Proverbs 22

Lahu Bible Edited © Thailand Bible Society and Bible Society of Myanmar, 2010, 2020.

← Chapter 21 Jump to: Chapter 23 →

1Shu nawˬ hta‸ da‸ ve awˬ meh leh hpu shi mawˇ jeˬ hta‸ leuˆ yuˬ tcuh laˇ ve kʼo, da‸ ve awˬ meh hta‸ leuˆ yuˬ-o‸.

2Paw sha ve chaw leh haˍ gʼawˇ ve chaw hta‸ htawˇ, Gʼuiˬsha te hpanˍ taˍ ve yoˬ.

3Dawˇ nyi puiˉ ve chaw lehˬ kawˆ tuˬ dawˇ haˍ tuˬ gaˬ la chehˇ ve hta‸ mawˬ leh, jaw kʼai puiˉ ve yoˬ. Maˇ dawˇ nyi puiˉ ve chaw lehˬ gʼuˇ suhˍ kʼai leh dawˇ haˍ tuˬ hta‸ gʼa hpuˇ ve yoˬ.

4Gʼuiˬsha hta‸ yawˆ yan leh nyi ma nehˬ lehˍ taˍ-o‸. Oˇ hkʼe te ve kʼo nawˬ paw sha ve, awˬ me‸ awˬ hponˇ, leh co zuhˬ ha zuhˬ cawˬ tuˬ yoˬ.

5Nawˬ ve a sha‸ hta‸ nawˬ ha‸ ve kʼo, haiˬ ve chaw hta‸ hpeh yuˬ tuˬ ya‸ kʼaw hpuiˇ lo htaw taˍ ve va hta‸ jaw kʼai-o.

6Yaˇ ehˉ teˇ gʼaˇ hkʼaˬ hkʼe a sha‸ te‸ cawˇ ve yawˇ hta‸ maˍ piˇ-oˆ. Yawˇ a sha‸ te‸ chehˇ ve teˇ co-e awˬ lawn oˇ ve hta‸ dawˇ nawˇ chehˇ tuˬ yoˬ.

7Haˍ gʼawˇ ve chaw lehˬ paw sha paˍ ve awˬ ceˬ hpeh‸ ve yoˬ. Shu geh hpu ca chiˇ ve chaw lehˬ, hpu chiˇ piˇ shehˍ hpaˇ ve awˬ ceˬ hpeh‸ ve yoˬ.

8Nawˬ lehˬ maˇ hteˇ maˇ cawˇ ve awˬ yawˇ hta‸ sheˍ ve kʼo, luˬ ve sheˆ ve awˬ ceuˬ yeˬ tawˆ la tuˬ yoˬ. Shu hta‸ fawˉ mehˍ gaˇ ve nyi ma htawˇ mehˉ kʼai tuˬ yoˬ.

9Haˍ gʼawˇ ve chaw hui hta‸ ha lehˬ ha kʼa caˇ tuˬ pehˬ caˍ piˇ-oˆ. Oˇ hkʼe te ve kʼo nawˬ awˬ bon gʼa tuˬ yoˬ.

10Maˇ da‸ ve dawˇ hkʼaˇ cawˬ ve chaw geh tawˆ kʼai-o. Oˇ hkʼe te ve kʼo tawˇ gʼawˬ da‸ ve leh ya‸ da‸ jiˆ da‸ ve mehˉ kʼai tuˬ yoˬ.

11Nawˬ ve nyi ma da‸ kehˬ leh na sha ve tawˇ yaw puiˉ ve kʼo, nawˬ lehˬ jawˇmawˇ ve awˬ chawˇ hpeh‸ la tuˬ yoˬ.

12Gʼuiˬsha lehˬ hteˇ ve cawˇ ve chaw hta‸ ha‸ shaˉ piˇ leh, haiˬ ve chaw hui ve dawˇ hkʼaˇ hta‸ te luˬ piˇ ve yoˬ.

13Bawˬ ve chaw lehˬ aˉ hkʼaw lo tiˉ chehˇ taˍ ve yoˬ. Yawˇ awˬ baˬ hpawˇ tawˆ-e kʼo laˇ che‸ la, teh‸ kʼoˆ ve yoˬ.

14Haˉ chawˇ haˉ paˆ te ve teˇ ceuˬ lehˬ va hta‸ shuˍ ve yoˬ. Gʼuiˬsha nyi ma zuhˆ ve chaw lehˬ, va oˇ ve hta‸ yaw ve yoˬ.

15Yaˇ ehˉ teˇ hpaˍ lehˬ hko jaˇ leh, laiˉ ceuˬ te puiˉ ve yoˬ. Ya‸ hkʼaˇ, yawˇ hui hta‸ jaw‸ maˍ piˇ ve kʼo, hkʼaˬ hkʼe te cawˇ ve hta‸ shiˍ la ve yoˬ.

16Paw sha ve chaw hui hta‸ la‸ shawnˍ te piˇ ve chaw, maˇ heˆ kʼo, haˍ gʼawˇ ve chaw hta‸ nyiˉ caˇ leh paw sha la tuˬ te ve chaw lehˬ haˍ gʼawˇ kʼai tuˬ yoˬ.

17Na taˍ sheˍ. Cuˇ yiˍ cawˬ ve chaw hui kʼoˆ taˍ ve tawˇ ngaˬ nawˬ hui hta‸ kʼoˆ maˍ laˇ shaˍ. Yawˇ hui maˍ laˇ ve teˇ hpaˍ hta‸ henˇ yuˬ-o‸.

18Nawˬ lehˬ tawˇ oˇ ve teˇ hpaˍ hta‸ dawˇ nawˇ chehˇ ve kʼo, gʼa ha lehˬ tuˬ yoˬ.

19Nawˬ hui Gʼuiˬsha hta‸ gʼaˇ va tcuh piˇ lawˬ gaˇ ve yoˬ. Chi hta‸ pa taw, tawˇ oˇ ve teˇ hpaˍ ngaˬ nawˬ hui hta‸ kʼoˆ maˍ laˇ gaˇ ve yoˬ.

20Cuˇ yiˍ cawˬ ve tawˇ 30 hkawˇ hta‸ ngaˬ bvuh‸ keu taˍ ve yoˬ. Oˇ ve teˇ hpaˍ lehˬ cuˇ yiˍ tawˇ hkawˇ leh, da‸ ve dawˇ hkʼaˇ piˇ laˇ ve tawˇ teˇ hpaˍ hpeh‸ ve yoˬ.

21Hteˇ ve cawˇ ve lehˬ hkʼaˬ hkʼe ve awˬ ceuˬ hpeh‸ ve nawˬ hui hta‸ maˍ laˇ tuˬ yoˬ. Nawˬ hui hta‸ hpehˇ peu leh awˬ ceuˬ oˇ ve hta‸ gʼa‸ ca tcuh ve kʼo, nawˬ hui lehˬ cawˇ ve awˬ ceuˬ hta‸ ca gʼa tuˬ yoˬ.

22Haˍ gʼawˇ ve chaw leh shaˉ nanˉ lo suhˉ ca jehˬ la ve dawˇ maˇ tawˆ ve chaw hui hta‸ heˍ caˇ ve taˇ te.

23Gʼuiˬsha lehˬ yawˇ hui hpawˇ chehˇ leh tawˇ yaw tuˬ yoˬ. Yawˇ hui hta‸ ho piˇ ve chaw hta‸ Yawˇ kʼaw‸ ho piˇ tuˬ yoˬ.

24Nyi ma zuhˆ puiˉ, beu‸ puiˉ ve chaw hta‸ awˬ chawˇ taˇ te.

25Nawˬ awˬ chawˇ te ve kʼo yawˇ hui hkʼe hpeh‸ la leh nawˬve nyi ma hta‸ kʼaw‸ pa gʼa tuˬ ve maˇ heˆ.

26Shu ve jeˬ hta‸ gʼa ga shaiˍ piˇ tuˬ ka ti‸ taˇ te.

27Nawˬ gʼa ga shaiˍ piˇ maˇ gʼa kʼo, yawˇ hui lehˬ nawˬ ve zuh‸ hpui hta‸ htawˇ yuˬ kʼai tuˬ yoˬ.

28Nawˬ puˍ nawˬ pi hui piˇ taˉ laˇ ve miˬ tcuhˉ hta‸ taˇ yuˬ jiˆ.

29Da‸ ve kanˉ hta‸ tiˉ te ve chaw ngaˬ hta‸ maˍ laˇ-oˆ. Oˇ hkʼe te ve kʼo, shu a‸ kehˉ da‸ leh jawˇmawˇ hta‸ awˬ chawˇ te keunˍ ve chaw ngaˬ nawˬ hta‸ maˍ laˇ tuˬ yoˬ.

← Chapter 21 Jump to: Chapter 23 →