Proverbs 15

Lahu Bible Edited © Thailand Bible Society and Bible Society of Myanmar, 2010, 2020.

← Chapter 14 Jump to: Chapter 16 →

1Tawˇ nuˇ lehˬ yaw ve teˇ ceuˬ lehˬ nyi ma zuhˆ ve hta‸ na-e la piˇ gʼa ve yoˬ. Ya‸ hkʼaˇ, hehnˇ chaweh yaw ve tawˇ lehˬ leuˉ leh nyi ma kʼaw‸ zuhˆ la piˇ ve yoˬ.

2Cuˇ yiˍ cawˬ ve chaw tawˇ yaw ve teˇ yanˇ, shu cuˇ yiˍ hta‸ shiˍ gaˇ ve nyi ma cawˬ la ve yoˬ. Ya‸ hkʼaˇ, chaw luˬ paˍ leh tcuhˉ kuiˬ maˇ cawˬ ve tawˇ hta‸ tiˉ yaw ve yoˬ.

3Gʼuiˬsha lehˬ hkʼa hpeh‸ la ve awˬ ceuˬ hkʼa peu-eˬ hta‸ mawˬ chehˇ ve yoˬ. Ngaˬ hui da‸ ve hta‸ te ve maˇ kʼoˆ, maˇ da‸ ve hta‸ te ve maˇ kʼoˆ, yawˇ ngaˬ hui hta‸ nyi chehˇ ve yoˬ.

4Tawˇ nuˇ lehˍ yaw ve teˇ ceuˬ lehˬ, chaw yaˇ hta‸ a sha‸ te‸ piˇ lawˬ ve yoˬ. Ya‸ hkʼaˇ, hehnˇ chaweh yaw ve tawˇ lehˬ, chaw yaˇ ve nyi ma hta‸ awˬ gʼaˇ nuˇ kʼai piˇ ve yoˬ.

5Awˬ pa maˍ piˇ ve tawˇ hta‸ maˇ na ve chaw lehˬ chaw luˬ paˍ hpeh‸ ve yoˬ. Na yuˬ ve chaw lehˬ cuˇ yiˍ cawˬ ve chaw hpeh‸ ve yoˬ.

6Hteˇ ve cawˇ ve chaw lehˬ a shu yawˇ ve hpu shi mawˇ jeˬ hta‸ ha‸ shaˉ puiˉ ve yoˬ. Ya‸ hkʼaˇ, haiˬ ve chaw lehˬ a shu yawˇ ve hpu shi mawˇ jeˬ hta‸ te mehˉ puiˉ ve yoˬ.

7Cuˇ yiˍ cawˬ ve chaw lehˬ shu hta‸ cuˇ yiˍ kʼaw‸ pehˬ piˇ puiˉ ve yoˬ. Ya‸ hkʼaˇ, chaw luˬ paˍ lehˬ oˇ hkʼe te maˇ gʼa.

8Da‸ ve chaw teˇ hpaˍ bon lawˬ ve hta‸ Gʼuiˬsha nyi ma cawˇ ve yoˬ. Ya‸ hkʼaˇ, haiˬ ve chaw hui yuˬ laˬ ve tuˉ tanˇ tuˬ hta‸ Yawˇ canˇ ve yoˬ.

9Gʼuiˬsha lehˬ haiˬ ve chaw hui te chehˇ ve kanˉ hta‸ canˇ ve yoˬ. Ya‸ hkʼaˇ, da‸ ve kanˉ hta‸ te ve chaw hta‸ Yawˇ ha‸ ve yoˬ.

10Haiˬ ve kanˉ hta‸ te ve chaw lehˬ ciˍ yanˍ ve hta‸ gʼa hkanˍ tuˬ yoˬ. A shu yawˇ te ya‸ ve hta‸ maˇ dawˇ hpfuhˆ ve chaw lehˬ gʼa suh tuˬ yoˬ.

11Suh mvuhˇmiˬ hkʼaw hkʼaˬ hkʼe hpeh‸ chehˇ ve hta‸ htawˇ Gʼuiˬsha mawˬ chehˇ ve yoˬ. Chaw yaˇ ve dawˇ hkʼaˇ Gʼuiˬsha mehˆ gʼuˇ suhˍ hkʼaˬ hkʼe te faˉ taˍ gʼa tuˬ le.

12Haiˬ ve dawˇ hkʼaˇ cawˬ ve chaw lehˬ a shu yawˇ awˬ to hta‸ kʼaw‸ gu tuˬ maˇ te gaˇ. Cuˇ yiˍ cawˬ ve chaw hui geh ka‸ dawˇ hkʼaˇ maˇ ca lawˬ.

13Chaw yaˇ teˇ hpaˍ ha lehˬ ve teˇ yanˇ gʼuiˬ ve yoˬ. Ya‸ hkʼaˇ, yawˇ hui dawˇ haˍ ve teˇ yanˇ mehˆ hpfuhˇ nawˍ tiˆ cawˬ ve yoˬ.

14Cuˇ yiˍ cawˬ ve chaw lehˬ henˇ yuˬ gaˇ puiˉ ve yoˬ. Ya‸ hkʼaˇ, cuˇ yiˍ maˇ cawˬ ve chaw lehˬ a shu yawˇ awˬ to hta‸ nyi hkʼaˇ suh chehˇ ve yoˬ.

15Haˍ gʼawˇ ve chaw lehˬ hkʼaˬ htaˆ ka‸ gʼa hpeˆ dawˇ chehˇ ve yoˬ. Ya‸ hkʼaˇ, ha lehˬ puiˉ ve chaw lehˬ hkʼaˬ htaˆ ka‸ ha lehˬ chehˇ puiˉ ve yoˬ.

16Haˍ gʼawˇ ve htawˇ Gʼuiˬsha hta‸ kawˆ puiˉ ve chaw lehˬ, paw sha ve htawˇ hkʼaˬ htaˆ ka‸ gʼa dawˇ haˍ chehˇ ve chaw a‸ kehˉ da‸ leuˉ ve yoˬ.

17A shu yawˇ ha‸ ve chaw geh gʼawˇ hpa‸ mvuhˬ naweh ceh tiˉ gʼa caˇ ve chaw lehˬ, maˇ cawˇ maˇ hawˍ da‸ ve chaw hui geh shaˍ gʼa mui caˇ chehˇ ve chaw a‸ kehˉ da‸ leuˉ ve yoˬ.

18Nyi ma zuhˆ ve teˇ ceuˬ lehˬ tawˇ gʼawˬ da‸ tuˬ te tawˆ la puiˉ ve yoˬ. Ya‸ hkʼaˇ, yeunˇ hkanˍ ve teˇ ceuˬ lehˬ kʼaw‸ cawˇ da‸ hawˍ da‸ tuˬ te gʼa ve yoˬ.

19Bawˬ ve chaw lehˬ hkʼaˬ lo chehˇ htawˇ, haˍ ve awˬ ceuˬ hta‸ gʼa hpuˇ ve yoˬ. Ya‸ hkʼaˇ, hteˇ ve cawˇ ve chaw lehˬ te‸ chiˉ dawˇ haˍ tuˬ maˇ cawˬ.

20Cuˇ yiˍ cawˬ ve yaˇ paˍ lehˬ awˬ pa hta‸ ha lehˬ piˇ ve yoˬ. Chaw luˬ paˍ lehˬ a shu yawˇ ve awˬ e hta‸ maˇ shawˍ maˇ caˆ te ve yoˬ.

21Cuˇ yiˍ maˇ cawˬ ve chaw lehˬ haiˬ ve kanˉ hkʼaw ha lehˬ chehˇ puiˉ ve yoˬ. Ya‸ hkʼaˇ, cuˇ yiˍ cawˬ ve chaw lehˬ da‸ ve hta‸ tiˉ te ve yoˬ.

22Ca gʼa ve hkʼe da‸ ve dawˇ hkʼaˇ hta‸ ca-o. Nawˬ uiˍ la da‸ la tuˬ yoˬ. Da‸ ve dawˇ hkʼaˇ maˇ cawˬ ve kʼo, luˬ kʼai sheˆ kʼai tuˬ yoˬ.

23Cawˇ ve awˬ yanˇ awˬ hkʼaw lo cawˇ ve tawˇ hta‸ ca gʼa ve lehˬ, hkʼaˬ ma ha lehˬ tuˬ cawˬ ve le.

24Cuˇ yiˍ cawˬ ve chaw lehˬ a sha‸ te‸ piˇ lawˬ ve ya‸ kʼaw hta‸ juˇ kʼai ve yoˬ. A sha‸ suh piˇ lawˬ ve ya‸ kʼaw hta‸ maˇ kʼai.

25Nyi ma uiˍ ve chaw hui ve yehˬ kʼa hta‸ Gʼuiˬsha te luˬ piˇ tuˬ yoˬ. Ya‸ hkʼaˇ, Yawˇ lehˬ mehˇchawˇma ve mawˇ jeˬ hta‸ ha‸ shaˉ piˇ tuˬ yoˬ.

26Maˇ da‸ ve dawˇ hkʼaˇ hta‸ Gʼuiˬsha canˇ ve yoˬ. Ya‸ hkʼaˇ, na sha ve tawˇ hta‸ Yawˇ nyi ma cawˇ ve yoˬ.

27Maˇ hteˇ maˇ cawˇ ve hkʼaw hpu shi hta‸ ca ve chaw lehˬ, gʼa dawˇ haˍ tuˬ yoˬ. Shu geh la‸ shawnˍ taˇ yuˬ caˇ. Oˇ hkʼe te ve kʼo nawˬ a sha‸ ngeh tuˬ yoˬ.

28Da‸ ve chaw lehˬmaˇ yaw hkʼaw‸ sheˍ htaˇ hkʼa deh‸ dawˇ nyi puiˉ ve yoˬ. Haiˬ ve chaw lehˬ la‸ haˉ yaw hkʼaw‸ puiˉ ve yoˬ. Oˇ hkʼe te ve pa taw yawˇ hui gʼa dawˇ haˍ ve yoˬ.

29Da‸ ve chaw bon lawˬ hkawˇ hta‸ Gʼuiˬsha na yuˬ ve yoˬ. Ya‸ hkʼaˇ, haiˬ ve chaw hta‸ Yawˇ chiˇ baˬ ve yoˬ.

30Gʼuiˬ suhˍ lehˍ cawˬ ve mehˆ hpfuhˇ lehˬ chaw yaˇ hta‸ ha lehˬ piˇ ve yoˬ. Na sha ve awˬ lawn sha tanˇ htawˇ, chaw yaˇ hta‸ nyi ma sha piˇ ve yoˬ.

31Maˍ piˇ sheˆ piˇ ve hta‸ na yuˬ ve chaw lehˬ, cuˇ yiˍ cawˬ ve chaw hpeh‸ ve yoˬ.

32Henˇ yuˬ gaˇ ve nyi ma maˇ cawˬ ve chaw lehˬ, a shu yawˇ awˬ to hta‸ luˬ kʼai tuˬ te ve yoˬ. Maˍ piˇ sheˆ piˇ ve hta‸ na yuˬ ve chaw lehˬ cuˇ yiˍ cawˬ la tuˬ yoˬ.

33Gʼuiˬsha hta‸ yawˆ yan puiˉ ve lehˬ cuˇ yiˍ teˇ ceuˬ hpeh‸ ve yoˬ. Awˬ me‸ awˬ hponˇ maˇ gʼa sheˍ htaˇ nyi ma nehˬ lehˍ gʼa taˍ ve yoˬ.

← Chapter 14 Jump to: Chapter 16 →