Deuteronomy 22

Lao Bible 2012 (ພຣະຄຳພີສັກສິ)

← Chapter 21 Jump to: Chapter 23 →

1“ຖ້າພວກເຈົ້າເຫັນງົວຫລືແກະຂອງພີ່ນ້ອງຊາວອິດສະຣາເອນຫລົງມາ ຢ່າໄດ້ເຮັດເມີນເສີຍ; ຈົ່ງນຳສັດນັ້ນກັບໄປສົ່ງຄືນໃຫ້ເຈົ້າຂອງ.

2ແຕ່ຖ້າເຈົ້າຂອງສັດຢູ່ຫ່າງໄກຫລືບໍ່ຮູ້ວ່າຜູ້ໃດເປັນເຈົ້າຂອງສັດ ກໍໃຫ້ນຳສັດນັ້ນເມືອບ້ານຂອງຕົນ. ເມື່ອເຈົ້າຂອງສັດມາຕາມຫາ ຈົ່ງສົ່ງສັດນັ້ນຄືນໃຫ້ເຈົ້າຂອງ.

3ຈົ່ງປະຕິບັດເຊັ່ນດຽວກັນຖ້າພວກເຈົ້າພົບລໍ ເຄື່ອງນຸ່ງຫົ່ມ ແລະສິ່ງອື່ນໆທີ່ພີ່ນ້ອງຊາວອິດສະຣາເອນໄດ້ເຮັດເສຍ.

4ຖ້າລໍຫລືງົວຂອງພີ່ນ້ອງຊາວອິດສະຣາເອນລົ້ມລົງ ຢ່າໄດ້ເຮັດເມີນເສີຍ. ຈົ່ງຊ່ວຍລາວຊູສັດນັ້ນຂຶ້ນ.

5ຜູ້ຍິງຕ້ອງບໍ່ນຸ່ງເຄື່ອງຜູ້ຊາຍ ແລະຜູ້ຊາຍຕ້ອງບໍ່ນຸ່ງເຄື່ອງຜູ້ຍິງ; ພຣະເຈົ້າຢາເວ ພຣະເຈົ້າຂອງພວກເຈົ້າກຽດຊັງຄົນທີ່ເຮັດເຊັ່ນນັ້ນ.

6ຖ້າພວກເຈົ້າພົບຮັງນົກຢູ່ເທິງຕົ້ນໄມ້ຫລືເທິງພື້ນດິນ ທີ່ແມ່ຂອງມັນກຳລັງຟັກໄຂ່ຫລືເຝົ້າລູກຂອງມັນຢູ່ພວກເຈົ້າບໍ່ຕ້ອງຈັບແມ່ຂອງມັນໄປ.

7ພວກເຈົ້າອາດຈະເອົາລູກນົກໄປໄດ້ແຕ່ປ່ອຍແມ່ຂອງມັນໄປ ເພື່ອວ່າພວກເຈົ້າຈະມີຊີວິດຢູ່ຍືນຍາວແລະຈະເລີນຮຸ່ງເຮືອງ.

8ເມື່ອພວກເຈົ້າສ້າງເຮືອນໃໝ່ໃຫ້ເຮັດຂອບເທິງຫລັງຄາເຮືອນໄວ້. ແລ້ວພວກເຈົ້າຈະບໍ່ຕ້ອງຮັບຜິດຊອບ ຖ້າຜູ້ໃດຜູ້ໜຶ່ງຕົກລົງຕາຍ.

9ຢ່າປູກພືດໃດໆໃນບ່ອນດຽວກັບສວນອະງຸ່ນ; ຖ້າພວກເຈົ້າຂືນເຮັດ ພວກເຈົ້າບໍ່ຕ້ອງໃຊ້ພືດຜົນທັງສອງຢ່າງທີ່ໄດ້ມາຈາກສວນນັ້ນ.

10ຢ່າເອົາງົວເຖິກແລະລໍທຽມແອກນຳກັນໃຊ້ໄຖນາ.

11ຢ່ານຸ່ງເຄື່ອງທີ່ໃຊ້ຂົນແກະແລະຜ້າປ່ານຕໍ່າປົນກັນ.

12ຈົ່ງຫຍິບຍອຍໃສ່ສີ່ແຈເສື້ອຄຸມຂອງພວກເຈົ້າ.”

13“ຖ້າວ່າຊາຍຜູ້ໜຶ່ງໄດ້ແຕ່ງງານກັບຍິງຜູ້ໜຶ່ງ ແລະຕໍ່ມາລາວບໍ່ຕ້ອງການນາງອີກ.

14ດັ່ງນັ້ນ ລາວຈຶ່ງຫາເຫດຜົນອັນບໍ່ຈິງກ່າວຟ້ອງນາງວ່າ ເປັນຍິງບໍ່ບໍຣິສຸດເມື່ອເຂົາແຕ່ງງານກັນແລ້ວ.

15ຖ້າເຫດການເຊັ່ນນີ້ເກີດຂຶ້ນໃຫ້ພໍ່ແມ່ຂອງຝ່າຍຍິງເອົາຜ້າປູບ່ອນນອນ ທີ່ມີຮອຍເລືອດໃນຄືນມື້ແຕ່ງງານຊຶ່ງພິສູດວ່ານາງເປັນສາວບໍຣິສຸດ ແລະນຳໄປທີ່ສານເພື່ອໃຫ້ພວກຫົວໜ້າປົກຄອງເມືອງເບິ່ງ.

16ພໍ່ຂອງຝ່າຍຍິງນັ້ນຈະຕ້ອງເວົ້າກັບຜູ້ປົກຄອງເມືອງວ່າ ‘ຂ້າພະເຈົ້າເອງເປັນຜູ້ມອບລູກສາວໃຫ້ແຕ່ງງານກັບຊາຍຄົນນີ້, ແຕ່ມາບັດນີ້ລາວບໍ່ຕ້ອງການນາງ.

17ລາວໄດ້ຫາເຫດອັນບໍ່ຈິງຟ້ອງນາງໂດຍເວົ້າຕໍ່ນາງວ່າ ນາງບໍ່ບໍຣິສຸດເມື່ອລາວໄດ້ນາງມາເປັນເມຍແລ້ວ. ຈົ່ງເບິ່ງຮອຍເລືອດທີ່ຕິດຜ້າປູບ່ອນນີ້ດູ’

18ແລ້ວໃຫ້ບັນດາຫົວໜ້າຜູ້ປົກຄອງເມືອງ ເອົາຜົວຂອງຍິງນັ້ນໄປຂ້ຽນ.

19ໃຫ້ພວກເຂົາປັບໄໝລາວອີກເປັນເງິນຮ້ອຍຫລຽນ ແລະມອບເງິນໃຫ້ພໍ່ຂອງຝ່າຍຍິງຍ້ອນຊາຍຜູ້ນີ້ໄດ້ນຳການສາບແຊ່ງມາສູ່ຍິງອິດສະຣາເອນ. ບໍ່ແລ້ວແຕ່ເທົ່ານັ້ນ ນາງຍັງຈະຕ້ອງເປັນເມຍຂອງລາວຕໍ່ໄປ ແລະຈະປະຮ້າງນາງບໍ່ໄດ້ຕະຫລອດຊີວິດ.

20ແຕ່ຖ້າການກ່າວຟ້ອງນັ້ນເປັນຄວາມຈິງ ແລະບໍ່ມີຂໍ້ພິສູດໃດໆວ່າຍິງນັ້ນບໍຣິສຸດ

21ກໍໃຫ້ນຳຍິງນັ້ນອອກໄປທີ່ປະຕູເຮືອນພໍ່ຂອງນາງ ແລ້ວໃຫ້ຊາວເມືອງແກວ່ງກ້ອນຫີນໃສ່ໃຫ້ຕາຍໃນທີ່ນັ້ນ. ນາງໄດ້ເຮັດສິ່ງທີ່ອັບອາຍຂາຍໜ້າທ່າມກາງຊາວເມືອງຂອງພວກເຮົາ ໂດຍສົມສູ່ທາງເພດກ່ອນແຕ່ງງານຄາວທີ່ນາງໄດ້ອາໄສຢູ່ນຳພໍ່ແມ່. ໃນທຳນອງນີ້ພວກເຈົ້າຈຶ່ງຈະກຳຈັດຄວາມຊົ່ວຮ້າຍນີ້.

22ຖ້າຊາຍຄົນໜຶ່ງຖືກຈັບໄດ້ໃນຂະນະທີ່ລາວສົມສູ່ກັບເມຍຂອງຄົນອື່ນ ກໍໃຫ້ລົງໂທດທັງສອງຄົນເຖິງຕາຍ. ໃນທຳນອງນີ້ພວກເຈົ້າຈຶ່ງຈະກຳຈັດຄວາມຊົ່ວຮ້າຍນີ້.

23ຖ້າວ່າຊາຍຜູ້ໜຶ່ງຖືກຈັບໄດ້ໃນເມືອງ ໃນຂະນະທີ່ລາວສົມສູ່ກັບຍິງສາວທີ່ມີຄູ່ໝັ້ນແລ້ວ

24ໃຫ້ນຳເຂົາທັງສອງອອກໄປນອກເມືອງ ແລະແກວ່ງກ້ອນຫີນໃສ່ໃຫ້ຕາຍ. ຜູ້ຍິງນີ້ຕ້ອງຖືກໂທດເຖິງຕາຍເພາະນາງບໍ່ໄດ້ຮ້ອງຂໍໃຫ້ຊ່ວຍເຫລືອ ເຖິງແມ່ນນາງຢູ່ໃນເມືອງບ່ອນທີ່ຄົນຍິນສຽງໄດ້. ສ່ວນຜູ້ຊາຍນັ້ນຕ້ອງຖືກໂທດເຖິງຕາຍ ເພາະລາວໄດ້ສົມສູ່ກັບຍິງທີ່ມີຄູ່ໝັ້ນແລ້ວ. ໃນທຳນອງນີ້ພວກເຈົ້າຈຶ່ງຈະກຳຈັດຄວາມຊົ່ວຮ້າຍນີ້.

25ຖ້າວ່າຊາຍຜູ້ໜຶ່ງຂົ່ມຂືນຍິງສາວທີ່ມີຄູ່ໝັ້ນແລ້ວຢູ່ນອກເມືອງ ໃຫ້ລົງໂທດຊາຍຄົນນີ້ຜູ້ດຽວໃຫ້ເຖິງຕາຍ;

26ຢ່າເຮັດຫຍັງແກ່ຜູ້ຍິງນັ້ນເລີຍ ເພາະນາງບໍ່ໄດ້ເຮັດຜິດເຖິງຂັ້ນໂທດປະຫານ. ຄະດີນີ້ແມ່ນຢ່າງດຽວກັບ ເມື່ອຊາຍຄົນໜຶ່ງຕີຊາຍອີກຄົນໜຶ່ງແລະຂ້າລາວ.

27ຊາຍຄົນນັ້ນໄດ້ຂົ່ມຂືນຍິງທີ່ມີຄູ່ໝັ້ນແລ້ວທີ່ນອກເມືອງ ເຖິງແມ່ນວ່ານາງຈະຮ້ອງໃຫ້ຊ່ວຍເຫລືອກໍບໍ່ມີຜູ້ໃດມາຊ່ວຍເຫລືອນາງໄດ້.

28ຖ້າວ່າຊາຍຜູ້ໜຶ່ງຖືກຈັບໄດ້ໃນຂະນະທີ່ຂົ່ມຂືນຜູ້ສາວຍັງບໍ່ມີຄູ່ໝັ້ນເທື່ອ

29ລາວຈະຕ້ອງຈ່າຍເງິນຫ້າສິບຫລຽນໃຫ້ພໍ່ຂອງຍິງນັ້ນ ແລ້ວໃຫ້ລາວຮັບເອົານາງໄປເປັນເມຍຂອງຕົນ ເພາະລາວໄດ້ບັງຄັບນາງໃຫ້ສົມສູ່ທາງເພດກັບຕົນ. ລາວຈະຢ່າຮ້າງນາງບໍ່ໄດ້ຕະຫລອດຊີວິດ.

30ຢ່າໃຫ້ຊາຍຜູ້ໃດເຮັດໃຫ້ພໍ່ຂອງຕົນຕ້ອງໄດ້ຖືກອັບອາຍຂາຍໜ້າ ໂດຍສົມສູ່ທາງເພດກັບເມຍນ້ອຍຂອງເພິ່ນ.”

← Chapter 21 Jump to: Chapter 23 →