Deuteronomy 34

Lao Bible 2012 (ພຣະຄຳພີສັກສິ)

← Chapter 33 Jump to:

1ໂມເຊໄດ້ຂຶ້ນຈາກທົ່ງຮາບພຽງໂມອາບໄປທີ່ພູເຂົາເນໂບ ຈົນໄປເຖິງຈອມພູປີສະກາ ຊຶ່ງຢູ່ກົງກັນຂ້າມກັບເມືອງເຢຣິໂກ ແລະຢູ່ທີ່ນັ້ນພຣະເຈົ້າຢາເວໄດ້ສຳແດງໃຫ້ເພິ່ນເຫັນດິນແດນທັງໝົດ ດັ່ງນີ້: ເຂດແດນກີເລອາດໄກໄປຮອດທາງທິດເໜືອສຸດຂອງເມືອງດານ

2ເຂດແດນທັງໝົດຂອງເນັບທາລີ; ເຂດແດນຕ່າງໆຂອງເອຟຣາອິມແລະມານາເຊ ເຂດແດນຂອງຢູດາໄກໄປຮອດທິດຕາເວັນຕົກຂອງທະເລເມດີແຕຣາເນ

3ເຂດແດນທາງພາກໃຕ້ຂອງຢູດາ ແລະທົ່ງຮາບພຽງ ແຕ່ເມືອງໂຊອາຈົນໄປເຖິງເມືອງເຢຣິໂກ ເມືອງກົກຕານ.

4ແລ້ວພຣະເຈົ້າຢາເວກໍໄດ້ກ່າວຕໍ່ລາວວ່າ, “ນີ້ແມ່ນດິນແດນທີ່ເຮົາໄດ້ສັນຍາໄວ້ກັບອັບຣາຮາມ, ອີຊາກ ແລະຢາໂຄບວ່າ ຈະມອບໃຫ້ແກ່ເຊື້ອສາຍຂອງພວກເຂົາ. ເຮົາໃຫ້ເຈົ້າເຫັນດິນແດນນີ້ ແຕ່ເຈົ້າຈະບໍ່ໄດ້ເຂົ້າໄປໃນທີ່ນັ້ນ.”

5ດັ່ງນັ້ນ ໂມເຊ ຜູ້ຮັບໃຊ້ຂອງພຣະເຈົ້າຢາເວ ຈຶ່ງໄດ້ຕາຍຢູ່ທີ່ນັ້ນໃນດິນແດນໂມອາບ ຕາມທີ່ພຣະເຈົ້າຢາເວໄດ້ບອກໄວ້.

6ພຣະອົງໄດ້ຝັງເພິ່ນໄວ້ໃນຮ່ອມພູແຫ່ງໜຶ່ງ ທີ່ດິນແດນໂມອາບ ຊຶ່ງກົງກັນຂ້າມກັບເມືອງເບັດເປອໍ, ແຕ່ຈົນເຖິງປັດຈຸບັນນີ້ຍັງບໍ່ມີໃຜຮູ້ຄັກແນ່ວ່າ ຊາກສົບຂອງໂມເຊນັ້ນໄດ້ຖືກຝັງຢູ່ບ່ອນໃດ.

7ເມື່ອໂມເຊຕາຍນັ້ນ ເພິ່ນມີອາຍຸໄດ້ 120 ປີ ທັງຍັງແຂງແຮງດີ ແລະຕາກໍຍັງເຫັນຮຸ່ງຢູ່.

8ປະຊາຊົນອິດສະຣາເອນໄດ້ໄວ້ທຸກໃຫ້ເພິ່ນເປັນເວລາ 30 ວັນ ຢູ່ໃນທົ່ງພຽງຂອງໂມອາບ.

9ໂຢຊວຍລູກຊາຍຂອງນູນກໍເຕັມໄປດ້ວຍສະຕິປັນຍາ ເພາະວ່າໂມເຊໄດ້ແຕ່ງຕັ້ງເພິ່ນໃຫ້ຮັບໜ້າທີ່ແທນ. ປະຊາຊົນອິດສະຣາເອນໄດ້ເຊື່ອຟັງໂຢຊວຍ ແລະໄດ້ເຮັດຕາມຄຳສັ່ງທຸກຂໍ້ທີ່ພຣະເຈົ້າຢາເວໄດ້ມອບໃຫ້ແກ່ພວກເຂົາຜ່ານທາງໂມເຊ.

10ຢູ່ໃນຊາດອິດສະຣາເອນບໍ່ເຄີຍມີຜູ້ທຳນວາຍຄົນໃດເໝືອນດັ່ງໂມເຊ; ພຣະເຈົ້າຢາເວໄດ້ກ່າວແກ່ເພິ່ນໜ້າຕໍ່ໜ້າ.

11ບໍ່ມີຜູ້ທຳນວາຍອື່ນໃດທີ່ເຄີຍໄດ້ເຮັດໝາຍສຳຄັນ ແລະການອັດສະຈັນຕ່າງໆ ດັ່ງທີ່ພຣະເຈົ້າຢາເວໄດ້ໃຊ້ໃຫ້ໂມເຊກະທຳ ເພື່ອຕໍ່ສູ້ກະສັດຟາໂຣແຫ່ງປະເທດເອຢິບ, ຂ້າຣາຊການ ແລະດິນແດນທັງໝົດຂອງເພິ່ນ.

12ແລະດ້ວຍພຣະຫັດອັນຊົງຣິດເດດທັງສິ້ນ ແລະດ້ວຍການອິດທິຣິດອັນໜ້າຢ້ານກົວອັນຍິ່ງໃຫຍ່ທັງໝົດນີ້ ຄືກັບໂມເຊໄດ້ເຮັດຕໍ່ສາຍຕາປະຊາຊົນອິດສະຣາເອນທັງໝົດ.

← Chapter 33 Jump to: