Proverbs 16

Lahu Bible Edited © Thailand Bible Society and Bible Society of Myanmar, 2010, 2020.

← Chapter 15 Jump to: Chapter 17 →

1Ngaˬ hui lehˬ a shu yawˇ ve kanˉ hkʼaˇ gu taˍ hpeh‸ ve yoˬ. Ya‸ hkʼaˇ, te tawˆla piˇ shehˍ hpaˇ lehˬ Gʼuiˬsha hpeh‸ ve yoˬ.

2Nawˬ hkʼa te ve kanˉ hkʼa peu-eˬ cawˇ ve yoˬ, teh‸ dawˇ tuˬ yoˬ. Ya‸ hkʼaˇ, Gʼuiˬsha lehˬ nawˬ ve dawˇ hkʼaˇ hta‸ suhˉ jehˬ ve yoˬ.

3Nawˬ gu taˍ ve kanˉ hkʼaˇ hta‸ bon na‸ laˇ tuˬ Gʼuiˬsha geh bon lawˬ-o‸. Oˇ hkʼe te ve kʼo, nawˬ te ve kanˉ hkʼa peu-eˬ da‸ la tuˬ yoˬ.

4Gʼuiˬsha hkʼa te taˍ ve kanˉ hkʼa peu-eˬ, awˬ leh meuˇ ve awˬ yanˇ cawˬ ve yoˬ. Haiˬ ve kanˉ hkʼa peu-eˬ ve awˬ leh meuˇ lehˬ luˬ ve sheˆ ve teˇ ceuˬ yoˬ.

5Nyi ma uiˍ ve chaw hui hta‸ Gʼuiˬsha canˇ ve yoˬ. Yawˇ hui hta‸ maˇ ciˍ yanˍ leh hkʼe leˇ ponˬ piˇ tuˬ ve maˇ heˆ.

6Ka ti‸ yeˬ chehˇ-oˆ. Gʼuiˬsha nawˬ ve venˇbaˆ hta‸ hpehˇ hkʼa laˇ tuˬ yoˬ. Gʼuiˬsha hta‸ yawˆ yan-o. Haiˬ ve awˬ ceuˬ nawˬ awˬ hkʼoˆ lo gaˬ la tuˬ ve maˇ heˆ.

7Nawˬ lehˬ Gʼuiˬsha nyi ma cawˇ tuˬ te chehˇ ve kʼo, nawˬ ve canˇ paˍ teˇ hpaˍ htawˇ, nawˬ ve awˬ chawˇ kʼaw‸ hpeh‸ la tuˬ yoˬ.

8Hteˇ ve cawˇ ve awˬ hkʼaw lo ca gʼa taˍ ve mawˇ jeˬ lehˬ a ciˉ ceh tiˉ hpeh‸ ve htawˇ, maˇ hteˇ maˇ cawˇ ve awˬ hkʼaw lo ca gʼa taˍ ve maˇ jaˇ ve mawˇ jeˬ a‸ kehˉ da‸ leuˉ ve yoˬ.

9Nawˬ dawˇ cawˇ ve kanˉ hkʼaˇ hta‸ gu taˍ hpeh‸ ve yoˬ. Ya‸ hkʼaˇ, Gʼuiˬsha lehˬ nawˬ hkʼaˬ hkʼe te cawˇ ve awˬ hkʼaˇ beˆ maˍ laˇ tuˬ yoˬ.

10Jawˇmawˇ lehˬ kanˇ paˆ hta‸ yehˇ leh tawˇ yaw ve yoˬ. Yawˇ suhˉ jehˬ ve lehˬ cawˇ ve deˇ deˇ yoˬ.

11Gʼuiˬsha lehˬ cawˇ ve tsuh tu leh tehˆ nyi tuˬ hta‸ nyi ma cawˇ ve yoˬ.

12Jawˇmawˇ lehˬ haiˬ ve awˬ ceuˬ hta‸ nyi taˍ maˇ hpeh‸. Awˬ lawn kʼo, hteˇ ve cawˇ ve awˬ ceuˬ lehˬ mvuhˇmiˬ uˉ peunˍ paˍ hta‸ awˬ gʼaˇ uiˍ la piˇ ve pa taw yoˬ.

13Jawˇmawˇ lehˬ hteˇ ve cawˇ ve tawˇ hkawˇ hta‸ kaˇ gaˇ ve yoˬ. Oˇ hkʼe ve tawˇ hta‸ yaw puiˉ ve chaw hta‸ yawˇ nyi ma cawˇ ve yoˬ.

14Cuˇ yiˍ cawˬ ve chaw lehˬ jawˇmawˇ hta‸ ha lehˬ tuˬ te piˇ puiˉ ve yoˬ. Jawˇmawˇ nyi ma zuhˆ la ve teˇ yanˇ, chaw teˇ gʼaˇ gʼaˇ suh-e puiˉ ve yoˬ.

15Jawˇmawˇ nyi ma cawˇ ve awˬ ceuˬ lehˬ mvuhˇ kaˆ yanˇ htaˇ mvuhˇ yeˬ laˬ piˇ ve moˬ hkʼe hpeh‸ ve yoˬ. A sha‸ te‸ ve awˬ ceuˬ oˇ kaˬ lo cawˬ ve yoˬ.

16Cuˇ yiˍ cawˬ ve lehˬ hpu shi cawˬ ve a‸ kehˉ da‸ leuˉ ve yoˬ.

17Da‸ ve chaw lehˬ haiˬve ya‸ kʼaw hta‸ jaw kʼai puiˉve yoˬ. Chi hta‸ pa taw nawˬ toˇ kʼai chehˇ ve ya‸ kʼaw hta‸ shaˍ ti‸ taˍ leh nyi taˍ-o‸.

18Caˆ muiˬ ve chaw lehˬ luˬ kuiˬ sheˆ kuiˬ lo gaˬ puiˉ ve yoˬ. Nyi ma uiˍ ve mvuh ve chaw htawˇ nyiˉ ya‸ ve hta‸ gʼa hkanˍ ve yoˬ.

19Haˍ gʼawˇ ve htawˇ nyi ma nehˬ lehˍ taˍ ve chaw lehˬ, nyi ma uiˍ leh shu ve mawˇ hta‸ hiˉ caˇ ve chaw a‸ kehˉ da‸ leuˉ ve yoˬ.

20Shu maˍ laˇ ve tawˇ hta‸ hkʼa deh‸ na yuˬ-o‸. Nawˬ uiˍ la da‸ la tuˬ yoˬ. Gʼuiˬsha hta‸ gʼaˇ va-o. Nawˬ gʼa ha lehˬ tuˬ yoˬ.

21Cuˇ yiˍ cawˬ leh uiˍ la peuˬ ve chaw lehˬ, yawˇ ve shiˍ puiˉ ve nyi ma hta‸pa taw awˬ meh bvuhˬ ve chaw hpeh‸ la ve yoˬ. Yawˇ ve tawˇ shaˬ na sha ve kʼo, shaˬ na shehˍ hpaˇ maˇ la ve yoˬ.

22Cuˇ yiˍ teˇ ceuˬ lehˬ cuˇ yiˍ cawˬ paˍ awˬ pon a sha‸ te‸ piˇ lawˬ ve iˉ kaˆ gʼuiˬ tuˇ hpeh‸ ve yoˬ. Ya‸ hkʼaˇ, cuˇ yiˍ maˇ cawˬ ve chaw hta‸ maˍ piˇ ve lehˬ awˬ yanˇ hta‸ hkʼe leˇ te shonˇ chehˇ ve yoˬ.

23Cuˇ yiˍ cawˬ ve chaw lehˬ tawˇ maˇ yaw sheˍ htaˇ dawˇ nyi puiˉ ve yoˬ. Yawˇ hui yaw tawˆ la ve tawˇ lehˬ, shu awˬ pon awˬ bon cawˬ ve tawˇ hpeh‸ ve yoˬ.

24Na sha ve tawˇ lehˬ pehˇ gʼuiˬ hkʼe hpeh‸ ve yoˬ. Maw‸ kʼaw hkʼaw mehˬ jaˇ leh, awˬ to awˬ pon awˬ gʼaˇ awˬ shaˉ hpeh‸ ve yoˬ.

25Cawˇ ve yoˬ, teh‸ nawˬ dawˇ taˍ ve ya‸ kʼaw lehˬ, nawˬ hta‸ suh kuiˬ lo shiˍ kʼai laˇ puiˉ ve yoˬ.

26Kanˉ te paˍ lehˬ caˇ tuˬ heuˆ gaˇ ve pa taw kanˉ gʼaˇ hte‸ te ve yoˬ. Awˬ lawn kʼo, yawˇ maˇ gʼa meu‸ jehˇ tuˬ ve hta‸ dawˇ law ve pa taw yoˬ.

27Haiˬ ve chaw lehˬ shu hta‸ ya‸ tuˬ awˬ hkʼaˇ ca puiˉ ve yoˬ. Yawˇ hui ve tawˇ teˇ hpaˍ htawˇ cha‸ chiˆ jaˇ ve yoˬ.

28Shu hta‸ ca hkʼaiˉ puiˉ ve chaw lehˬ haiˬ ve chaw hpeh‸ ve yoˬ. Yawˇ hui lehˬ sho‸ sha‸ tuˬ ca te leh, teˇ gʼaˇ leh teˇ gʼaˇ ya‸ da‸ tuˬ te ve yoˬ.

29Haiˬ ve chaw lehˬ a shu yawˇ ve awˬ chawˇ hta‸ heˍ caˇ leh, yawˇ hta‸ luˬ kuiˬ sheˆ kuiˬ lo shiˍ kʼai piˇ ve yoˬ.

30Nawˬ hta‸ gʼuiˬ maˍ laˇ leh mehˆ me‸ maˍ laˇ ve chaw hta‸ shaˍ ti‸ taˍ-o‸. Yawˇ lehˬ haiˬ ve awˬ ceuˬ hta‸ dawˇ nyi taˍ peuˬ ve yoˬ.

31Co zuhˬ ha zuhˬ ve teˇ ceuˬ lehˬ hteˇ ve cawˇ ve chaw hui hta‸piˇ tuˬ ve la‸ shawnˍ hpeh‸ ve yoˬ. Uˉ hkeh mvuh hpu ve lehˬ awˬ me‸ awˬ hponˇ cawˬ ve shi uˉ tcuh hpeh‸ ve yoˬ.

32Nyi ma nehˬ lehˍ taˍ ve chaw lehˬ awˬ gʼaˇ uiˍ ve chaw a‸ kehˉ da‸ leuˉ ve yoˬ. A shu yawˇ awˬ to hta‸ uˉ peunˍ gʼaˇ ve chaw lehˬ, venˇ lonˉ hta‸ uˉ peunˍ ve chaw a‸ kehˉ da‸ leuˉ ve yoˬ.

33Chaw yaˇ lehˬ Gʼuiˬsha ve a loˍ hta‸ shiˍ tuˬ tawˇ hte‸ nyi ve yoˬ. Ya‸ hkʼaˇ, kʼaw‸ yaw hkʼaw‸ laˇ tuˬ ve hta‸ Gʼuiˬsha ceh tiˉ shiˍ ve yoˬ.

← Chapter 15 Jump to: Chapter 17 →