Deuteronomy 30

Lao Bible 2012 (ພຣະຄຳພີສັກສິ)

← Chapter 29 Jump to: Chapter 31 →

1“ບັດນີ້ ຂ້າພະເຈົ້າຂໍໃຫ້ພວກເຈົ້າເລືອກເອົາ ລະຫວ່າງຄຳອວຍພອນແລະຄຳສາບແຊ່ງ. ເມື່ອເຫດການເຫຼົ່ານີ້ທັງໝົດໄດ້ເກີດຂຶ້ນກັບພວກເຈົ້າແລ້ວ ແລະພວກເຈົ້າກຳລັງອາໄສຢູ່ທ່າມກາງຊົນຊາດຕ່າງໆ ບ່ອນທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ເຮັດໃຫ້ພວກເຈົ້າກະຈັດກະຈາຍໄປນັ້ນ; ພວກເຈົ້າກໍຈະຈົດຈຳສິ່ງທີ່ຂ້າພະເຈົ້າໄດ້ບອກໃຫ້ພວກເຈົ້າເລືອກເອົາ.

2ຖ້າພວກເຈົ້າແລະລູກຫລານກັບຄືນມາຫາພຣະເຈົ້າຢາເວ ພຣະເຈົ້າຂອງພວກເຈົ້າ ແລະເຊື່ອຟັງດ້ວຍສຸດໃຈພຣະຂໍ້ຄຳສັ່ງທີ່ຂ້າພະເຈົ້າກຳລັງໃຫ້ພວກເຈົ້າໃນວັນນີ້;

3ແລ້ວພຣະເຈົ້າຢາເວ ພຣະເຈົ້າຂອງພວກເຈົ້າກໍຈະຫັນມາເມດຕາພວກເຈົ້າ. ພຣະອົງຈະນຳພວກເຈົ້າກັບຄືນມາຈາກຊົນຊາດຕ່າງໆ ບ່ອນທີ່ພຣະອົງໄດ້ເຮັດໃຫ້ພວກເຈົ້າກະຈັດກະຈາຍໄປອາໄສຢູ່ນັ້ນ ແລະຈະເຮັດໃຫ້ພວກເຈົ້າຈະເລີນຮຸ່ງເຮືອງຂຶ້ນໃໝ່.

4ເຖິງແມ່ນວ່າພວກເຈົ້າຈະຕົກໄປຢູ່ໄກກັນຄົນລະຟາກຟ້າ ພຣະເຈົ້າຢາເວ ພຣະເຈົ້າຂອງພວກເຈົ້າ ກໍຈະເຕົ້າໂຮມພວກເຈົ້າໃຫ້ກັບຄືນມາຫາກັນໃໝ່

5ເພື່ອວ່າພຣະເຈົ້າຢາເວ ພຣະເຈົ້າຂອງພວກເຈົ້າຈະນຳພາພວກເຈົ້າສູ່ດິນແດນທີ່ປູ່ຍ່າຕາຍາຍຂອງພວກເຈົ້າເຄີຍອາໄສຢູ່ມາແຕ່ກ່ອນນັ້ນອີກ. ແລ້ວພຣະອົງກໍຈະເຮັດໃຫ້ພວກເຈົ້າຈະເລີນຮຸ່ງເຮືອງຂຶ້ນ ແລະມີຈຳນວນຄົນຫລາຍກວ່າທີ່ປູ່ຍ່າຕາຍາຍຂອງພວກເຈົ້າເຄີຍເປັນມາກ່ອນ.

6ພຣະເຈົ້າຢາເວ ພຣະເຈົ້າຂອງພວກເຈົ້າຈະເຮັດໃຫ້ພວກເຈົ້າ ແລະລູກຫລານ ມີໃຈເຊື່ອຟັງເພື່ອວ່າພວກເຈົ້າຈະຮັກພຣະເຈົ້າຢາເວ ພຣະເຈົ້າຂອງພວກເຈົ້າດ້ວຍສຸດໃຈແລະດ້ວຍສຸດຈິດຂອງພວກເຈົ້າ ແລະສືບຕໍ່ອາໄສຢູ່ໃນດິນແດນນັ້ນໄດ້.

7ພຣະເຈົ້າຢາເວ ພຣະເຈົ້າຂອງພວກເຈົ້າຈະຫັນເອົາຄຳສາບແຊ່ງເຫຼົ່ານີ້ທັງໝົດໄປສູ່ເຫຼົ່າສັດຕູຂອງພວກເຈົ້າ ຜູ້ທີ່ກຽດຊັງແລະກົດຂີ່ຂົ່ມເຫັງພວກເຈົ້າ,

8ແລະພວກເຈົ້າກໍຈະເຊື່ອຟັງພຣະເຈົ້າຢາເວອີກທັງຖືຮັກສາຄຳສັ່ງທຸກຂໍ້ຂອງພຣະອົງ ທີ່ຂ້າພະເຈົ້າກຳລັງໃຫ້ພວກເຈົ້າໃນວັນນີ້.

9ພຣະເຈົ້າຢາເວ ພຣະເຈົ້າຂອງພວກເຈົ້າຈະເຮັດໃຫ້ພວກເຈົ້າຈະເລີນຮຸ່ງເຮືອງໃນທຸກໆສິ່ງທີ່ພວກເຈົ້າເຮັດ. ພວກເຈົ້າຈະມີລູກຫລານຫລາຍແລະມີຝູງສັດຢ່າງຫລວງຫລາຍ ແລະທົ່ງໄຮ່ທົ່ງນາຂອງພວກເຈົ້າຈະຜະລິດພືດຜົນໄດ້ຢ່າງອຸດົມສົມບູນ. ພຣະເຈົ້າຢາເວຈະມີຄວາມດີໃຈທີ່ເຮັດໃຫ້ພວກເຈົ້າຈະເລີນຮຸ່ງເຮືອງ ເໝືອນດັ່ງພຣະອົງໄດ້ເຮັດໃຫ້ປູ່ຍ່າຕາຍາຍຂອງພວກເຈົ້າຈະເລີນຮຸ່ງເຮືອງ,

10ແຕ່ພວກເຈົ້າຈະຕ້ອງເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າແລະຖືຮັກສາກົດບັນຍັດທັງໝົດຂອງພຣະອົງ ຊຶ່ງມີຂຽນໄວ້ໃນປື້ມກົດບັນຍັດຫົວນີ້. ພວກເຈົ້າຈະຕ້ອງຫັນກັບມາຫາພຣະເຈົ້າຢາເວ ພຣະເຈົ້າຂອງພວກເຈົ້າດ້ວຍສຸດໃຈແລະດ້ວຍສຸດຈິດ.

11ຄຳສັ່ງທີ່ຂ້າພະເຈົ້າກຳລັງໃຫ້ພວກເຈົ້າໃນວັນນີ້ບໍ່ເປັນສິ່ງທີ່ຍາກ ຫລືເຫຼືອວິໄສທີ່ພວກເຈົ້າຈະປະຕິບັດໄດ້.

12ຄຳສັ່ງນັ້ນບໍ່ໄດ້ຢູ່ທີ່ສະຫວັນ ພວກເຈົ້າບໍ່ຈຳເປັນຕ້ອງຖາມວ່າ, ‘ໃຜຈະຂຶ້ນໄປສະຫວັນແລະນຳລົງມາໃຫ້ພວກເຮົາ ເພື່ອພວກເຮົາຈະໄດ້ຍິນແລະເຮັດຕາມ?’

13ຄຳສັ່ງນັ້ນບໍ່ໄດ້ຢູ່ທາງຟາກທະເລດ້ານອື່ນ. ພວກເຈົ້າບໍ່ຈຳເປັນຕ້ອງຖາມວ່າ ‘ໃຜຈະຂ້າມທະເລໄປເອົາມາ ເພື່ອວ່າພວກເຮົາຈະໄດ້ຍິນແລະເຮັດຕາມ?’

14ບໍ່ແມ່ນຢ່າງນັ້ນດອກ ຄຳສັ່ງນັ້ນຢູ່ກັບພວກເຈົ້າ. ພວກເຈົ້າຮູ້ແລະຍົກມາເປັນຂໍ້ອ້າງອີງໄດ້. ດັ່ງນັ້ນ ບັດນີ້ຈົ່ງເຊື່ອຟັງຕາມນັ້ນເຖີດ.

15ວັນນີ້ ຂ້າພະເຈົ້າຈະໃຫ້ພວກເຈົ້າເລືອກເອົາ ລະຫວ່າງຊີວິດແລະຄວາມຈະເລີນ ກັບຄວາມຕາຍແລະຄວາມຈິບຫາຍ.

16ຖ້າພວກເຈົ້າເຊື່ອຟັງຂໍ້ຄຳສັ່ງຂອງພຣະເຈົ້າຢາເວ ພຣະເຈົ້າຂອງພວກເຈົ້າ ຊຶ່ງຂ້າພະເຈົ້າກຳລັງໃຫ້ພວກເຈົ້າໃນວັນນີ້. ຖ້າພວກເຈົ້າຮັກພຣະເຈົ້າຢາເວ ພຣະເຈົ້າຂອງພວກເຈົ້າ ເຊື່ອຟັງພຣະອົງ ແລະຖືຮັກສາກົດບັນຍັດທັງໝົດຂອງພຣະອົງ ແລ້ວພວກເຈົ້າກໍຈະຈະເລີນຮຸ່ງເຮືອງຈົນກາຍເປັນຊົນຊາດໃຫຍ່. ພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນພວກເຈົ້າໃນດິນແດນ ທີ່ພວກເຈົ້າກຳລັງຈະເຂົ້າໄປຢຶດຄອງ.

17ແຕ່ຖ້າພວກເຈົ້າບໍ່ເຊື່ອຟັງແລະປະຕິເສດທີ່ຈະເຮັດຕາມ ທັງຍອມໃຫ້ຖືກຊັກຊວນໄປຂາບໄຫວ້ບັນດາພະອື່ນ

18ຂ້າພະເຈົ້າຂໍປະກາດວ່າ ພວກເຈົ້າຈະຖືກທຳລາຍຢ່າງໝົດສິ້ນໃນບັດນີ້ແລະໃນທີ່ນີ້. ພວກເຈົ້າຈະບໍ່ມີອາຍຸຍືນຍາວໃນດິນແດນທີ່ທາງຟາກແມ່ນໍ້າຈໍແດນ ຊຶ່ງພວກເຈົ້າກຳລັງຈະເຂົ້າໄປຢຶດຄອງນັ້ນ.

19ບັດນີ້ ຂ້າພະເຈົ້າຂໍໃຫ້ພວກເຈົ້າເລືອກເອົາ ລະຫວ່າງຊີວິດແລະຄວາມຕາຍ, ພຣະພອນແລະຄຳສາບແຊ່ງ, ແລະຂ້າພະເຈົ້າວິງວອນສະຫວັນແລະແຜ່ນດິນໂລກໃຫ້ເປັນພະຍານໃນສິ່ງທີ່ພວກເຈົ້າເລືອກເອົາ. ຈົ່ງເລືອກເອົາຊີວິດເຖີດ ເພື່ອໃຫ້ພວກເຈົ້າແລະລູກຫລານຂອງພວກເຈົ້າມີຊີວິດຢູ່.

20ຈົ່ງຮັກພຣະເຈົ້າຢາເວ ພຣະເຈົ້າຂອງພວກເຈົ້າ ຈົ່ງເຊື່ອຟັງພຣະອົງແລະສັດຊື່ຕໍ່ພຣະອົງ ແລ້ວພວກເຈົ້າແລະລູກຫລານກໍຈະມີຊີວິດຍືນຍາວ ຢູ່ໃນດິນແດນທີ່ພຣະອົງໄດ້ສັນຍາແກ່ປູ່ຍ່າຕາຍາຍຂອງພວກເຈົ້າ ຄື: ອັບຣາຮາມ, ອີຊາກ ແລະຢາໂຄບ.”

← Chapter 29 Jump to: Chapter 31 →