Proverbs 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Gʼuiˬsha lehˬ maˇ hteˇ maˇ cawˇ ve tsuh tu yehˇ ve chaw hta‸ canˇ ve yoˬ. Yawˇ lehˬ cawˇ ve tsuh tu hta‸ nyi ma cawˇ ve yoˬ.

2Nyi ma uiˍ ve mvuh ve chaw lehˬ, maˇ maw maw awˬ me‸ awˬ hponˇ luˬ kʼai tuˬ yoˬ. Ya‸ hkʼaˇ, nyi ma nehˬ lehˍ taˍ ve chaw lehˬ, cuˇ yiˍ cawˬ ve chaw hpeh‸ ve yoˬ.

3Nawˬ lehˬ chaw da‸ teˇ gʼaˇ hpeh‸ ve kʼo, hteˇ ve cawˇ ve awˬ ceuˬ nawˬ hta‸ ha‸ shaˉ laˇ tuˬ yoˬ. Yonˍ maˇ gʼa ve chaw lehˬ, yawˇ te ve maˇ da‸ ve kanˉ hta‸ pa taw luˬ kʼai sheˆ kʼai tuˬ yoˬ.

4Nawˬ suh ve awˬ nyi gaˬ la htaˇ, hpu shi mawˇ jeˬ lehˬ nawˬ hta‸ te‸ chiˉ ga laˇ maˇ gʼa. Ya‸ hkʼaˇ, hteˇ ve cawˇ ve awˬ ceuˬ lehˬ nawˬ ve a sha‸ hta‸ ponˬ laˇ gʼa ve yoˬ.

5Hteˇ ve cawˇ ve awˬ ceuˬ lehˬ da‸ ve chaw hta‸ hpeh‸ sha piˇ lawˬ ve yoˬ. Ya‸ hkʼaˇ, haiˬ ve chaw lehˬ a shu yawˇ awˬ to hta‸ luˬ kʼai sheˆ kʼai tuˬ te chehˇ ve yoˬ.

6Hteˇ ve cawˇ ve awˬ ceuˬ lehˬ, da‸ ve chaw hta‸ htaiˍ hkʼaw‸ piˇ ve yoˬ. Ya‸ hkʼaˇ, yonˍ maˇ gʼa ve chaw lehˬ, lawˇ hpaˍ uiˍ ve pa taw htaw taˍ ve va hta‸ yaw ve yoˬ.

7Haiˬ ve chaw teˇ gʼaˇ suh-e ve teˇ yanˇ, yawˇ ve dawˇ law kuiˬ htawˇ yawˇ geh teˇ geh suh-e ve yoˬ. Hpu shi hta‸ gʼaˇ va ve lehˬ, te‸ chiˉ awˬ bon maˇ cawˬ.

8Hteˇ ve cawˇ ve chaw hta‸ luˬ kuiˬ sheˆ kuiˬ hkʼaw ponˬ piˇ ve yoˬ. Haiˬ ve chaw ceh tiˉ luˬ kuiˬ sheˆ kuiˬ lo gʼa gaˬ ve yoˬ.

9Gʼuiˬsha hta‸ maˇ shiˍ ve chaw hui yaw ve tawˇ hta‸ pa taw, nawˬ luˬ kuiˬ sheˆ kuiˬ lo gʼa gaˬ puiˉ ve yoˬ. Ya‸ hkʼaˇ, hteˇ ve cawˇ ve chaw hui ve cuˇ yiˍ lehˬ, nawˬ hta‸ ponˬ laˇ gʼa ve yoˬ.

10Hteˇ ve cawˇ ve chaw hui awˬ me‸ awˬ hponˇ gʼa ve teˇ yanˇ, venˇ yaˇ hkʼa peu-eˬ ha lehˬ ve yoˬ. Haiˬ ve chaw suh-e ve teˇ yanˇ, chaw yaˇ teˇ hpaˍ ha lehˬ leh kuˬ ve yoˬ.

11Hteˇ ve cawˇ ve chaw hui bon na‸ piˇ ve teˇ yanˇ yawˇ chehˇ taˍ ve venˇ uiˍ la da‸ la ve yoˬ. Ya‸ hkʼaˇ haiˬ ve chaw tawˇ yaw ve teˇ yanˇ yawˇ chehˇ taˍ ve venˇ luˬ kʼai ve yoˬ.

12Shu hta‸ hkʼa mvuhˇ hkʼa na kʼoˆ ve lehˬ, haiˬ ve awˬ ceuˬ hpeh‸ ve yoˬ. Nawˬ lehˬ da‸ ve chaw hpeh‸ ve kʼo, ta‸ iˉ gawˬ lehˍ chehˇ taˍ tuˬ yoˬ.

13Shu ve awˬ lawn ca kʼoˆ puiˉ ve chaw hta‸ yonˍ maˇ hpeh‸. Ya‸ hkʼaˇ, yonˍ hpeh‸ ve chaw hta‸ nawˬ gʼaˇ va hpeh‸ ve yoˬ.

14Dawˇ hkʼaˇ piˇ paˍ maˇ cawˬ kʼo, mvuhˇmiˬ luˬ kʼai ve yoˬ. Dawˇ hkʼaˇ piˇ paˍ maˇ ve kʼo, mvuhˇ miˬ gawˬ ve yoˬ.

15Shu ve jeˬ hta‸ ga shaiˍ tuˬ nawˬ ka ti‸ te taˍ ve kʼo, nawˬ kʼaw‸ dawˇ nawˇ la tuˬ yoˬ. Nawˬ oˇ hkʼe maˇ te taˍ ve kʼo leuˉ leh da‸ ve yoˬ.

16Shiˍ puiˉ ve yaˇ miˇ hta‸ shu taˍ uiˍ ve yoˬ. Ya‸ hkʼaˇ, chehˇ maˇ puiˉ ve yaˇ miˇ lehˬ awˬ me‸ awˬ hponˇ maˇ cawˬ. Bawˬ ve chaw lehˬ hpu maˇ cawˬ. Ya‸ hkʼaˇ, coˇ caˇ puiˉ ve chaw lehˬ paw sha la ve yoˬ.

17Nawˬ lehˬ ha kʼaˉ puiˉ ve chaw hpeh‸ ve kʼo, nawˬ awˬ to hta‸ nawˬ awˬ bon te piˇ chehˇ ve yoˬ. Ya‸ hkʼaˇ, nawˬ lehˬ haiˬ ve chaw hpeh‸ ve kʼo, nawˬ awˬ to hta‸ nawˬ naˬ tuˬ te chehˇ ve yoˬ.

18Haiˬ ve chaw lehˬ te‸ chiˉ maˇ gʼa puiˉ. Ya‸ hkʼaˇ, nawˬ lehˬ da‸ ve kanˉ hta‸ te ve kʼo, la‸ shawnˍ gʼa tuˬ yoˬ.

19Da‸ ve kanˉ hta‸ tiˉ te tuˬ dawˇ cheˆ taˍ ve chaw lehˬ, a sha‸ gʼa te‸ chehˇ tuˬ yoˬ. Ya‸ hkʼaˇ, haiˬ ve kanˉ hta‸ te tuˬ tiˉ dawˇ nyi chehˇ ve chaw lehˬ, gʼa suh tuˬ yoˬ.

20Gʼuiˬsha lehˬ haiˬ ve nyi ma cawˬ ve chaw hta‸ canˇ ve yoˬ. Ya‸ hkʼaˇ, da‸ ve kanˉ te ve chaw hta‸ Yawˇ ha‸ ve yoˬ.

21Haiˬ ve chaw lehˬ ciˍ yanˍ ve hta‸ gʼa hkanˍ tuˬ yoˬ. Ya‸ hkʼaˇ, hteˇ ve cawˇ ve chaw lehˬ gʼa ponˬ tuˬ yoˬ.

22Yaˇ miˇ teˇ gʼaˇ lehˬ hkʼaˬ ma awˬ hkiˇ awˬ naˬ da‸ jaˇ ve htawˇ shiˍ puiˉ ve nyi ma maˇ cawˬ ve kʼo, va‸ naˍ hkʼawˇ hta‸ tcuhˉ piˇ taˍ ve shi la‸ peˍ hkʼe hpeh‸ ve yoˬ.

23Da‸ ve chaw teˇ hpaˍ lehˬ hkʼaˬ htaˆ ka‸ da‸ ve awˬ ceuˬ hta‸ gʼa ve yoˬ. Haiˬ ve chaw teˇ gʼaˇ yawˇ loˍ ve mawˇ hta‸ gʼa ve teˇ yanˇ, chaw hkʼa peu-eˬnyi ma zuhˆ ve yoˬ.

24Chaw teˇ hpaˍ hpaˍ hpu yehˇ maˇ jaˇve htawˇ, paw sha jaˇ chehˇ sheˍ ve yoˬ. Chaw teˇ hpaˍ hpaˍ hpu shawˍ yehˇ puiˉ jaˇ ve htawˇ, haˍ gʼawˇ chehˇ sheˍ ve yoˬ.

25Shu hta‸ ha lehˬ ha kʼa tanˇ piˇ-oˆ. Oˇ hkʼe te ve kʼo, nawˬ uiˍ la da‸ la tuˬ yoˬ. Shu hta‸ ga piˇ-oˆ. Oˇ hkʼe te ve kʼo, shu nawˬ hta‸ kʼaw‸ ga laˇ tuˬ yoˬ.

26Caˬ shiˍ shaw hpoˆ taˍ leh awˬ hpfuhˇ hkʼaˆ la tuˬ ve hta‸ law chehˇ ve chaw hta‸ shu hpoˆ hkeu tuˬ yoˬ. Ya‸ hkʼaˇ, caˬ shiˍ yuˬ tawˆ leh hawˇ ve chaw hta‸ yawˇ hui chiˇ mvuh ve yoˬ.

27Nawˬ ve dawˇ hkʼaˇ da‸ ve kʼo, shu nawˬ hta‸ taˍ uiˍ taˍ mvuh tuˬ yoˬ. Shu luˬ kʼai tuˬ nawˬ te ve kʼo, nawˬ awˬ to luˬ kʼai tuˬ yoˬ.

28A shu yawˇ ve hpu shi mawˇ jeˬ hta‸ gʼaˇ va ve chaw lehˬ mvuhˇ kaˆ yanˇ htaˇ piˬ ce kʼai ve suhˆ hpa‸ hkʼe hpeh‸ ve yoˬ. Ya‸ hkʼaˇ, hteˇ ve cawˇ ve chaw lehˬ mvuhˇ goˇ yanˇ htaˇ caˍ la chehˇ ve suhˆ hpa‸ hkʼa shuˍ maˇ la tuˬ yoˬ.

29A shu yawˇ ve yehˬ yaˇ kʼa yaˇ dawˇ haˍ tuˬ te ve chaw lehˬ, awˬ leh meuˇ teˇ nyi te‸ chiˉ cawˬ taˉ tuˬ ve maˇ heˆ. Chaw luˬ paˍ lehˬ hkʼaˬ htaˆ ka‸ cuˇ yiˍ cawˬ ve chaw hui ve awˬ ceˬ gʼa te tuˬ yoˬ.

30Hteˇ ve cawˇ ve lehˬ te‸ ve a sha‸ hta‸ yuˬ laˬ leh, haiˬ ve awˬ ceuˬ lehˬ a sha‸ hta‸ shonˇ kʼai piˇ ve yoˬ.

31Da‸ ve chaw lehˬ miˬguiˬ chi awˬ hkʼoˆ lo la‸ shawnˍ gʼa ve yoˬ. Ya‸ hkʼaˇ, haiˬ leh venˇbaˆ cawˬ ve chaw lehˬ, ciˍ yanˍ ve hta‸ gʼa hkanˍ ve yoˬ.

← Chapter 10 Jump to: Chapter 12 →