Proverbs 23

Lahu Bible Edited © Thailand Bible Society and Bible Society of Myanmar, 2010, 2020.

← Chapter 22 Jump to: Chapter 24 →

1Nawˬ lehˬ chaw uiˍ geh caˇ tuˬ teˇ geh gʼa mui caˇ ve kʼo, yawˇ a shu hpeh‸ ve hta‸ dawˇ nyi-o.

2Nawˬ lehˬ caˇ hkʼeh jaˇ ve chaw hpeh‸ ve kʼo shaˍ ti‸ taˍ-o‸.

3Yawˇ caˍ laˇ ve mehˬ jaˇ ve caˇ tuˬ teˇ hpaˍ hta‸ sheˉ lai jaˇ ve nyi ma taˇ cawˬ piˇ. Yawˇ nawˬ hta‸ lawˇ nyi puiˉ ve yoˬ.

4Paw sha la tuˬ ve hta‸ uˉ hkeu‸ tcuhˉ leh taˇ gʼa‸ ca.

5Nawˬ ve hpu teˇ hpaˍ lehˬ toˍ la‸ kʼuˉ naw‸ leh teˇ hkui tiˉ poˬ hpaw-e ve aˉ ceˬ hkʼa shuˍ mehˉ kʼai puiˉ ve yoˬ.

6Tuˬ ve chaw geh awˍ taˇ mui caˇ. Yawˇ caˍ laˇ ve caˇ tuˬ hta‸ ka‸ taˇ sheˉ lai.

7Yawˇ lehˬ, Awˍ caˇ la-o, teh‸ kʼoˆ ve htawˇ awˬ tehˬ awˬ na caˍ laˇ gaˇ ve maˇ heˆ. Yawˇ dawˇ taˍ ve hkʼe yawˇ awˬ to htawˇ oˇ hkʼe hpeh‸ ve yoˬ.

8Nawˬ caˇ keu taˍ ve teˇ hpaˍ hta‸ kʼaw‸ hpe‸ baˬ leh, nawˬ yaw ve tawˇ teˇhpaˍ htawˇ hkʼe leˇ hpeh‸ tuˬyoˬ.

9Chaw luˬ paˍ hta‸ da‸ ve tawˇ taˇ ca yaw maˍ piˇ. Yawˇ ha‸ yuˬ gʼa tuˬ ve maˇ heˆ.

10Nawˬ puˍ nawˬ pi hui piˇ taˉ laˇ ve miˬ tcuhˉ hta‸ taˇ yuˬ jiˆ. Yaˇcuˬshi teˇ hpaˍ ve miˬguiˬ hta‸ htawˇ taˇ ca hiˉ yuˬ.

11Gʼuiˬsha lehˬ yawˇ hui hpawˇ chehˇ leh nawˬ hta‸ suhˉ te laˇ tuˬ yoˬ.

12Saˍla‸ teˇ hpaˍ maˍ laˇ ve tawˇ hta‸ na leh hkʼa deh‸ henˇ yuˬ-o‸.

13Yaˇ ehˉ teˇ hpaˍ hta‸ jaw‸ maˍ piˇ-oˆ. Oˇ hkʼe te ve pa taw, yaˇ oˇ ve suh-e tuˬ ve maˇ heˆ.

14Yawˇ ve a sha‸ hta‸ htaiˍ hkʼaw‸ piˇ ve yoˬ.

15Yaˇ paˍ-oˬ, nawˬ cuˇ yiˍ cawˬ la ve kʼo ngaˬ ha lehˬ jaˇ tuˬ yoˬˬ

16Nawˬ cuˇ yiˍ cawˬ ve tawˇ yaw chehˇ ve hta‸ ngaˬ gʼa kaˇ ve kʼo, ngaˬ nyi hkʼaˇ suh jaˇ tuˬ yoˬ.

17Venˇbaˆ cawˬ ve chaw hui hta‸ nyi leh yawˇ hui hkʼe hpeh‸ gaˇ ve nyi ma taˇ cawˬ piˇ. Gʼuiˬsha hta‸ yawˆ yan puiˉ ve nyi ma cawˬ piˇ-oˆ.

18Oˇ hkʼe te ve kʼo, awˬ gʼuˇ suhˍ hpawˇ nawˬ ve ya‸ kʼaw awˬ gʼeuˆ ba lehˍ cawˬ tuˬ yoˬ.

19Ngaˬ yaˇ paˍ-oˬ, na sheˍ. Cuˇ yiˍ cawˬ leh nawˬ kʼai chehˇ ve ya‸ kʼaw hta‸ hkʼa deh‸ dawˇ nyi-o.

20A pehˉ meuˇ gʼuiˬ dawˬ ponˬ dawˬ leuˉ leh caˇ leuˉ dawˬ leuˉ ve chaw hta‸ awˬ chawˇ taˇ te.

21Tzuhˬ dawˬ bvuhˆ ve chaw lehˬ, haˍ gʼawˇ kʼai tuˬ yoˬ. Nawˬ lehˬ zuh‸ caˇ ve tiˉ te chehˇ ve kʼo, maˇ maw maw tzuh‸ keu ve veu‸kʼaˇ hta‸ nawˬ gʼa veu‸ deh tuˬ yoˬ.

22Nawˬ pa ve tawˇ hta‸na yuˬ-o‸. Yawˇ maˇ heˆ kʼo nawˬ cawˬ la maˇ gʼa. Nawˬ ve awˬ e mawˇ la ve teˇ yanˇ, yawˇ hta‸ taˍ uiˍ taˍ mvuh piˇ-oˆ.

23Hteˇ ve cawˇ ve, cuˇ yiˍ maˍ yiˍ, henˇ yuˬ ve, leh da‸ ve awˬ ceuˬ chi teˇ hpaˍ hta‸ vuiˬ yuˬ cawˇ ve yoˬ. Hawˇ baˬ ve maˇ te cawˇ.

24Hteˇ ve cawˇ ve chaw hui ve awˬ pa lehˬ, ha lehˬ tuˬ cawˬ ve yoˬ. Cuˇ yiˍ cawˬ ve yaˇ paˍ teˇ gʼaˇ ve awˬ pa htawˇ, ha lehˬ tuˬ cawˬ ve yoˬ.

25Nawˬ pa nawˬ e lehˬ nawˬ hta‸ pa taw ha lehˬ tuˬ cawˬ piˇ-oˆ. Nawˬ e hta‸ oˇ hkʼe ve ha lehˬ tuˬ piˇ-oˆ.

26Yaˇ paˍ-oˬ, hkʼa deh‸ na yuˬ-o‸. Ngaˬa sha‸ te‸ chehˇ ve lehˬ, nawˬ awˬ pon henˇ kuiˬ jawˬ kuiˬ hpeh‸ piˇ-oˆ.

27Meh maˬ lanˉ leh awˬ liˇ awˬ hkʼaˇ maˇ da‸ ve yaˇ miˇ lehˬ, suh piˇ lawˬ gʼa ve va hta‸ shuˍ ve yoˬ.

28Yawˇ hui lehˬ chaw hkʼawˇ hkʼa shuˍ, nawˬ hta‸ law chehˇ leh, chaw laiˉ gʼaˇ hta‸ ka ti‸ maˇ yeˬ ve chaw hpeh‸ la piˇ lawˬ peuˬ.

29Tzuhˬ dawˬ maˇ ve chaw teˇ gʼaˇ ngaˬ hta‸ maˍ laˇ-oˆ. Oˇ hkʼe te ve kʼo, hkʼaˬ htaˆ ka‸ dawˇ haˍ hpeh‸ bawˬ leh shu hta‸ ca ya‸ toˇ chehˇ ve chaw teˇ gʼaˇ ngaˬ nawˬ hta‸ maˍ laˇ tuˬ yoˬ.

30Yawˇ ve mehˆ shiˍ lehˬ hkʼaˬ htaˆ ka‸ nyiˉ-ehˍ cawˬ leh, awˬ to hkʼa peu-eˬ hkʼaw kuiˬ naˬ kuiˬ hkʼa biˇ cawˬ ve yoˬ.

31Tzuhˬ teˇ ceuˬ lehˬ awˬ sheuˉ hkʼaˬ ma da‸ hkʼaˬ ma nyi sha ve htawˇ, nawˬ hta‸ taˇ beˬ gʼa piˇ lawˬ.

32Shawˉ pawˍ mvuhˇ htiˇ la ve kʼo, tzuhˬ oˇ ve lehˬ nawˬ hta‸ vuiˬ htawˆ ve hkʼe naˬ jaˇ piˇ lawˬ tuˬ yoˬ.

33Nawˬ mehˆ shiˍ hkʼa deh‸ ngaˉ maˇ gaˬ leh, hkʼa deh‸ dawˇ nyi maˇ gʼa. Tawˇ ka‸ yaw maˇ gʼa.

34Nawˬ lehˬ laˇ tsuhˇ gʼuiˬ hkʼoˆ te toˇ chehˇ ve hkʼe hpeh‸ leh, gʼuiˬ baˇ hkʼoˆ taˆ taˆ ya‸ ya‸ te chehˇ ve haw lo‸ kʼoˍ hkʼe hpeh‸ tuˬ yoˬ.

35Shu ngaˬ hta‸ dawˆ laˇ ve hta‸ htawˇ ngaˬ maˇ jawˬ. Aˬ hto‸ ma pa taw ngaˬ maˇ nawˇ la ve le. Ngaˬ tzuhˬ teˇ pawˆ kʼaw‸ dawˬ gaˇ sheˍ ve yoˬ, teh‸ nawˬ kʼoˆ tuˬ yoˬ.

← Chapter 22 Jump to: Chapter 24 →