Proverbs 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Yaˇ paˍ-oˬ, ngaˬ maˍ laˇ chehˇ ve cuˇ yiˍ cawˬ ve tawˇ teˇ hpaˍ hta‸ hkʼa deh‸ na yuˬ-o‸.

2Oˇ hkʼe te ve kʼo, nawˬ hkʼaˬ hkʼe gʼa te tuˬ ve hta‸ shiˍ la leh, nawˬ yaw ve tawˇ teˇ hpaˍ cuˇ yiˍ cawˬ ve tawˇ hpeh‸ ve hta‸ shu shiˍ la tuˬ yoˬ.

3Shu miˇ ma ve meuˇ guiˬ lehˬ pehˇ gʼuiˬ hkʼa shuˍ chaw jaˇ leh, yawˇ boˆ nu laˇ ve htawˇ shaˍlonˍ chu hkʼa shuˍ leˆ jaˇ tuˬ yoˬ.

4Ya‸ hkʼaˇ, oˇ ve peuˬ hkʼaw‸ nawˉ nawˬ lehˬ hkʼaˇ ve leh naˬ ve hta‸ gʼa hkanˍ tuˬ yoˬ.

5Yawˇ lehˬ nawˬ hta‸ suh mvuhˇmiˬ lo shiˍ kʼai laˇ tuˬ yoˬ. Yawˇ toˇ kʼai chehˇ ve ya‸ kʼaw lehˬ suh kuiˬ lo kʼai ve ya‸ kʼaw hpeh‸ ve yoˬ.

6Yawˇ lehˬ a sha‸ te‸ piˇ lawˬ ve ya‸ kʼaw hkʼoˆ lo huˉ taˍ ve maˇ heˆ. Yawˇ ya‸ kʼaw ya‸ kʼai peuˬ leh, hkʼaˬ hkʼe hpeh‸ la chehˇ ve hta‸ yawˇ maˇ shiˍ.

7Yaˇ paˍ teˇ hpaˍ-oˬ, ngaˬ ve tawˇ hta‸ na sheˍ. Ngaˬ kʼoˆ chehˇ ve tawˇ hta‸ teˇ pawˆ ka‸ taˇ leunˇ kʼai piˇ.

8Oˇ hkʼe ve yaˇ miˇ hta‸ jaw kʼai-o. Yawˇ ve yehˬ miˉ paˇ lo ka‸ taˇ kʼai.

9Nawˬ kʼai ve kʼo, nawˬ ve awˬ me‸ awˬ hponˇ luˬ kʼai leh, nawˬ a sha‸ i chehˇ sheˍ htaˇ ka‸ haiˬ ve chaw hui ve la‸ sheh hkʼaw gʼa suh-e tuˬ yoˬ.

10Nawˬ maˇ shiˍ da‸ jaw ve chaw teˇ hpaˍ nawˬ ve hpu shi mawˇ jeˬ hta‸ yuˬ kʼai leh, nawˬ ca keu taˍ ve mawˇ teˇ hpaˍ shu gʼa kʼai tuˬyoˬ.

11Nawˬ lehˬ zuh‸ hpui hkʼoˆ lo gʼa hkʼanˇ chehˇ leh nawˬ ve awˬ shaˍ leh awˬ kuˇ caˆ teˇ hpaˍ luˬ kʼai tuˬ yoˬ.

12Oˇ htaˇ nawˬ lehˬ, Aˬ hto‸ ma pa taw ngaˬ maˇ henˇ yuˬ taˍ ve le.

13Ngaˬ ve saˍla‸ teˇ hpaˍ ve tawˇ hta‸ ngaˬ maˇ na yuˬ.

14Chi beu‸ ngaˬ lehˬ chaw chi ma mehˆ gʼuˇ suhˍ lo awˬ me‸ awˬ hponˇ luˬ kʼai peuˬ, teh‸ kʼoˆ tuˬ yoˬ.

15Nawˬ ve awˬ miˇ ma hta‸ ka ti‸ yeˬ leh, yawˇ hta‸ ceh tiˉ ha‸ loˬ.

16Awˬ nu ve yaˇ miˇ teˇ hpaˍ geh gʼa taˍ ve yaˇ teˇ hpaˍ lehˬ, nawˬ hta‸ te‸ chiˉ awˬ bon te laˇ gʼa tuˬ ve maˇ heˆ.

17Nawˬ ve yaˇ teˇ hpaˍ lehˬ, nawˬ hta‸ ga laˇ tuˬ uiˍ la chehˇ cawˇ ve yoˬ.

18Chi hta‸ pa taw, nawˬ a sha‸ i sheˍ htaˇ ka‸ heuˆ taˍ ve nawˬ miˇ ma geh ceh tiˉ ha lehˬ chehˇ-oˆ.

19Yaˇ miˇ oˇ ve lehˬ hkuiˉ zuhˬ awˬ ma hkʼa shuˍ nyi sha leh, awˬ hkiˇ awˬ naˬ da‸ jaˇ ve yoˬ. Yawˇ nawˬ hta‸ ha lehˬ tuˬ te laˇ leh yawˇ ve ha‸ pehnˇ ve nawˬ hta‸ hoˆ beh taˍ laˇ piˇ-oˆ.

20Yaˇ paˍ-oˬ, aˬ hto‸ ma pa taw awˬ nu ve yaˇ miˇ teˇ hpaˍ hta‸ nawˬ kʼaw‸ ha‸ gaˇ sheˍ ve le. Aˬ hto‸ ma pa taw shu miˇ ma hta‸ nawˬ hkʼawˇ faˍ ve le.

21Nawˬ te chehˇ ve kanˉ hkʼa peu-eˬ ve hta‸ Gʼuiˬsha mawˬ chehˇ ve yoˬ. Nawˬ kʼai kuiˬ teˇ kaˬ le le Yawˇ nawˬ hta‸ nyi chehˇ ve yoˬ.

22Haiˬ ve chaw hui ve venˇbaˆ lehˬ, htaw taˍ ve va hpeh‸ ve yoˬ. Yawˇ ve venˇbaˆ hta‸ pa taw, va oˇ ve hta‸ yaw ve yoˬ.

23Yawˇ lehˬ a shu yawˇ awˬ to hta‸ ha‸ shaˉ maˇ gʼa ve pa taw gʼa suh-e ve yoˬ. Yawˇ kʼaˍ jaˇ ve pa taw, tuˍ hpfuh hkʼaw gʼa lo‸-e ve yoˬ.

← Chapter 4 Jump to: Chapter 6 →