Deuteronomy 11

Lao Bible 2012 (ພຣະຄຳພີສັກສິ)

← Chapter 10 Jump to: Chapter 12 →

1“ຈົ່ງຮັກພຣະເຈົ້າຢາເວ ພຣະເຈົ້າຂອງພວກເຈົ້າ ແລະເຊື່ອຟັງຄຳສັ່ງທຸກຂໍ້ຂອງພຣະອົງສະເໝີ.

2ວັນນີ້ ຈົ່ງຈົດຈຳສິ່ງທີ່ພວກເຈົ້າໄດ້ຮຽນຮູ້ກ່ຽວກັບພຣະເຈົ້າຢາເວ ພຣະເຈົ້າຂອງພວກເຈົ້າຜ່ານປະສົບການ ທີ່ພວກເຈົ້າໄດ້ຮັບຈາກພຣະອົງ. ແມ່ນພວກເຈົ້າທີ່ມີປະສົບການນີ້ ແລະບໍ່ແມ່ນພວກລູກຫລານຂອງພວກເຈົ້າ. ພວກເຈົ້າໄດ້ເຫັນພຣະຫັດອັນຊົງຣິດເດດ ແລະແຂນອັນຊົງຣິດອຳນາດຂອງພຣະອົງ

3ພ້ອມທັງການອັດສະຈັນຕ່າງໆທີ່ພຣະອົງໄດ້ກະທຳ. ພວກເຈົ້າໄດ້ເຫັນສິ່ງທີ່ພຣະອົງໄດ້ເຮັດຕໍ່ກະສັດແຫ່ງເອຢິບ ແລະຕໍ່ດິນແດນທັງໝົດຂອງເພິ່ນ.

4ພວກເຈົ້າໄດ້ເຫັນພຣະອົງກວາດລ້າງກອງທັບປະເທດເອຢິບໃຫ້ດັບສູນໄປ ພ້ອມທັງມ້າແລະລົດຮົບຂອງພວກເຂົາ ໂດຍໂຍນພວກເຂົາຖິ້ມລົງໃນທະເລແດງ ໃນຂະນະທີ່ພວກເຂົາກຳລັງຕິດຕາມມານັ້ນ ແລະພຣະເຈົ້າຢາເວໄດ້ທຳລາຍພວກເຂົາຈົນເຖິງທຸກວັນນີ້.

5ພວກເຈົ້າຮູ້ສິ່ງທີ່ພຣະອົງໄດ້ເຮັດຕໍ່ພວກເຈົ້າໃນຖິ່ນແຫ້ງແລ້ງກັນດານ ກ່ອນມາຮອດທີ່ນີ້.

6ຈົ່ງຫວນຄິດເຖິງສິ່ງທີ່ພຣະອົງໄດ້ເຮັດຕໍ່ດາທານແລະອາບີຣາມ ລູກຊາຍຂອງເອລີອາບແຫ່ງເຜົ່າຣູເບັນ. ຕໍ່ໜ້າທຸກຄົນ ແຜ່ນດິນໄດ້ຍະອອກກືນກິນພວກເຂົາພ້ອມກັບຄອບຄົວ, ຜ້າເຕັນ, ຄົນຮັບໃຊ້ ແລະຝູງສັດຂອງພວກເຂົາ.

7ແມ່ນແລ້ວ ພວກເຈົ້າແມ່ນພວກທີ່ໄດ້ເຫັນທຸກໆສິ່ງອັນຍິ່ງໃຫຍ່ເຫຼົ່ານັ້ນ ຊຶ່ງພຣະເຈົ້າຢາເວໄດ້ກະທຳ.”

8“ຈົ່ງເຊື່ອຟັງກົດບັນຍັດທຸກຂໍ້ ທີ່ຂ້າພະເຈົ້າໄດ້ມອບໃຫ້ພວກເຈົ້າໃນວັນນີ້ ແລ້ວພວກເຈົ້າກໍຈະສາມາດຂ້າມແມ່ນໍ້າ ແລະຢຶດຄອງດິນແດນທີ່ພວກເຈົ້າກຳລັງຈະເຂົ້າໄປນັ້ນ.

9ພວກເຈົ້າຈະມີຊີວິດໝັ້ນຍືນຢູ່ໃນດິນແດນທີ່ອຸດົມສົມບູນແລະຮັ່ງມີ ທີ່ພຣະເຈົ້າຢາເວໄດ້ສັນຍາມອບໃຫ້ປູ່ຍ່າຕາຍາຍຂອງພວກເຈົ້າແລະເຊື້ອສາຍຂອງພວກເຂົາ.

10ດິນແດນທີ່ພວກເຈົ້າກຳລັງຈະເຂົ້າໄປຢຶດຄອງນັ້ນ ບໍ່ຄືດິນແດນຂອງປະເທດເອຢິບບ່ອນທີ່ພວກເຈົ້າໄດ້ອາໄສຢູ່ແຕ່ກ່ອນ. ທີ່ນັ້ນເມື່ອພວກເຈົ້າປູກເມັດພືດ ພວກເຈົ້າຕ້ອງທຳງານໜັກເພື່ອປ້ານຄັນຄູກັນນໍ້າໄວ້,

11ແຕ່ໃນດິນແດນທີ່ພວກເຈົ້າກຳລັງຈະເຂົ້າໄປນັ້ນ ແມ່ນດິນແດນພູດອຍແລະຮ່ອມພູ ເປັນດິນແດນທີ່ລໍ່ລ້ຽງດ້ວຍນໍ້າຝົນ.

12ເປັນດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າດູແລຮັກສາ. ຕາຂອງພຣະເຈົ້າຢາເວ ພຣະເຈົ້າຂອງພວກເຈົ້າເປັນຜູ້ດູແລເບິ່ງແຍງດິນແດນນີ້ຕະຫລອດປີ.

13ສະນັ້ນ ຈົ່ງເຊື່ອຟັງຂໍ້ຄຳສັ່ງທີ່ຂ້າພະເຈົ້າໄດ້ໃຫ້ພວກເຈົ້າໃນວັນນີ້ ຈົ່ງຮັກພຣະເຈົ້າຢາເວ ພຣະເຈົ້າຂອງພວກເຈົ້າແລະຮັບໃຊ້ພຣະອົງດ້ວຍສຸດໃຈ.

14ຖ້າພວກເຈົ້າເຮັດຕາມ ພຣະອົງກໍຈະສົ່ງຝົນມາເທິງດິນແດນຂອງພວກເຈົ້າ ຖືກຕາມລະດູການ ໃນລະດູໃບໄມ້ຫລົ່ນແລະລະດູໃບໄມ້ປົ່ງ ເພື່ອວ່າພວກເຈົ້າຈະມີເຂົ້າ ມີເຫຼົ້າອະງຸ່ນ ແລະມີນໍ້າມັນໝາກກອກເທດ

15ທັງຫຍ້າສຳລັບຝູງສັດດ້ວຍ. ພວກເຈົ້າຈະມີອາຫານກິນຕາມຄວາມຕ້ອງການ.

16ຢ່າໃຫ້ຜູ້ໃດໃນພວກເຈົ້າຖືກນຳໃຫ້ຫັນໜີໄປຂາບໄຫວ້ ແລະຮັບໃຊ້ບັນດາພະອື່ນ.

17ຖ້າພວກເຈົ້າຂືນເຮັດ ພຣະເຈົ້າຢາເວກໍຈະໂກດຮ້າຍພວກເຈົ້າ. ພຣະອົງຈະປິດຟ້າສະຫວັນບໍ່ໃຫ້ຝົນຕົກ ແລະດິນແດນຂອງພວກເຈົ້າກໍຈະແຂງກະດ້າງ ຈົນພືດພັນເກີດບໍ່ໄດ້. ແລ້ວໃນບໍ່ດົນ ພວກເຈົ້າກໍຈະຕາຍໃນທີ່ນັ້ນ; ເຖິງແມ່ນວ່າເປັນດິນແດນດີທີ່ພຣະເຈົ້າຢາເວມອບໃຫ້ພວກເຈົ້າກໍຕາມ.

18ຈົ່ງຈົດຈຳຂໍ້ຄຳສັ່ງເຫຼົ່ານີ້ໄວ້ ໃນຄວາມຄິດ, ຈິດໃຈ ແລະຈິດວິນຍານ. ຈົ່ງມັດມັນໄວ້ທີ່ແຂນເປັນໝາຍສຳຄັນແລະຄຽນມັນໄວ້ທີ່ໜ້າຜາກເພື່ອເປັນສິ່ງເຕືອນໃຈ.

19ຈົ່ງສັ່ງສອນລູກຫລານໃຫ້ຮໍ່າຮຽນເອົາ. ຈົ່ງກ່າວຕໍ່ພວກເຂົາເຖິງກົດບັນຍັດເຫຼົ່ານີ້ ບໍ່ວ່າເມື່ອພວກເຈົ້າຢູ່ໃນເຮືອນຫຼືເມື່ອຈາກບ້ານໄປກໍດີ ເມື່ອພວກເຈົ້ານອນພັກຜ່ອນຫຼືເມື່ອພວກເຈົ້າລຸກຂຶ້ນກໍດີ.

20ຈົ່ງຂຽນມັນໄວ້ຕາມປະຕູເຮືອນ ແລະຕາມປະຕູຮົ້ວຂອງພວກເຈົ້າ.

21ແລ້ວພວກເຈົ້າແລະລູກຫລານຂອງພວກເຈົ້າ ກໍຈະມີອາຍຸໝັ້ນຍືນຢູ່ໃນດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ສັນຍາ ເພື່ອມອບໃຫ້ແກ່ປູ່ຍ່າຕາຍາຍຂອງພວກເຈົ້າ. ພວກເຈົ້າຈະໄດ້ຢູ່ໃນທີ່ນັ້ນຕາບຊົ່ວຟ້າສະຫວັນຢູ່ເໜືອແຜ່ນດິນໂລກ.

22ຈົ່ງເຊື່ອຟັງຢ່າງສັດຊື່ກົດບັນຍັດທຸກຂໍ້ ທີ່ຂ້າພະເຈົ້າໄດ້ມອບໃຫ້ພວກເຈົ້າຄື: ຈົ່ງຮັກພຣະເຈົ້າຢາເວ ພຣະເຈົ້າຂອງພວກເຈົ້າ ແລະຈົ່ງປະຕິບັດທຸກໆສິ່ງຕາມທີ່ພຣະອົງສັ່ງ ແລະຈົ່ງສັດຊື່ຕໍ່ພຣະອົງ.

23ແລ້ວພຣະເຈົ້າຢາເວກໍຈະຂັບໄລ່ຊົນຊາດເຫຼົ່ານັ້ນທັງໝົດອອກໜີ ເມື່ອພວກເຈົ້າບຸກໜ້າເຂົ້າໄປ ແລະພວກເຈົ້າຈະໄດ້ຢຶດຄອງດິນແດນທີ່ເປັນຂອງຊົນຊາດອື່ນທີ່ຍິ່ງໃຫຍ່ ແລະມີອຳນາດກວ່າພວກເຈົ້າ.

24ດິນທຸກໆບ່ອນທີ່ພວກເຈົ້າຍ່າງຢຽບໄປຈະເປັນຂອງພວກເຈົ້າ. ເຂດແດນຂອງພວກເຈົ້າຈະຢຽດອອກ ຕັ້ງແຕ່ຖິ່ນແຫ້ງແລ້ງກັນດານໃນທິດໃຕ້ ຈົນຮອດພູເລບານອນໃນທິດເໜືອ ແລະຕັ້ງແຕ່ແມ່ນໍ້າເອີຟຣັດທາງທິດຕາເວັນອອກ ຈົນເຖິງທະເລເມດີແຕຣາເນໃນທິດຕາເວັນຕົກ.

25ບ່ອນໃດກໍຕາມທີ່ພວກເຈົ້າຈະຢຽບຍ່າງເຂົ້າໄປໃນດິນແດນນັ້ນ ພຣະເຈົ້າຢາເວ ພຣະເຈົ້າຂອງພວກເຈົ້າຈະເຮັດໃຫ້ປະຊາຊົນເກງກົວພວກເຈົ້າ ຕາມທີ່ພຣະອົງໄດ້ສັນຍາໄວ້ ແລະຈະບໍ່ມີຜູ້ໃດກ້າຂັດຂວາງພວກເຈົ້າ.

26ວັນນີ້ ຂ້າພະເຈົ້າຈະໃຫ້ພວກເຈົ້າໄດ້ເລືອກເອົາ ລະຫວ່າງຄຳອວຍພອນກັບຄຳສາບແຊ່ງ.

27ຖ້າພວກເຈົ້າປະຕິບັດຕາມຂໍ້ຄຳສັ່ງຂອງພຣະເຈົ້າຢາເວ ພຣະເຈົ້າຂອງພວກເຈົ້າ ທີ່ຂ້າພະເຈົ້າກຳລັງໃຫ້ພວກເຈົ້າໃນວັນນີ້ ພວກເຈົ້າກໍຈະໄດ້ຮັບຄຳອວຍພອນ,

28ແຕ່ຖ້າພວກເຈົ້າບໍ່ປະຕິບັດຕາມຂໍ້ຄຳສັ່ງຂອງພຣະເຈົ້າຢາເວ ພຣະເຈົ້າຂອງພວກເຈົ້າ, ແຕ່ຫັນໜີໄປຂາບໄຫວ້ບັນດາພະອື່ນທີ່ພວກເຈົ້າບໍ່ເຄີຍຂາບໄຫວ້ມາກ່ອນ ພວກເຈົ້າກໍຈະຖືກສາບແຊ່ງ.

29ເມື່ອພຣະເຈົ້າຢາເວ ພຣະເຈົ້າຂອງພວກເຈົ້ານຳພວກເຈົ້າເຂົ້າໄປໃນດິນແດນ ທີ່ພວກເຈົ້າຈະຢຶດຄອງນັ້ນ ພວກເຈົ້າຈະຕ້ອງປະກາດຄຳອວຍພອນຈາກພູເກຣີຊິມ ແລະຄຳສາບແຊ່ງຈາກພູເອບານ. (

30ພູສອງໜ່ວຍນີ້ຢູ່ທາງທິດຕາເວັນຕົກຂອງແມ່ນໍ້າຈໍແດນ ໃນເຂດແດນຂອງຊາວການາອານທີ່ອາໄສຢູ່ໃນຮ່ອມພູຈໍແດນ. ມັນລ່ວງເລີຍໄປທາງດ້ານຕາເວັນຕົກ ບໍ່ໄກຈາກຕົ້ນໄມ້ສັກສິດໂມເຣແລະໃກ້ກັບເມືອງກິນການ.)

31ພວກເຈົ້າກຳລັງຈະຂ້າມແມ່ນໍ້າຈໍແດນເຂົ້າໄປຢຶດຄອງດິນແດນ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້. ເມື່ອພວກເຈົ້າເຂົ້າຢຶດຄອງດິນແດນແລະອາໄສຢູ່ໃນທີ່ນັ້ນແລ້ວ

32ຈົ່ງໃຫ້ແນ່ໃຈວ່າພວກເຈົ້າເຊື່ອຟັງກົດບັນຍັດທຸກຂໍ້ ທີ່ຂ້າພະເຈົ້າກຳລັງມອບໃຫ້ພວກເຈົ້າໃນວັນນີ້.”

← Chapter 10 Jump to: Chapter 12 →