Proverbs 12

Lahu Bible Edited © Thailand Bible Society and Bible Society of Myanmar, 2010, 2020.

← Chapter 11 Jump to: Chapter 13 →

1Cuˇ yiˍ hta‸ ha‸ ve chaw lehˬ shu maˍ piˇ ve tawˇ hta‸ na yuˬ puiˉ ve yoˬ. Shu maˍ piˇ ve hta‸ canˇ ve chaw lehˬ chaw luˬ paˍ hpeh‸ ve yoˬ.

2Gʼuiˬsha lehˬ da‸ ve chaw hta‸ nyi ma cawˇ ve yoˬ. Ya‸ hkʼaˇ, haiˬ ve dawˇ hkʼaˇ cawˬ ve chaw hta‸ Yawˇ ciˍ yanˍ piˇ ve yoˬ.

3Haiˬ ve awˬ ceuˬ lehˬ chaw yaˇ hta‸ gawˬ lehˍ gʼa chehˇ tuˬ te laˇ maˇ gʼa. Ya‸ hkʼaˇ, hteˇ ve cawˇ ve chaw lehˬ yeˬ chaweh huˉ chehˇ hpeh‸ ve yoˬ.

4Da‸ ve awˬ miˇ ma lehˬ yawˇ awˬ hpawˇ ve ha lehˬ kuiˬ hpeh‸ ve yoˬ. Ya‸ hkʼaˇ, a shu yawˇ ve awˬ hpawˇ hta‸ ya‸ taw tuˬ te ve awˬ miˇ ma lehˬ, awˬ mu‸ ku hkʼaw hpeh‸ tawˆ la chehˇ ve a naˍ hkʼe hpeh‸ ve yoˬ.

5Hteˇ ve cawˇ ve chaw lehˬ nawˬ hta‸ hteˇ lehˍ te laˇ tuˬ yoˬ. Ya‸ hkʼaˇ, haiˬ ve chaw lehˬ nawˬ hta‸ heˍ caˇ laˇ tuˬ yoˬ.

6Haiˬ ve chaw hui ve tawˇ lehˬ kawˆ tuˬ cawˬ ve yoˬ. Ya‸ hkʼaˇ, hteˇ ve cawˇ ve chaw hui ve tawˇ lehˬ, shu hta‸ htaiˍ hkʼaw‸ piˇ ve yoˬ.

7Haiˬ ve chaw teˇ hpaˍ luˬ kʼai leh, awˬ ceuˬ awˬ hkʼaˇ teˇ gʼaˇ ka‸ cawˬ taˉ tuˬ ve maˇ he‸. Ya‸ hkʼaˇ, hteˇ ve cawˇ ve chaw hui ve yehˬ yaˇ kʼa yaˇ teˇ hpaˍ gʼa te‸ chehˇ tuˬ yoˬ.

8Nawˬ shiˍ puiˉ ve cuˇ yiˍ cawˬ ve kʼo, shu nawˬ hta‸ chiˇ mvuh tuˬ yoˬ. Nawˬ lehˬ chaw luˬ paˍ hpeh‸ ve kʼo, shu nawˬ hta‸ maˇ shawˍ maˇ caˆ te tuˬ yoˬ.

9A shu yawˇ ve kanˉ hta‸ gawˬ lehˍ te caˇ chehˇ ve chaw lehˬ, chaw uiˍ chaw mvuh hpeh‸ ve htawˇ meu‸ jehˇ chehˇ ve chaw a‸ kehˉ da‸ leuˉ ve yoˬ.

10Da‸ ve chaw lehˬ a shu yawˇ ve ceˇ hta‸ ha‸ shaˉ puiˉ ve yoˬ. Ya‸ hkʼaˇ, haiˬ ve chaw lehˬ a shu yawˇ ve ceˇ hta‸ maˇ ha kʼaˉ puiˉ.

11Kanˉ te kaiˬ ve muiˬ caˇ paˍ lehˬ caˇ tuˬ dawˬ tuˬ hkʼa biˇ cawˬ ve yoˬ. Ya‸ hkʼaˇ, te‸ chiˉ tcuhˉ kuiˬ maˇ cawˬ ve awˬ ceuˬ hta‸ dawˇ nyi leh, awˬ yanˇ hta‸ hkʼe leˇ te shonˇ chehˇ ve chaw lehˬ chaw luˬ paˍ hpeh‸ ve yoˬ.

12Haiˬ ve chaw lehˬ hkʼaˬ htaˆ ka‸ cha‸ chiˆ ve kanˉ hta‸ ceh tiˉ te gaˇ ve yoˬ. Ya‸ hkʼaˇ, hteˇ ve cawˇ ve chaw lehˬ yeˬ chaweh huˉ chehˇ taˍ ve yoˬ.

13Haiˬ ve chaw lehˬ yawˇ yaw ve tawˇ teˇ hpaˍ hta‸ pa taw, htaw taˍ ve va hta‸ yaw ve yoˬ. Ya‸ hkʼaˇ, hteˇ ve cawˇ ve chaw lehˬ kawˆ tuˬ dawˇ haˍ tuˬ hta‸ gʼa ponˬ ve yoˬ.

14Nawˬ tawˇ yaw ve leh kanˉ te ve hta‸ keunˍ da‸ ve hkʼe la‸ shawnˍ gʼa tuˬ yoˬ.

15Chaw luˬ paˍ lehˬ yawˇ te ve kanˉ cawˇ chehˇ ve yoˬ, teh‸ dawˇ taˍ ve yoˬ. Cuˇ yiˍ cawˬ ve chaw lehˬ shu dawˇ hkʼaˇ piˇ ve hta‸ na yuˬ puiˉ ve yoˬ.

16Chaw luˬ paˍ lehˬ dawˇ haˍ tuˬ teˇ ceuˬ ceuˬ mawˬ ve teˇ yanˇ, shu hta‸ haˆ haˆ hto piˇ puiˉ ve yoˬ. Da‸ ve chaw lehˬ shu venˇbaˆ taˍ ve hta‸ yeunˇ hkanˍ puiˉ ve yoˬ.

17Nawˬ lehˬ hteˇ lehˍ tawˇ yaw ve kʼo, cawˇ ve kanˉ hta‸ nawˬ te taˍ peuˬ ve yoˬ. Heˍ ve lehˬ maˇ hteˇ maˇ cawˇ ve awˬ ceuˬ hta‸ tawˆ la piˇ ve yoˬ.

18Maˇ dawˇ nyi leh yaw ve tawˇ teˇ hpaˍ lehˬ, aˉ htaw hkʼa shuˍ shu hta‸ naˬ piˇ lawˬ ve yoˬ. Ya‸ hkʼaˇ, cuˇ yiˍ hta‸ yehˇ leh yaw ve tawˇ lehˬ, shu hta‸ kʼaw‸ na-e la piˇ gʼa ve yoˬ.

19Heˍ ve teˇ ceuˬ lehˬ a sha‸ hta‸ ngeh piˇ lawˬ ve yoˬ. Ya‸ hkʼaˇ, hteˇ ve cawˇ ve teˇ ceuˬ co co yeˬ chehˇ ve yoˬ.

20Haiˬ ve awˬ ceuˬ hta‸ dawˇ nyi chehˇ ve chaw lehˬ, shu hta‸ heˍ caˇ gaˇ ve nyi ma cawˬ ve yoˬ. Ya‸ hkʼaˇ, da‸ ve kanˉ hta‸ te ve chaw lehˬ ha lehˬ ve bon hta‸ gʼa tuˬ yoˬ.

21Hteˇ ve cawˇ ve chaw awˬ hkʼoˆ lo maˇ da‸ ve awˬ ceuˬ gaˬ la tuˬ ve maˇ heˆ. Ya‸ hkʼaˇ, haiˬ ve chaw awˬ hkʼoˆ lo dawˇ haˍ ve awˬ ceuˬ gaˬ la tuˬ yoˬ.

22Heˍ ve chaw hta‸ Gʼuiˬsha canˇ ve yoˬ. Ya‸ hkʼaˇ, a shu yawˇ te taˍ peuˬ ve ka ti‸ hta‸ ha‸ shaˉ taˍ ve chaw hta‸ Yawˇ nyi ma cawˇ ve yoˬ.

23Da‸ ve chaw lehˬ yawˇ gʼa shiˍ taˍ ve awˬ lawn hta‸ faˉ taˍ puiˉve yoˬ. Ya‸ hkʼaˇ, haiˬ ve chaw lehˬ yawˇ hkʼaˬ ma haiˬ ve hta‸ hpeu‸ tawˆ la puiˉ ve yoˬ.

24Nawˬ kanˉ te kaiˬ ve kʼo awˬ me‸ awˬ hponˇ gʼa tuˬ yoˬ. Nawˬ bawˬ ve kʼo shu ceˬ gʼa te tuˬ yoˬ.

25Nawˬ dawˇ haˍ puiˉ ve kʼo ha lehˬ tuˬ awˬ ceuˬ mehˉ kʼai tuˬ yoˬ. Ya‸ hkʼaˇ, na sha ve tawˇ lehˬ nawˬ hta‸ kʼaw‸ ha lehˬ la piˇ gʼa ve yoˬ.

26Hteˇ ve cawˇ ve chaw lehˬ yawˇ ve awˬ chawˇ hta‸ ya‸ kʼaw beˆ maˍ piˇ gʼa ve yoˬ. Ya‸ hkʼaˇ, haiˬ ve chaw lehˬ yawˇ hui hta‸ ya‸ kʼaw sheh ya‸ piˇ ve yoˬ.

27Nawˬ bawˬ ve kʼo, nawˬ ca chehˇ ve awˬ ceuˬ hta‸ gʼa tuˬ ve maˇ heˆ. Ya‸ hkʼaˇ, nawˬ kanˉ te kaiˬ ve kʼo da‸ ve awˬ bon gʼa tuˬ yoˬ.

28Hteˇ ve cawˇ ve lehˬ, a sha‸ te‸ kuiˬ lo shiˍ kʼai piˇ ve ya‸ kʼaw hpeh‸ ve yoˬ. Haiˬ ve lehˬ suh kuiˬ lo shiˍ kʼai piˇ ve ya‸ kʼaw hpeh‸ ve yoˬ.

← Chapter 11 Jump to: Chapter 13 →