Proverbs 26

Lahu Bible Edited © Thailand Bible Society and Bible Society of Myanmar, 2010, 2020.

← Chapter 25 Jump to: Chapter 27 →

1Chaw luˬ paˍ hta‸ chiˇmvuh piˇ ve lehˬ, mvuhˇ goˇ yanˇ ciˍ gʼuiˬ kʼa ve, leh caˬ gʼeu‸ htaˇ mvuhˇ yeˬ laˬ ve hkʼe hkanˍ haˍ jaˇ ve awˬ ceuˬ hpeh‸ ve yoˬ.

2Hkeu ve teˇ ceuˬ lehˬ maˇ keunˍ ve chaw hta‸ te‸ chiˉ luˬ tuˬ te piˇ maˇ gʼa. Poˬ caw toˇ leh teˇ pawˆ ka‸ maˇ ca mui ve ngaˇ hkʼe hpeh‸ ve yoˬ.

3Iˉ mvuhˇ hta‸ gʼa jaw‸ maˍ piˇ leh, piˉlaˬ hta‸ aˉ caˆ hkeh gʼa hpeh piˇ ve hkʼe, chaw luˬ paˍ hta‸ gʼa jaw‸ maˍ piˇ ve yoˬ.

4Nawˬ lehˬ tcuhˉ kuiˬ maˇ cawˬ ve na nyi hkawˇ hta‸ kʼaw‸ yaw hkʼaw‸ piˇ ve kʼo, nawˬ ka‸ na nyi laˇ shehˍ hpaˇ hkʼa shuˍ tcuhˉ kuiˬ maˇ cawˬ ve chaw hpeh‸ ve yoˬ.

5Tcuhˉ kuiˬ maˇ cawˬ ve na nyi hkawˇ hta‸ tcuhˉ kuiˬ maˇ cawˬ ve tawˇ kʼaw‸ yaw hkʼaw‸ piˇ-oˆ. Oˇ hkʼe te ve kʼo, na nyi shehˍ hpaˇ lehˬ yawˇ hkʼaˬ hkʼe ve chaw hpeh‸ ve hta‸ shiˍ la tuˬ yoˬ.

6Nawˬ lehˬ chaw luˬ paˍ hta‸ tawˇ tcuh ve kʼo, nawˬ ve hkui sheh hta‸ tawˆ cheˆ taˍ cawˇ ve yoˬ. Nawˬ lehˬ dawˇ haˍ tuˬ hta‸ ca chehˇ ve chaw hpeh‸ ve yoˬ.

7Hkui kʼaw‸ paˍ lehˬ yawˇ ve hkui sheh hta‸ yehˇ gʼa chehˇ ve hkʼe, chaw luˬ paˍ htawˇ tawˇ naˉ ve tawˇ hta‸ yaw gʼa chehˇ sheˍ ve yoˬ.

8Cuˇ yiˍ maˇ cawˬ ve chaw hta‸ chiˇ mvuh piˇ ve lehˬ hawˉ ma hkʼaw keu bawˆ tuˬ ve haˉ pui shiˍ hta‸ aˉ caˆ hkeh hpeh tsuh‸ taˍ ve hkʼe yoˬ.

9Cuˇ yiˍ cawˬ ve tawˇ hta‸ ca gʼawˆkʼaoˍ toˇ ve chaw luˬ paˍ lehˬ, la‸ sheh hta‸ aˉ chuˇ piˉ chehˇ ve tzuhˬ bvuhˆ paˍ hta‸ shuˍ ve yoˬ.

10Chaw luˬ paˍ hta‸ kanˉ te tcuh ve chaw lehˬ, chaw chi ma ve hta‸ te sho‸ sha‸ piˇ chehˇ ve chaw hkʼe hpeh‸ ve yoˬ.

11Chaw luˬ paˍ nyiˇ pawˆ teˇ pawˆ kʼaw‸ te ya‸ ve cha‸ chiˆ ve kanˉ lehˬ, hpuiˇ hpe‸ baˬ taˍ ve hta‸ teˇ pawˆ kʼaw‸ gʼawˆ caˇ ve hta‸ shuˍ ve yoˬ.

12Chaw luˬ paˍ lehˬ cuˇ yiˍ maˇ cawˬ ve htawˇ, a shu yawˇ awˬ to hta‸ cuˇ yiˍ cawˬ ve hkʼe te ve chaw a‸ kehˉ da‸ leuˉ ve yoˬ.

13Aˬ hto‸ ma pa taw bawˬ ve chaw lehˬ yehˬ baˬ lo maˇ tawˆ-e gaˬ ve le. Laˇ hta‸ kawˆ ve pa taw laˇ.

14Chaw bawˬ paˍ lehˬ yawˇ ve zuh‸ hpui hkʼaw tiˉ hpfuhˆ zuh‸ chehˇ ve yoˬ. Yawˇ lehˬ yehˬ miˉ hkʼa shuˍ teˇ kaˬ lo ceh tiˉ chehˇ taˍ ve yoˬ.

15Chaw teˇ hpaˍ hpaˍ bawˬ jaˇ leh, a shu yawˇ ve maw‸ kʼaw hkʼaw caˇ tuˬ yuˬ keu tuˬve ceh ka‸ maˇ te gaˇ ve yoˬ.

16Chaw bawˬ paˍ lehˬ shu hta‸ da‸ ve dawˇ hkʼaˇ piˇ gʼa ve chaw suhˍ gʼaˇ a‸ kehˉ cheuˬ ve yoˬ, teh‸ ca dawˇ puiˉ ve yoˬ.

17A shu yawˇ awˬ to hta‸ maˇ caˉ da‸ ve kanˉ awˬ lawn ca gʼawˬ da‸ ve chaw lehˬ, ya‸ kʼaw hkʼoˆ lo chehˇ taˍ ve hpuiˇ naˍ paw hta‸ ca yuˬ tiˍ taˍ ve chaw hta‸ shuˍ ve yoˬ.

18Shu hta‸ heˍ caˇ peuˬ hkʼaw‸ nawˉ, shu hta‸ ca baˇ guiˇ ve yoˬ, teh‸ kʼoˆ ve chaw lehˬ, kawˆ tuˬ uiˍ ve la‸ caˉ hta‸ kʼa guiˇ chehˇ ve chaw gʼuˇ hta‸ shuˍ ve yoˬ.

20Suhˆ maˇ cawˬ kʼo aˬ miˍ suh-e ve yoˬ. Shu awˬ lawn ca kʼoˆ toˇ ve maˇ cawˬ kʼo, ya‸ da‸ jiˆ da‸ ve ka‸ maˇ cawˬ.

21Shiˉgʼeu‸ leh suhˆ lehˬ aˬ miˬ hta‸ to‸ chehˇ piˇ lawˬ ve hkʼe, sho‸ sha‸ tuˬ te ve chaw htawˇ, ya‸ da‸ jiˆ da‸ ve hta‸ te tawˆ la piˇ ve yoˬ.

22Shu awˬ lawn ca kʼoˆ toˇ ve lehˬ awˬ hkui cawˬ jaˇ ve yoˬ. Ngaˬ hui hkʼaˬ ma hehˆ dawˬ nyi gaˇ ve le.

23Heˍ ve awˬ hkʼaw lo na sha ve tawˇ yaw puiˉ ve chaw lehˬ, je‸ mu‸ hkʼu hta‸ shehˆ taˍ ve suhˆ tcuhˇ hta‸ shuˍ ve yoˬ.

24Heˍ puiˉ ve chaw lehˬ na sha ve tawˇ yaw leh shu hta‸ canˇ ve nyi ma hta‸ faˉ taˍ ve yoˬ.

25Yawˇ yaw ve tawˇ teˇ hpaˍ na sha ve yoˬ. Ya‸ hkʼaˇ, yawˇ hta‸ taˇ yonˍ. Awˬ lawn kʼo, yawˇ ve nyi ma hkʼaw canˇ ve nyi ma hkʼa biˇ cawˬ ve yoˬ.

26Nyi ma oˇ ve hta‸yawˇ faˉ taˍ ve htawˇ, yawˇ te tawˆ la ve haiˬ ve kanˉ hta‸ chaw hkʼa peu-eˬ gʼa mawˬ tuˬ yoˬ.

27Shu hta‸ va ca htaw toˇ ve chaw lehˬ, a shu yawˇ htaw taˍ ve va hta‸ kʼaw‸ yaw tuˬ yoˬ. Shu hta‸ haˉ pui hpfuhˆ teˍ ve chaw lehˬ, haˉ pui ce teˍ ve hta‸ gʼa hkanˍ tuˬ yoˬ.

28Nawˬ chaw teˇ gʼaˇ hta‸ heˍ caˇ gʼa tuˬ yawˇ hta‸ canˇ ve nyi ma gʼa cawˬ ve yoˬ. Heˍ ve tawˇ lehˬ luˬ tuˬ sheˆ tuˬ ceh tiˉ te tawˆ la gʼa ve yoˬ.

← Chapter 25 Jump to: Chapter 27 →