Deuteronomy 23

Lao Bible 2012 (ພຣະຄຳພີສັກສິ)

← Chapter 22 Jump to: Chapter 24 →

1“ຢ່ານັບຜູ້ທີ່ຖືກຕອນຫລືຜູ້ທີ່ມີອະໄວຍະວະສືບພັນພິການ ເຂົ້າເປັນປະຊາຊົນຂອງພຣະເຈົ້າຢາເວ.

2ຢ່ານັບລູກທີ່ເກີດນອກການແຕ່ງງານ ຫລືລູກຫລານຂອງລາວເຖິງສິບຊົ່ວເຊັ່ນຄົນ ເຂົ້າເປັນປະຊາຊົນຂອງພຣະເຈົ້າຢາເວ.

3ຢ່ານັບຊາວອຳໂມນຫລືຊາວໂມອາບ ຫລືລູກຫລານຂອງພວກເຂົາເຖິງສິບຊົ່ວເຊັ່ນຄົນ ເຂົ້າເປັນປະຊາຊົນຂອງພຣະເຈົ້າຢາເວ.

4ພວກເຂົາບໍ່ຍອມໃຫ້ສະບຽງອາຫານແລະນໍ້າແກ່ພວກເຈົ້າ ຄາວເມື່ອພວກເຈົ້າໄດ້ເດີນທາງອອກມາຈາກປະເທດເອຢິບ, ແຕ່ພວກເຂົາຊໍ້າໄດ້ຈ້າງບາລາອາມ ລູກຊາຍຂອງເບອໍຈາກເມືອງເປໂທໃນເມໂຊໂປຕາເມຍ ມາສາບແຊ່ງພວກເຈົ້າ.

5ແຕ່ພຣະເຈົ້າຢາເວ ພຣະເຈົ້າຂອງພວກເຈົ້າບໍ່ໄດ້ຟັງບາລາອາມ; ພຣະອົງຈຶ່ງປ່ຽນຄຳສາບແຊ່ງນັ້ນມາເປັນຄຳອວຍພອນ ເພາະວ່າພຣະເຈົ້າຢາເວ ພຣະເຈົ້າຂອງພວກເຈົ້າຮັກພວກເຈົ້າ.

6ຕາບໃດທີ່ພວກເຈົ້າເປັນຊົນຊາດໜຶ່ງຢູ່ ຢ່າຊ່ວຍເຫລືອຊົນຊາດເຫຼົ່ານີ້ຢ່າງໃດຢ່າງໜຶ່ງ ໃຫ້ຈະເລີນຮຸ່ງເຮືອງຈັກເທື່ອ.

7ຢ່າດູໝິ່ນປະໝາດຊາວເອໂດມ ເພາະພວກເຂົາເປັນຍາດພີ່ນ້ອງຂອງພວກເຈົ້າ. ຢ່ານຳການສາບແຊ່ງມາສູ່ຊາວເອຢິບ ເພາະຄັ້ງໜຶ່ງພວກເຈົ້າເຄີຍອາໄສຢູ່ໃນດິນແດນຂອງພວກເຂົາ.

8ໃນພາຍຄັ້ງໜ້າ ລູກຫລານຂອງພວກເຂົາໃນສາມສີ່ຊົ່ວເຊັ່ນຄົນ ອາດຈະຖືກນັບເຂົ້າເປັນປະຊາຊົນຂອງພຣະເຈົ້າຢາເວກໍໄດ້.”

9“ເມື່ອພວກເຈົ້າອາໄສຢູ່ໃນຄ້າຍພັກຍາມເຮັດເສິກ ໃຫ້ພວກເຈົ້າຫລີກເວັ້ນທຸກໆສິ່ງທີ່ຈະເຮັດໃຫ້ເປັນມົນທິນຕາມກົດບັນຍັດ.

10ຖ້າຊາຍຄົນໜຶ່ງເປັນມົນທິນຍ້ອນລາວຝັນໃນຕອນກາງຄືນອັນເປັນເຫດໃຫ້ນໍ້າກາມໄຫລອອກ ໃຫ້ລາວອອກໄປຢູ່ນອກຄ້າຍພັກ.

11ເຖິງເວລາແລງໃຫ້ລາວອາບນໍ້າຊຳລະຕົວ ແລະເມື່ອຕາເວັນຕົກດິນແລ້ວ ລາວກັບຄືນເຂົ້າສູ່ຄ້າຍພັກໄດ້.

12ພວກເຈົ້າຕ້ອງສະຫງວນເຂດຖ່າຍໜັກຖ່າຍເບົາໄວ້ຢູ່ນອກຄ້າຍພັກ.

13ທະຫານແຕ່ລະຄົນຈະຕ້ອງມີເຄື່ອງມືປະຈຳຕົວ ແລະເມື່ອໃດໄປຖ່າຍກໍໃຫ້ໃຊ້ເຄື່ອງມືນັ້ນຂຸດຂຸມແລະໃຊ້ດິນຖົມໄວ້.

14ຈົ່ງຮັກສາຄ້າຍພັກຂອງພວກເຈົ້າໃຫ້ປາສະຈາກມົນທິນຕາມກົດບັນຍັດ ເພາະພຣະເຈົ້າຢາເວ ພຣະເຈົ້າຂອງພວກເຈົ້າສະຖິດຢູ່ໃນຄ້າຍນັ້ນເພື່ອຄຸ້ມຄອງພວກເຈົ້າ ແລະໃຫ້ພວກເຈົ້າມີໄຊຊະນະຕໍ່ຂ້າເສິກສັດຕູ. ຢ່າເຮັດສິ່ງໃດສິ່ງໜຶ່ງທີ່ໜ້າເປິເປື້ອນ ຊຶ່ງເປັນເຫດໃຫ້ພຣະອົງປິ່ນໜ້າໜີຈາກພວກເຈົ້າ.”

15“ຖ້າຄົນຮັບໃຊ້ຊາຍຍິງຜູ້ໜຶ່ງປົບໜີຈາກນາຍຂອງຕົນ ແລະມາຂໍການຄຸ້ມຄອງຈາກພວກເຈົ້າ ຢ່າໄດ້ສົ່ງລາວກັບຄືນໄປ.

16ແຕ່ລາວຈະຢູ່ບ່ອນໃດກໍໄດ້ຕາມທີ່ລາວມັກໃນບັນດາເມືອງຂອງພວກເຈົ້າ ແລະພວກເຈົ້າບໍ່ຕ້ອງເຮັດຮຸນແຮງຕໍ່ລາວ.

17ຢ່າໃຫ້ຊາວອິດສະຣາເອນ ບໍ່ວ່າຊາຍຫລືຍິງ ເປັນໂສເພນີຢູ່ຕາມວັດຮູບເຄົາຣົບ.

18ເຊັ່ນດຽວກັນ ເງິນທີ່ໄດ້ໃນທຳນອງນີ້ບໍ່ໃຫ້ຖືກນຳເຂົ້າມາເປັນການແກ້ບະບົນ ໃນວິຫານຂອງພຣະເຈົ້າຢາເວ ພຣະເຈົ້າຂອງພວກເຈົ້າ ເພາະພຣະເຈົ້າຢາເວ ພຣະເຈົ້າຂອງພວກເຈົ້າກຽດຊັງວັດຂອງພວກໂສເພນີ.

19ເມື່ອພວກເຈົ້າໃຫ້ພີ່ນ້ອງຊາວອິດສະຣາເອນຜູ້ໜຶ່ງຢືມເງິນ ຫລືອາຫານການກິນ ຫລືສິ່ງອື່ນໆກໍດີ ຢ່າໄດ້ຄິດໄລ່ເອົາດອກເບ້ຍນຳລາວ.

20ພວກເຈົ້າອາດຈະຄິດໄລ່ເອົາດອກເບ້ຍນຳຄົນຕ່າງດ້າວໄດ້ ແຕ່ຢ່າຄິດໄລ່ເອົາດອກເບ້ຍນຳສິ່ງທີ່ພີ່ນ້ອງອິດສະຣາເອນໄດ້ຢືມ. ຈົ່ງເຮັດຕາມລະບຽບການນີ້ ແລະພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນທຸກໆສິ່ງທີ່ພວກເຈົ້າເຮັດ ຢູ່ໃນດິນແດນທີ່ພວກເຈົ້າກຳລັງຈະເຂົ້າໄປຢຶດຄອງນັ້ນ.

21ເມື່ອພວກເຈົ້າສາບານຕໍ່ພຣະເຈົ້າຢາເວ ພຣະເຈົ້າຂອງພວກເຈົ້າ ຢ່າລະເລີຍຕໍ່ສິ່ງທີ່ໄດ້ສັນຍາໄວ້; ພຣະເຈົ້າຢາເວ ພຣະເຈົ້າຂອງພວກເຈົ້າຈະຖືເອົາຕາມຄຳສາບານຂອງພວກເຈົ້າ ແລະການບໍ່ຢຶດຖືຕາມນັ້ນກໍເປັນບາບ.

22ເມື່ອພວກເຈົ້າບໍ່ໄດ້ສາບານໄວ້. ພວກເຈົ້າກໍບໍ່ມີບາບ;

23ແຕ່ຖ້າພວກເຈົ້າສະໝັກໃຈສາບານຕໍ່ພຣະເຈົ້າຢາເວ ພຣະເຈົ້າຂອງພວກເຈົ້າໄວ້ແລ້ວ ຈົ່ງເອົາໃຈໃສ່ເຮັດຕາມນັ້ນ.

24ເມື່ອພວກເຈົ້າຍ່າງຜ່ານໄປໃນສວນອະງຸ່ນຂອງຄົນອື່ນ ພວກເຈົ້າຈະກິນໝາກອະງຸ່ນໃນສວນນັ້ນຈົນອີ່ມກໍໄດ້ ແຕ່ຢ່າເກັບໃສ່ກະຕ່າຖືໄປນຳ.

25ເມື່ອຍ່າງຜ່ານທົ່ງນາ ພວກເຈົ້າຈະໃຊ້ມືເດັດເອົາຮ່ວງເຂົ້າມາເກັດກິນກໍໄດ້ ແຕ່ຢ່າໃຊ້ກ່ຽວຕັດເອົາໄປ.”

← Chapter 22 Jump to: Chapter 24 →