Proverbs 18

Lahu Bible Edited © Thailand Bible Society and Bible Society of Myanmar, 2010, 2020.

← Chapter 17 Jump to: Chapter 19 →

1Shu hta‸ awˬ chawˇ maˇ te puiˉ ve chaw lehˬ a shu yawˇ awˬ to awˬ lawn ceh tiˉ dawˇ nyi ve chaw hpeh‸ ve yoˬ. Chaw hkʼa peu-eˬ nyi ma cawˇ ve kanˉ hta‸ yawˇ maˇ dawˇ cawˇ ve chaw hpeh‸ ve yoˬ.

2Chaw luˬ paˍ lehˬ yawˇ shiˍ ve, maˇ shiˍ ve hta‸ maˇ dawˇ nyi. Yawˇ hkʼaˬ ma cheuˬ ve shu hta‸ maˍ piˇ gaˇ ve yoˬ.

3Venˇbaˆ leh ya‸ taw tuˬ teˇ geh kʼai ve yoˬ. Nawˬ awˬ me‸ awˬ hponˇ luˬ kʼai ve kʼo, shu kʼoˆ guiˇ gʼuiˬ guiˇ ve hta‸ gʼa hkanˍ tuˬ yoˬ.

4Chaw teˇ gʼaˇ yaw ve tawˇ lehˬ cuˇ yiˍ maˍ yiˍ ve awˬ hkuiˉ puiˍ hpeh‸ la puiˉ ve yoˬ. Oˇ ve lehˬ laˇ tsuhˇ gʼuiˬ hkʼe naˉ leh, iˉ kaˆ lawˬ hkʼe kehˬ lehˍ cawˬ puiˉ ve yoˬ.

5Venˇbaˆ cawˬ ve chaw hpawˇ chehˇ leh, te‸ chiˉ ya‸ kuiˬ maˇ cawˬ ve chaw hta‸ ciˍ yanˍ piˇ ve lehˬ maˇ cawˇ.

6Shu geh tawˇ ca gʼawˬ da‸ ve chaw luˬ paˍ lehˬ, shu jaw‸ ve hta‸ gʼa hkanˍ tuˬ yoˬ.

7Chaw luˬ paˍ yaw ve tawˇ lehˬ yawˇ awˬ to hta‸ yawˇ te luˬ chehˇ ve yoˬ. Yawˇ ve tawˇ hta‸ pa taw yawˇ gʼa hkanˍ ve yoˬ.

8Shu ve awˬ lawn ca kʼoˆ ve teˇ ceuˬ lehˬ awˬ hkui cawˬ jaˇ ve yoˬ. Ngaˬ hui hkʼaˬ ma hehˆ dawˬ nyi gaˇ ve le.

9Bawˬ ve chaw lehˬ shu hta‸ te luˬ puiˉ ve chaw hkʼa shuˍ luˬ jaˇ ve yoˬ.

10Gʼuiˬsha lehˬ yeˬ jaˇ ve ta‸ yehˬ hkʼe hpeh‸ ve yoˬ. Oˇ kaˬ lo hteˇ ve cawˇ ve chaw teˇ hpaˍ kʼai leh, gʼaˇ ca jehˇ hpeh‸ ve yoˬ.

11Paw sha ve chaw teˇ hpaˍ lehˬ yawˇ hui ve hpu shi mawˇ jeˬ, yawˇ hui hta‸ yeˬ jaˇ ve lanˇ venˇ hkʼa shuˍ ha‸ shaˉ laˇ gʼa tuˬ yoˬ, teh‸ dawˇ chehˇ ve yoˬ.

12Nyi ma nehˬ lehˍ taˍ puiˉ ve chaw maˇ heˆ kʼo, awˬ nu ve chaw hta‸ chaw teˇ gʼaˇ ka‸ maˇ taˍ uiˍ piˇ. Nyi ma uiˍ ve chaw lehˬ luˬ kuiˬ lo kʼai chehˇ ve yoˬ.

13Nawˬ maˇ yaw hkʼaw‸ piˇ sheˍ htaˇ hkʼa deh‸ na sheˍ. Oˇ hkʼe maˇ te ve kʼo, nawˬ lehˬ chaw luˬ paˍ hpeh‸ ve yoˬ.

14Ha lehˬ puiˉ ve nyi ma lehˬ naˬ chehˇ ve chaw hta‸ chehˇ sha la piˇ leh, nyi ma oˇ ve maˇ cawˬ ve chaw lehˬ dawˇ law tuˬ mehˉ kʼai ve yoˬ.

15Cuˇ yiˍ cawˬ ve chaw lehˬ hkʼaˬ htaˆ ka‸ henˇ yuˬ gaˇ puiˉ ve nyi ma cawˬ ve yoˬ.

16Chaw uiˍ teˇ gʼaˇ hta‸ nawˬ hpuˇ da‸ gaˇ laˇ. La‸ shawnˍ teˇ ceuˬ ceuˬ yuˬ kʼai piˇ ve kʼo, hkʼa sha sha-ehˬ mawˬ da‸ hpeh‸ ve yoˬ.

17Shaˉnanˉ hkʼaw lo awˉ lawˉ peuˇ yaw ve chaw teˇ gʼaˇ ve tawˇ lehˬ cawˇ ve hta‸ shuˍ ve htawˇ awˬ hkʼaw‸ nawˉ kʼaw‸ yaw tuˬ sheˍ ve chaw teˇ gʼaˇ ve tawˇ hta‸ ka‸ na cawˇ sheˍ ve yoˬ.

18Kanˇ paˆ cawˬ ve chaw nyiˇ gʼaˇ shaˉ nanˉ lo laˬ leh tawˇ te da‸ la ve kʼo, mehˇ hkaˆ leh suhˉ jehˬ cheˆ piˇ hpeh‸ ve yoˬ.

19Nawˬ ve awˬ nyi paˍ hta‸ ga piˇ-oˆ. Oˇ hkʼe te ve kʼo, yawˇ lehˬ yeˬ jaˇ ve ta‸ yehˬ hkʼa shuˍ nawˬ hta‸ ha‸ shaˉ laˇ tuˬ yoˬ. Nawˬ yawˇ hta‸ ca ya‸ ve kʼo, yawˇ nawˬ hta‸ nyi laˇ tuˬ ve maˇ heˆ.

20Chaw yaˇ lehˬ a shu yawˇ dawˇ leh kʼoˆ taˍ ve hkʼe gʼa caˇ ve yoˬ.

21Nawˬ kʼoˆ taˍ ve tawˇ lehˬ nawˬ hta‸ te‸ chehˇ tuˬ maˇ kʼoˆ, luˬ kʼai tuˬ maˇ kʼoˆ, te laˇ gʼa ve yoˬ. Chi hta‸ pa taw nawˬ kʼoˆ taˍ ve hkʼe hpeh‸ la ve awˬ ceuˬ hta‸ nawˬ gʼa ha‸ yuˬ ve yoˬ.

22Awˬ miˇ ma ca gʼa ve chaw lehˬ da‸ ve awˬ ceuˬ hta‸ ca gʼa taˍ ve yoˬ. Chi ve lehˬ Gʼuiˬsha yawˇ awˬ pon dawˇ nyi piˇ ve awˬ heˆ hpeh‸ ve yoˬ.

23Haˍ gʼawˇ ve chaw lehˬ tawˇ nuˇ lehˍ yaw puiˉ ve yoˬ. Ya‸ hkʼaˇ, paw sha ve chaw lehˬ tawˇ hehnˇ chaweh yaw puiˉ ve yoˬ.

24Chaw teˇ hpaˍ hpaˍ awˬ chawˇ te da‸ ve maw maw maˇ yeˬ. Ya‸ hkʼaˇ, chaw teˇ hpaˍ hpaˍ awˬ chawˇ te da‸ ve lehˬ, awˬ viˉ awˬ nyi a‸ kehˉ ka ti‸ yeˬ puiˉ ve yoˬ.

← Chapter 17 Jump to: Chapter 19 →