ awˬ chawˇ te ve chaw lehˬ, yawˇ ve canˇ paˍ hpeh‸ ve yoˬ. Shaˉ nanˉ hkʼaw hteˇ lehˍ hto ve kʼo ciˍ yanˍ ve hta‸ gʼa hkanˍ ve yoˬ. Hteˇ lehˍ maˇ hto ve kʼo Gʼuiˬsha hkeu ve hta‸ gʼa hkanˍ tuˬ yoˬ.

25Chaw yaˇ hta‸ gʼaˇ va ve teˇ ceuˬ lehˬ kawˆ tuˬ uiˍ ve va hpeh‸ ve yoˬ. Gʼuiˬsha hta‸ gʼaˇ va ve chaw lehˬ gawˬ lehˍ gʼa chehˇ tuˬ yoˬ.

26Uˉ peunˍ shehˍ hpaˇ hteˇ lehˍ te laˇ tuˬ ve hta‸ mvuhˇmiˬ yaˇ heuˆ gaˇ ve yoˬ. Ya‸ hkʼaˇ, Gʼuiˬsha geh ceh tiˉ hteˇ ve cawˇ ve awˬ ceuˬ hta‸ gʼa hpeh‸ve yoˬ.

27Hteˇ ve cawˇ ve chaw lehˬ haiˬ ve chaw hta‸ canˇ ve yoˬ. Haiˬ ve chaw htawˇ hteˇ ve cawˇ ve chaw hta‸ canˇ ve yoˬ.

← Chapter 28 Jump to: Chapter 30 →