Proverbs 14

Lahu Bible Edited © Thailand Bible Society and Bible Society of Myanmar, 2010, 2020.

← Chapter 13 Jump to: Chapter 15 →

1Yehˬ kʼa hta‸ cuˇ yiˍ cawˬ ve yaˇ miˇ teˇ hpaˍ te taˍ ve yoˬ. Ya‸ hkʼaˇ, cuˇ yiˍ maˇ cawˬ ve chaw lehˬ yehˬ kʼa hta‸ te luˬ ve yoˬ.

2Hteˇ ve cawˇ ve kanˉ hta‸ te ve kʼo, nawˬ lehˬ Gʼuiˬsha hta‸ yawˆ yan puiˉ ve chaw hpeh‸ ve hta‸ hpeu‸ maˍ chehˇ ve yoˬ. Maˇ hteˇ maˇ cawˇ ve kanˉ hta‸ nawˬ te ve kʼo, nawˬ lehˬ Gʼuiˬsha hta‸ maˇ shawˍ maˇ caˆ te ve chaw hpeh‸ ve yoˬ.

3Chaw luˬ paˍ lehˬ tawˇ maˇ ve pa taw ciˍ yanˍ ve hta‸ gʼa hkanˍ ve yoˬ. Dawˇ nyi leh yaw ve tawˇ lehˬ yawˇ ve a sha‸ hta‸ ponˬ piˇ ve yoˬ.

4Ti mi mehˇ tuˬ nuˇ maˇ cawˬ ve kʼo, nawˬ ve caˬ ciˇ yehˬ awˬ kʼawˇ lehˍ hpeh‸ tuˬ yoˬ. Ya‸ hkʼaˇ nuˇ cawˬ ve kʼo, nawˬ ve caˬ ciˇ yehˬ hkʼaw caˬ shiˍ hkʼa biˇ cawˬ tuˬ yoˬ.

5Yonˍ gʼa ve chaw lehˬ hteˇ lehˍ cawˇ lehˍ shaˉ hkiˆ hkanˍ puiˉ ve yoˬ. Ya‸ hkʼaˇ, yonˍ maˇ gʼa ve chaw lehˬ heˍ puiˉ ve yoˬ.

6Maˇ da‸ ve dawˇ hkʼaˇ cawˬ ve chaw lehˬ, hkʼaˬ htaˆ ka‸ cuˇ yiˍ cawˬ la maˇ gʼa. Ya‸ hkʼaˇ, cuˇ yiˍ gehˬ ve chaw lehˬ hkʼa sha sha-ehˬ henˇ yuˬ gʼa ve yoˬ.

7Cuˇ yiˍ maˇ cawˬ ve chaw geh taˇ ca chehˇ. Yawˇ hui nawˬ hta‸ maˍ laˇ tuˬ te‸ chiˉ maˇ cawˬ.

8Aˬ hto‸ ma pa, taw dawˇ shiˍ puiˉ ve chaw cuˇ yiˍ cawˬ la ve le. Awˬ lawn kʼo, yawˇ hkʼaˬ hkʼe te cawˇ ve hta‸ shiˍ ve pa taw yoˬ. Aˬ hto‸ ma pa taw, chaw luˬ paˍ cuˇ yiˍ cawˬ la maˇ gʼa ve le. Awˬ lawn kʼo, yawˇ hkʼa peu-eˬ hta‸ shiˍ taˍ peuˬ, teh‸ dawˇ ve pa taw yoˬ.

9Chaw luˬ paˍ lehˬ, venˇbaˆ te ve htawˇ maˇ dawˇ haˍ puiˉ. Ya‸hkʼaˇ, da‸ ve chaw lehˬ shu venˇbaˆ hpehˇ laˇ ve hta‸ heuˆ gaˇ ve yoˬ.

10Nawˬ ve ha lehˬ tuˬ lehˬ, nawˬ awˬ pon ceh tiˉ yoˬ. Nawˬ ve dawˇ haˍ tuˬ htawˇ nawˬ awˬ pon ceh tiˉ yoˬ. Chaw teˇ gʼaˇ ka‸ nawˬ geh gʼa ga ha lehˬ leh, gʼa ga dawˇ haˍ laˇ maˇ gʼa.

11Da‸ ve chaw teˇ gʼaˇ ve yehˬ lehˬ, hai ve chaw teˇ gʼaˇ ve yehˬ luˬ kʼai peuˬ ve htawˇ yeˬ chehˇ tuˬ sheˍ ve yoˬ.

12Cawˇ ve yoˬ, teh‸ nawˬ dawˇ taˍ ve ya‸ kʼaw lehˬ, nawˬ hta‸ suh kuiˬ lo gaˬ piˇ puiˉ ve yoˬ.

13Ha lehˬ tuˬ lehˬ dawˇ haˍ tuˬ hta‸ faˉ taˍ puiˉ ve yoˬ. Ha lehˬ tuˬ mehˉ kʼai ve teˇ yanˇ, dawˇ haˍ tuˬ kʼaw‸ gaˬ la ve yoˬ.

14Haiˬ ve chaw lehˬ yawˇ te taˍ ve hta‸ keunˍ da‸ ve hkʼe gʼa tuˬ yoˬ. Da‸ ve chaw lehˬ, yawˇ te taˍ ve hkʼe da‸ ve awˬ bon gʼa tuˬ yoˬ.

15Chaw luˬ paˍ lehˬ hkʼa peu-eˬ ve hta‸ yonˍ puiˉ ve yoˬ. Shaˍ ti‸ cawˬ ve chaw lehˬ a shu yawˇ ve hkui piˍ hta‸ nyi taˍ puiˉ ve yoˬ.

16Cuˇ yiˍ cawˬ ve chaw lehˬ dawˇ haˍ kuiˬ lo maˇ gʼa gaˬ tuˬ shaˍ ti‸ taˍ puiˉ ve yoˬ. Ya‸ hkʼaˇ, chaw luˬ paˍ lehˬ te‸ chiˉ maˇ dawˇ nyi leh te kʼai puiˉ ve yoˬ.

17Nyi ma zuhˆ ve chaw lehˬ maˇ da‸ ve kanˉ laiˉ ceuˬ te tawˆ la puiˉ ve yoˬ. Cuˇ yiˍ cawˬ ve chaw lehˬ, gawˬ lehˍ chehˇ puiˉ ve yoˬ.

18Nyi ma uiˍve chaw lehˬ yawˇ te taˍ ve hta‸ keunˍ da‸ ve hkʼe gʼa hkanˍ ve yoˬ. Ya‸ hkʼaˇ cuˇ yiˍ cawˬ ve chaw lehˬ, leuˉ leh kʼaw‸ shiˍ maˇ la ve yoˬ.

19Haiˬ ve chaw lehˬ hteˇ ve cawˇ ve chaw mehˆ gʼuˇ suhˍ lo boˆ taˍ leh, gʼa lawˬ hkawˉ ve yoˬ.

20Haˍ gʼawˇ ve chaw hta‸ chaw teˇ gʼaˇ ka‸ maˇ nyi gaˇ puiˉ. Ya‸ hkʼaˇ, paw sha ve chaw lehˬ awˬ chawˇ cawˬ maˇ jaˇ ve yoˬ.

21Nawˬ ha lehˬ ha kʼa chehˇ gaˇ ve kʼo, haˍ gʼawˇ ve chaw hta‸ ga piˇ-oˆ. Shu hta‸ maˇ ha kʼaˉ puiˉ ve chaw lehˬ venˇbaˆ cawˬ ve yoˬ.

22Nawˬ da‸ ve kanˉ te ve kʼo, shu nawˬ hta‸ taˍ uiˍ taˍ mvuh leh yawˆ yan tuˬ yoˬ. Nawˬ haiˬ ve kanˉ te ve kʼo, nawˬ lehˬ ya‸ kʼai tuˬ yoˬ.

23Nawˬ kanˉ te kaiˬ ve kʼo nawˬ ve a sha‸ hta‸ hu gʼa tuˬ yoˬ. Nawˬ mui taˍ leh tawˇ tiˉ maˇ chehˇ ve kʼo, haˍ gʼawˇ kʼai tuˬ yoˬ.

24Cuˇ yiˍ cawˬ ve chaw lehˬ paw sha la tuˬ yoˬ. Ya‸ hkʼaˇ, haiˬ ve chaw lehˬ haiˬ ve awˬ meh gʼa tuˬ yoˬ.

25Hteˇ ve cawˇ ve awˬ hkʼaw lo shaˉ hkiˆ hkanˍ ve chaw lehˬ shu ve a sha‸ hta‸ ponˬ piˇ ve yoˬ. Yawˇ heˍ hto ve kʼo shu hta‸ luˬ tuˬ te piˇ ve yoˬ.

26Gʼuiˬsha hta‸ yawˆ yan ve chaw lehˬ gawˬ lehˍ gʼa chehˇ ve yoˬ.

27Nawˬ suh ve hta‸ ponˬ gaˇ laˇ. Gʼuiˬsha hta‸ yawˆ yan ve teˇ ceuˬ lehˬ, a sha‸ te‸ ve awˬ hkuiˉ puiˍ hpeh‸ ve yoˬ.

28Jawˇmawˇ teˇ gʼaˇ hkʼaˬ ma awˬ me‸ awˬ hponˇ uiˍ ve lehˬ, yawˇ ve mvuhˇmiˬ yaˇ hta‸ nyi leh shiˍ hpeh‸ ve yoˬ. Mvuhˇmiˬ yaˇ maˇ cawˬ ve kʼo, yawˇ te‸ chiˉ te maˇ gʼa.

29Nawˬ ta‸ iˉ gawˬ lehˍ chehˇ puiˉ ve kʼo, nawˬ lehˬ cuˇ yiˍ cawˬ ve chaw hpeh‸ ve yoˬ. Ya‸ hkʼaˇ, nawˬ nyi ma zuhˆ puiˉ ve kʼo, nawˬ hkʼaˬ ma cuˇ yiˍ maˇ cawˬ ve chaw hpeh‸ ve shu hta‸ hpeu‸ maˍ piˇ chehˇ ve yoˬ.

30Nyi ma hkʼaw gawˬ lehˍ cawˬ ve lehˬ awˬ to hta‸ chehˇ sha piˇ ve yoˬ. Ya‸ hkʼaˇ, hkawehˉ ve nyi ma lehˬ a naˍ diˬ lonˉ hkʼe hpeh‸ ve yoˬ.

31Haˍ gʼawˇ ve chaw hta‸ fawˉ mehˍ ve chaw lehˬ yawˇ hui hta‸ te hpanˍ shehˍ hpaˇ Gʼuiˬsha hta‸ maˇ shawˍ maˇ caˆ te ve chaw hpeh‸ ve yoˬ. Yawˇ hui hta‸ ha kʼaˉ piˇ ve chaw lehˬ, oˉ kʼoˍ pui ve awˬ liˇ hta‸ hkʼa deh‸ te ve chaw hpeh‸ ve yoˬ.

32Haiˬ ve chaw lehˬ a shu yawˇ hkʼaˇ yawˇ luˬ kʼai tuˬ te chehˇ ve yoˬ. Ya‸ hkʼaˇ, da‸ ve chaw lehˬ, gawˬ lehˍ gʼa chehˇ ve yoˬ.

33Cuˇ yiˍ cawˬ ve chaw lehˬ da‸ ve dawˇ hkʼaˇ hta‸ dawˇ nyi puiˉ ve yoˬ. Ya‸ hkʼaˇ, chaw luˬ paˍ lehˬ cuˇ yiˍ awˬ lawn te‸ chiˉ maˇ shiˍ.

34Hteˇ ve cawˇ ve teˇ ceuˬ lehˬ mvuhˇmiˬ hta‸ uiˍ la mvuh la piˇ ve yoˬ. Venˇbaˆ teˇ ceuˬ lehˬ mvuhˇmiˬ hta‸ awˬ me‸ awˬ hponˇ luˬ kʼai piˇ ve yoˬ.

35Jawˇmawˇ teˇ hpaˍ lehˬ kanˉ te puiˉ ve a ma‸ lonˉ hta‸ nyi ma cawˇ ve yoˬ. Ya‸ hkʼaˇ, kanˉ maˇ te puiˉ ve chaw hta‸ ciˍ yanˍ piˇ ve yoˬ.

← Chapter 13 Jump to: Chapter 15 →