Deuteronomy 25

Lao Bible 2012 (ພຣະຄຳພີສັກສິ)

← Chapter 24 Jump to: Chapter 26 →

1“ຖ້າວ່າຄົນອິດສະຣາເອນເປັນຄວາມກັນຈົນເຖິງສານ ແລະສານຕັດສິນວ່າຝ່າຍໜຶ່ງຖືກແລະອີກຝ່າຍໜຶ່ງຜິດ.

2ຖ້າຜູ້ທີ່ຜິດນັ້ນຖືກລົງໂທດໃຫ້ຂ້ຽນ ກໍໃຫ້ຜູ້ຕັດສິນສັ່ງໃຫ້ລາວນອນຄວໍ້າໜ້າລົງແລ້ວຈຶ່ງຂ້ຽນ. ຈຳນວນບາດຂ້ຽນນັ້ນຈະຂຶ້ນຢູ່ກັບຄວາມຜິດທີ່ລາວໄດ້ເຮັດນັ້ນ.

3ລາວອາດຖືກຂ້ຽນບໍ່ເກີນສີ່ສິບບາດກໍໄດ້; ຖ້າຫລາຍກວ່ານັ້ນ ອາດເປັນການຫຍໍ້ຫຍັນລາວເກີນໄປຕໍ່ໜ້າມະຫາຊົນ.

4ຢ່າເອົາກະສອບອັດປາກງົວທີ່ກຳລັງຢຽບເຂົ້າຢູ່.”

5“ຖ້າສອງອ້າຍນ້ອງມີສ່ວນໃນກອງມໍຣະດົກດຽວກັນ ແລະຜູ້ໜຶ່ງຕາຍໄປໂດຍບໍ່ມີລູກ ເມຍຂອງຜູ້ຕາຍຈະແຕ່ງງານໃໝ່ກັບຄົນອື່ນນອກຄອບຄົວບໍ່ໄດ້; ແມ່ນໜ້າທີ່ຂອງອ້າຍຫລືນ້ອງຂອງຜູ້ຕາຍເອງ ທີ່ຈະຮັບເອົານາງເປັນເມຍ.

6ລູກຊາຍຜູ້ທຳອິດທີ່ເຂົາໄດ້ນຳກັນຈະຖືວ່າເປັນລູກຂອງຜູ້ທີ່ໄດ້ຕາຍໄປ ເພື່ອວ່າເຊື້ອສາຍຂອງລາວຈະສືບຕໍ່ມີໃນຊາດອິດສະຣາເອນ.

7ແຕ່ຖ້າອ້າຍຫລືນ້ອງຂອງຜູ້ຕາຍນັ້ນບໍ່ຍອມແຕ່ງງານກັບນາງ ກໍໃຫ້ນາງໄປຫາຜູ້ປົກຄອງເມືອງ ແລະເວົ້າວ່າ, ‘ອ້າຍຫລືນ້ອງທາງຜົວຂອງຂ້ານ້ອຍບໍ່ໄດ້ເຮັດຕາມໜ້າທີ່ຂອງຕົນ; ເຂົາບໍ່ຍອມສືບເຊື້ອສາຍໃຫ້ອ້າຍຫລືນ້ອງຂອງຕົນ ໃນທ່າມກາງປະຊາຊົນຊາດອິດສະຣາເອນ.’

8ແລ້ວຜູ້ປົກຄອງເມືອງກໍຈະເອີ້ນເຂົາມາສອບຖາມເບິ່ງ. ຖ້າລາວຍັງບໍ່ຍອມແຕ່ງງານກັບນາງ

9ກໍໃຫ້ເມຍໝ້າຍຂອງຜູ້ຕາຍນັ້ນໄປຫາລາວຢູ່ຊ້ອງໜ້າຜູ້ປົກຄອງເມືອງ ແລ້ວຖອດເກີບກິ່ງໜຶ່ງຂອງລາວອອກທັງຖົ່ມນໍ້າລາຍໃສ່ໜ້າດ້ວຍ ແລະເວົ້າວ່າ ‘ນີ້ແຫຼະ ຄືສິ່ງທີ່ເກີດກັບຜູ້ທີ່ບໍ່ຍອມສືບເຊື້ອສາຍໃຫ້ອ້າຍນ້ອງຂອງຕົນ.’

10ແລ້ວຄອບຄົວຂອງລາວກໍຈະເປັນທີ່ເອີ້ນກັນໃນຊາດອິດສະຣາເອນວ່າ, ‘ຄອບຄົວຂອງຊາຍທີ່ຖືກຖອດເກີບອອກ.”’

11“ຖ້າຊາຍສອງຄົນຜິດຖຽງກັນ ແລະເມຍຂອງຊາຍຄົນໜຶ່ງພະຍາຍາມຊ່ວຍຜົວຂອງຕົນໄວ້ ໂດຍບີບອະໄວຍະວະສືບພັນຂອງຊາຍອີກຄົນໜຶ່ງ;

12ຈົ່ງຕັດມືນາງຖິ້ມເສຍ ຢ່າໃຫ້ຄວາມເມດຕາແກ່ນາງເລີຍ.

13ຢ່າສໍ້ໂກງເມື່ອພວກເຈົ້າໃຊ້ເຄື່ອງຊັ່ງຕວງແລະເຄື່ອງວັດແທກ.

15ຈົ່ງໃຊ້ເຄື່ອງຊັ່ງຕວງກັບເຄື່ອງວັດແທກທີ່ຖືກຕ້ອງແລະທ່ຽງທຳ. ເພື່ອວ່າພວກເຈົ້າຈະຢູ່ໃນດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າ ກຳລັງຈະມອບໃຫ້ນັ້ນໄດ້ດົນນານ.

16ພຣະເຈົ້າຢາເວ ພຣະເຈົ້າຂອງພວກເຈົ້າກຽດຊັງຄົນສໍ້ໂກງ.”

17“ຈົ່ງຈົດຈຳສິ່ງທີ່ຊາວອາມາເຫຼັກໄດ້ເຮັດໃສ່ພວກເຈົ້າ ໃນຄາວທີ່ພວກເຈົ້າກຳລັງເດີນທາງອອກມາຈາກປະເທດເອຢິບ.

18ພວກເຂົາບໍ່ໄດ້ຢຳເກງພຣະເຈົ້າ ສະນັ້ນ ພວກເຂົາຈຶ່ງໂຈມຕີພວກເຈົ້າທາງດ້ານຫລັງ ເມື່ອພວກເຈົ້າອິດເມືອຍອ່ອນເພຍ ແລະຂ້າຄົນທີ່ຄ້າງຢູ່ທາງຫລັງຕາຍຈົນໝົດ.

19ເຫດສະນັ້ນ ເມື່ອພຣະເຈົ້າຢາເວ ພຣະເຈົ້າຂອງພວກເຈົ້າໄດ້ໃຫ້ພວກເຈົ້າຢຸດພັກຈາກເຫຼົ່າສັດຕູທີ່ຢູ່ອ້ອມຂ້າງແລ້ວ, ໃນດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າມອບໃຫ້ເປັນມໍຣະດົກ, ຈົ່ງຈັດການກັບຊາວອາມາເຫຼັກໂດຍຂ້າພວກເຂົາໃຫ້ໝົດກ້ຽງ ເພື່ອວ່າຈະບໍ່ມີໃຜລະນຶກເຖິງພວກເຂົາອີກຕໍ່ໄປ ຢ່າລືມຄຳສັ່ງນີ້.”

← Chapter 24 Jump to: Chapter 26 →