Proverbs 28

Lahu Bible Edited © Thailand Bible Society and Bible Society of Myanmar, 2010, 2020.

← Chapter 27 Jump to: Chapter 29 →

1Haiˬ ve chaw lehˬ chaw teˇ gʼaˇ ka‸ maˇ gʼa‸ yuˬ ve htawˇ, gʼaˇ hte‸ gʼuiˇ hpaw toˇ chehˇ ve yoˬ. Ya‸ hkʼaˇ, hteˇ ve cawˇ ve chaw lehˬ laˇ caˬ shiˉ hkʼa shuˍ ha‸ hanˉ jaˇ ve yoˬ.

2Chaw ceuˬ teˇ ceuˬ venˇbaˆ cawˬ ve teˇ yanˇ, jawˇmawˇ teˇ gʼaˇ peuˬ teˇ gʼaˇ taˆ la ve yoˬ. Ya‸ hkʼaˇ, cuˇ yiˍ cawˬ leh dawˇ nyi puiˉ ve awˬ hoˉ awˬ naˬ teˇ hpaˍ lehˬ, mvuhˇmiˬ hta‸ awˬ gʼaˇ uiˍ la yeˍ la piˇ ve yoˬ.

3Haˍ gʼawˇ ve chaw hui hta‸ fawˉ mehˍ ve jawˇmawˇ lehˬ, caˬ yeˬ hta‸ te luˬ ve mvuhˇ yeˬ hta‸ shuˍ ve yoˬ.

4Awˬliˇtawˇhkawˇ hta‸ maˇ na yuˬ ve chaw lehˬ, haiˬ ve chaw hpawˇ chehˇ ve chaw hpeh‸ ve yoˬ. Na yuˬ ve chaw lehˬ haiˬ ve chaw hta‸ tawˍ taˍ ve chaw hpeh‸ ve yoˬ.

5Haiˬ ve chaw lehˬ, hteˇ ve cawˇ ve awˬ ceuˬ hta‸ maˇ shiˍ. Ya‸ hkʼaˇ, Gʼuiˬsha hta‸ oˉ kʼoˍ pui ve chaw lehˬ hteˇ ve cawˇ ve awˬ ceuˬ hta‸ shiˍ ve yoˬ.

6Haˍ gʼawˇ ve htawˇ hteˇ ve cawˇ ve chaw lehˬ, paw sha jaˇ ve htawˇ maˇ hteˇ maˇ cawˇ ve chaw a‸ kehˉ da‸ leuˉ ve yoˬ.

7Awˬliˇtawˇhkawˇ hta‸ na yuˬ puiˉ ve yaˇ nehˬ lehˬ, cuˇ yiˍ cawˬ ve yoˬ. Te‸ chiˉ tcuhˉ kuiˬ maˇ cawˬ ve chaw hta‸ awˬ chawˇ te ve chaw lehˬ, yawˇ awˬ pa awˬ me‸ awˬ hponˇ hta‸ te luˬpiˇ ve chaw hpeh‸ ve yoˬ.

8Shu hta‸ nyiˉ caˇ leh paw sha la ve chaw hui ve hpu shi mawˇ jeˬ lehˬ, haˍ gʼawˇ ve chaw hta‸ ga piˇ puiˉ ve chaw hui ve mawˇ jeˬ kʼaw‸ hpeh‸ la tuˬ yoˬ.

9Awˬliˇtawˇhkawˇ hta‸ maˇ na yuˬ ve chaw hui ve bon lawˬ hkawˇ hta‸ Gʼuiˬsha canˇ ve yoˬ.

10Hteˇ ve cawˇ ve chaw hta‸ ca beˬ leh haiˬ ve kanˉ te tcuh ve chaw lehˬ, a shu yawˇ htaw taˍ ve va hta‸ yaw tuˬ yoˬ. Te‸ chiˉ ya‸ kuiˬ maˇ cawˬ ve chaw lehˬ la‸ shawnˍ gʼa tuˬ yoˬ.

11Paw sha ve chaw lehˬ yawˇ hui cuˇ yiˍ cawˬ ve yoˬ, teh‸ ca dawˇ puiˉ ve yoˬ. Ya‸ hkʼaˇ, awˬ liˇ awˬ hkʼaˇ da‸ ve haˍ ve gʼawˇ ve chaw lehˬ leuˉ leh shiˍ puiˉ ve nyi ma cawˬ ve yoˬ.

12Da‸ ve chaw teˇ hpaˍ aˉ yaˇ uiˍ ve hta‸ gʼa ve teˇ yanˇ, chaw yaˇ teˇ hpaˍ ha lehˬ ve yoˬ. Ya‸ hkʼaˇ, haiˬ ve chaw uˉ peunˍ ve teˇ yanˇ, chaw yaˇ teˇ hpaˍ ca hpaw va‸ taˍ ve yoˬ.

13A shu yawˇ ve venˇbaˆ hta‸ faˉ taˍ ve chaw lehˬ, da‸ la uiˍ la kuiˬ maˇ cawˬ. Venˇbaˆ oˇ ve teˇ hpaˍ hta‸ gʼa dawˇ hpfuhˆ leh gʼa yuˬ baˬ ve yoˬ. Oˇ hkʼe te ve chaw hta‸ Gʼuiˬsha ha kʼaˉ piˇ tuˬ yoˬ.

14Gʼuiˬsha ve tawˇ hkawˇ hta‸ hkʼaˬ htaˆ ka‸ na yuˬ-o‸. Oˇ hkʼe te ve kʼo, nawˬ gʼa ha lehˬ tuˬ yoˬ. Nawˬ nyi ma heh ve kʼo, luˬ kuiˬ sheˆ kuiˬ lo gʼa gaˬ tuˬ yoˬ.

15Haiˬ ve uˉ peunˍ shehˍ hpaˇ mehˆ gʼuˇ suhˍ lo, haˍ ve gʼawˇ ve chaw lehˬ, gʼaˇ va kuiˬ maˇ cawˬ leh dawˇ tui‸ jaˇ ve yoˬ. Haiˬ ve uˉ peunˍ shehˍ hpaˇ lehˬ, laˇ caˬ shiˉ leh yehˬ miˉ tawˍ hkʼa shuˍ kawˆ tuˬ cawˬ ve yoˬ.

16Da‸ ve dawˇ hkʼaˇ maˇ cawˬ ve uˉ peunˍ shehˍ hpaˇ lehˬ haiˬve chaw hpeh‸ ve yoˬ. Maˇ hteˇ maˇ cawˇ ve awˬ ceuˬ hta‸ canˇ ve uˉ peunˍ shehˍ hpaˇ lehˬ, mvuhˇmiˬ hta‸ maw maw gʼa uˉ peunˍ ve yoˬ.

17Shu hta‸ tiˇ pehˍ ve chaw lehˬ, a shu yawˇ ve tuˍ hpfuh hta‸ haˆ haˆ duˇ chehˇ ve chaw hpeh‸ ve yoˬ. Yawˇ hta‸ taˇ tawˍ taˍ.

18Hteˇ ve cawˇ ve kanˉ hta‸ tiˉ te-o. Nawˬ gawˬ lehˍ gʼa chehˇ tuˬ yoˬ. Maˇ hteˇ maˇ cawˇ ve chaw lehˬ paiˍ tuˬ yoˬ.

19Kanˉ te kaiˬ ve chaw lehˬ caˇ leuˉ dawˬ leuˉ hkʼa biˇ cawˬ ve yoˬ. Awˬ yanˇ hta‸ hkʼe leˇ yehˇ baˬ ve chaw lehˬ ciˍ yanˍ ve hta‸ gʼa hkanˍ ve yoˬ.

20Hteˇ ve cawˇ ve chaw lehˬ ha lehˬ ha kʼa gawˬ lehˍ gʼa chehˇ ve yoˬ. Haˆ haˆ paw sha la tuˬ te ve chaw lehˬ ciˍ yanˍ ve hta‸ gʼa hkanˍ ve yoˬ.

21Mehˆ hpfuhˇ nyi ve teˇ ceuˬ maˇ da‸. Suhˉ jehˬ paˍ lehˬ, i jaˇ ve la‸ shawnˍ hta‸ ceh ka‸ nyi leh kanˉ te ya‸ puiˉ ve yoˬ.

22A shu yawˇ awˬ to pon ceh dawˇnyi puiˉ ve chaw lehˬ haˆ haˆ paw sha la tuˬ ve awˬ hkʼaˇ ca puiˉ ve yoˬ. Yawˇ gʼa haˍ gʼa gʼawˇ la tuˬ ve hta‸ maˇ dawˇ mawˬ puiˉ.

23Maˍ piˇ tuˬ loˍ ve chaw hta‸ maˍ piˇ-oˆ. Chiˇ mvuh piˇ ve a‸ kehˉ maˍ piˇ ve lehˬleuˉ leh da‸ ve hta‸ awˬ hkʼaw‸ nawˉ yawˇ shiˍ la tuˬ yoˬ.

24A shu yawˇ awˬ pa awˬ e ve mawˇ hta‸ hkʼawˇ leh te‸ chiˉ venˇbaˆ maˇ cawˬ, teh‸ dawˇ ve chaw lehˬ chaw hkʼawˇ a‸ kehˉ da‸ leuˉ ve maˇ heˆ.

25A shu yawˇ awˬ to pon tiˉ ca ve chaw lehˬ dawˇ haˍ tuˬ cawˬ ve yoˬ. Gʼuiˬsha hta‸ gʼaˇ va ve teˇ ceuˬ lehˬ leuˉ leh da‸ ve yoˬ.

26A shu yawˇ ve dawˇ hkʼaˇ a loˍ awˬ hkʼaˇ suh a sha‸ te‸ ve chaw lehˬ, chaw luˬ paˍ hpeh‸ ve yoˬ. Cuˇ yiˍ cawˬ ve chaw hui maˍ laˇ ve hkʼe te kʼai cawˇ ve yoˬ.

27Haˍ ve gʼawˇ ve chaw hta‸ ga piˇ ve chaw lehˬ, teˇ pawˆ ka‸ haˍ kuiˬ gʼawˇ kuiˬ lo gʼa gaˬ tuˬ ve maˇ heˆ. Haˍ ve gʼawˇ ve chaw hta‸ maˇ ga piˇ puiˉ ve chaw hta‸ shu hpoˆ hkeu tuˬ yoˬ.

28Haiˬ ve chaw mvuhˇmiˬ hta‸ uˉ peunˍ ve teˇ yanˇ, mvuhˇ yaˇ miˬ yaˇ teˇ hpaˍ ca hpaw va‸ taˍ ve yoˬ. Ya‸ hkʼaˇ, yawˇ ce kʼai peuˬ ve teˇ yanˇ, hteˇ ve cawˇ ve chaw kʼaw‸ uˉ peunˍ tuˬ yoˬ.

← Chapter 27 Jump to: Chapter 29 →