Deuteronomy 16

Lao Bible 2012 (ພຣະຄຳພີສັກສິ)

← Chapter 15 Jump to: Chapter 17 →

1“ຈົ່ງຍ້ອງຍໍໃຫ້ກຽດພຣະເຈົ້າຢາເວ ພຣະເຈົ້າຂອງພວກເຈົ້າ ໂດຍການສະຫລອງປັດສະຄາໃນເດືອນອາບີບ; ມັນແມ່ນໃນຄືນໜຶ່ງຂອງເດືອນນີ້ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ນຳພາພວກເຈົ້າອອກມາຈາກປະເທດເອຢິບ.

2ຈົ່ງນຳສັດມາຖວາຍບູຊາ ໂດຍຂ້າແກະຫລືງົວຕຽມສະຫລອງປັດສະຄາຖວາຍແກ່ພຣະເຈົ້າຢາເວ ພຣະເຈົ້າຂອງພວກເຈົ້າ ບ່ອນທີ່ພຣະເຈົ້າຢາເວໄດ້ເລືອກໄວ້ ຊຶ່ງໃຫ້ນາມຊື່ຂອງພຣະອົງຕັ້ງຢູ່.

3ຢ່າເຮັດເຂົ້າຈີ່ໃສ່ເຊື້ອແປ້ງເມື່ອກິນອາຫານນີ້, ແຕ່ໃຫ້ກິນເຂົ້າຈີ່ບໍ່ມີເຊື້ອແປ້ງເປັນເວລາເຈັດວັນ ເໝືອນດັ່ງພວກເຈົ້າໄດ້ເຮັດຄາວທີ່ອອກມາຈາກປະເທດເອຢິບຢ່າງຟ້າວຟັ່ງນັ້ນ. ຈົ່ງກິນເຂົ້າຈີ່ນີ້ ຄືເຂົ້າຈີ່ແຫ່ງຄວາມທົນທຸກເພື່ອວ່າຕາບໃດທີ່ຍັງມີຊີວິດຢູ່ ພວກເຈົ້າຈະໄດ້ຈົດຈຳວັນທີ່ພວກເຈົ້າໄດ້ອອກມາຈາກປະເທດເອຢິບ ບ່ອນທີ່ພວກເຈົ້າເຄີຍທົນທຸກນັ້ນ.

4ເປັນເວລາເຈັດວັນນີ້ ຢ່າໃຫ້ຜູ້ໃດໃນດິນແດນຂອງພວກເຈົ້າມີເຊື້ອແປ້ງຢູ່ໃນເຮືອນ ແລະຊີ້ນສັດທີ່ຂ້າໃນຕອນແລງຂອງມື້ທີໜຶ່ງນັ້ນ ຕ້ອງກິນໃຫ້ໝົດໃນຄືນນັ້ນ.

5ຈົ່ງຂ້າສັດສຳລັບປັດສະຄານີ້ໃນທີ່ນະມັດສະການແຫ່ງດຽວ ແລະຢ່າຂ້າໃນດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າຈະມອບໃຫ້. ຈົ່ງເຮັດພິທີນີ້ໃນເວລາຕາເວັນຕົກຄືເວລາດຽວ ບ່ອນທີ່ພຣະເຈົ້າຢາເວໄດ້ເລືອກໄວ້ ຊຶ່ງໃຫ້ນາມຊື່ຂອງພຣະອົງຕັ້ງຢູ່ ແລະມື້ດຽວກັນກັບຄາວທີ່ພວກເຈົ້າໄດ້ອອກມາຈາກປະເທດເອຢິບ.

7ຈົ່ງຕົ້ມຊີ້ນກິນໃນທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ເລືອກໄວ້ ແລະໃນຕອນເຊົ້າໃຫ້ກັບເມືອເຮືອນຂອງໃຜລາວ.

8ສຳລັບຫົກມື້ຕໍ່ໄປ ໃຫ້ພວກເຈົ້າເຮັດເຂົ້າຈີ່ບໍ່ມີເຊື້ອແປ້ງກິນ ແລະໃນມື້ທີເຈັດ ຈົ່ງເຕົ້າໂຮມກັນເພື່ອນະມັດສະການພຣະເຈົ້າຢາເວ ພຣະເຈົ້າຂອງພວກເຈົ້າ ແລະຢ່າເຮັດວຽກໃນວັນນີ້.”

9“ຕັ້ງແຕ່ມື້ລົງມືກ່ຽວເຂົ້າ ຈົ່ງນັບໃຫ້ເຕັມເຈັດອາທິດ.

10ແລ້ວຈົ່ງສະຫລອງເທດສະການລະດູເກັບກ່ຽວ ເພື່ອຍ້ອງຍໍໃຫ້ກຽດພຣະເຈົ້າຢາເວ ພຣະເຈົ້າຂອງພວກເຈົ້າ ໂດຍນຳເຄື່ອງບູຊາຕາມໃຈສະໝັກ ມາຖວາຍຕາມອັດຕາສ່ວນທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ອວຍພອນ.

11ຈົ່ງຊົມຊື່ນຍິນດີຢູ່ຊ້ອງໜ້າພຣະເຈົ້າຢາເວ ພຣະເຈົ້າຂອງພວກເຈົ້າຮ່ວມກັບລູກຊາຍຍິງຂອງເຈົ້າ, ທາດຮັບໃຊ້ຂອງເຈົ້າ, ຊາວເລວີ, ຊາວຕ່າງດ້າວ ເດັກກຳພ້າ ແລະແມ່ໝ້າຍທີ່ອາໄສຢູ່ໃນເມືອງຕ່າງໆຂອງພວກເຈົ້າ. ຈົ່ງຈັດພິທີນີ້ຂຶ້ນຢູ່ໃນບ່ອນທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ເລືອກໄວ້ ຊຶ່ງໃຫ້ນາມຊື່ຂອງພຣະອົງຕັ້ງຢູ່.

12ຈົ່ງໃຫ້ແນ່ໃຈວ່າ ພວກເຈົ້າເຊື່ອຟັງຂໍ້ຄຳສັ່ງເຫຼົ່ານີ້ ຢ່າລືມວ່າພວກເຈົ້າເຄີຍຕົກເປັນທາດຮັບໃຊ້ຢູ່ໃນປະເທດເອຢິບ.”

13“ຫລັງຈາກຟາດເຂົ້າແລະບີບໝາກອະງຸ່ນແລ້ວໆ ຈົ່ງສະຫລອງເທດສະການປຸກຕູບຢູ່ເປັນເວລາເຈັດວັນ.

14ຈົ່ງຊົມຊື່ນຍິນດີໃນງານເທດສະການຂອງເຈົ້າຮ່ວມກັນກັບລູກຊາຍຍິງຂອງເຈົ້າ, ທາດຮັບໃຊ້ຂອງເຈົ້າ, ຊາວເລວີ, ຊາວຕ່າງດ້າວ, ເດັກກຳພ້າ ແລະແມ່ໝ້າຍທີ່ອາໄສຢູ່ໃນເມືອງຕ່າງໆຂອງພວກເຈົ້າ.

15ຈົ່ງສະຫລອງເທດສະການນີ້ໃນທີ່ພຣະເຈົ້າຢາເວໄດ້ເລືອກໄວ້ເປັນເວລາເຈັດວັນ ເພື່ອຍ້ອງຍໍໃຫ້ກຽດພຣະເຈົ້າຢາເວ ພຣະເຈົ້າຂອງພວກເຈົ້າ. ຈົ່ງຊົມຊື່ນຍິນດີ ເພາະພຣະເຈົ້າຢາເວ ພຣະເຈົ້າຂອງພວກເຈົ້າໄດ້ອວຍພອນລະດູເກັບກ່ຽວແລະວຽກງານຂອງພວກເຈົ້າ.

16ໃຫ້ຜູ້ຊາຍທຸກໆຄົນໃນຊົນຊາດຂອງພວກເຈົ້າ ເຂົ້າມາຊ້ອງໜ້າພຣະເຈົ້າຢາເວ ພຣະເຈົ້າຂອງພວກເຈົ້າໃນບ່ອນທີ່ພຣະອົງໄດ້ເລືອກໄວ້ ສາມເທື່ອຕໍ່ປີ ດັ່ງນີ້: ເທດສະການກິນເຂົ້າຈີ່ບໍ່ມີເຊື້ອແປ້ງ, ເທດສະການລະດູເກັບກ່ຽວ ແລະເທດສະການປຸກຕູບຢູ່. ຢ່າໃຫ້ພວກເຂົາມາຕໍ່ໜ້າພຣະເຈົ້າຢາເວໂດຍມືເປົ່າ;

17ພວກເຈົ້າທຸກຄົນຈະຕ້ອງນຳສິ່ງທີ່ຕົນສາມາດ, ມາຖວາຍໃນອັດຕາສ່ວນ ຊຶ່ງພຣະເຈົ້າຢາເວ ພຣະເຈົ້າຂອງພວກເຈົ້າໄດ້ອວຍພອນ.”

18“ຈົ່ງແຕ່ງຕັ້ງບັນດາຜູ້ຕັດສິນຄວາມ ແລະເຈົ້າໜ້າທີ່ອື່ນໆໃນເມືອງທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ມອບໃຫ້. ຄົນເຫຼົ່ານັ້ນຕ້ອງຕັດສິນຄະດີຂອງປະຊາຊົນຢ່າງທ່ຽງທຳ.

19ຢ່າໃຫ້ພວກເຂົາຕັດສິນແບບເຂົ້າຂ້າງອອກຂາ ແລະຢ່າຮັບສິນຈ້າງໃດໆ. ດ້ວຍວ່າ, ສິນຈ້າງອັດຫູບັງຕາຄົນສະຫລາດແລະຄົນສັດຊື່ ແລະພາໃຫ້ພວກເຂົາຕັດສິນຄວາມຜິດພາດໄດ້.

20ຈົ່ງທ່ຽງທຳແລະສັດຊື່ຕະຫລອດໄປ ເພື່ອວ່າພວກເຈົ້າຈະຢຶດຄອງດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້ນີ້ໄດ້ ແລະອາໄສຢູ່ທີ່ນັ້ນສືບໆໄປ.

21ເມື່ອສ້າງແທ່ນບູຊາຖວາຍແດ່ພຣະເຈົ້າຢາເວ ພຣະເຈົ້າຂອງພວກເຈົ້າ ຢ່າຕັ້ງເສົາໄມ້ຂຶ້ນຄຽງຂ້າງທີ່ເປັນສັນຍາລັກຂອງເຈົ້າແມ່ອາເຊຣາ.

22ຢ່າສ້າງເສົາຫີນໃດໆເປັນຮູບເຄົາຣົບໄວ້ຂາບໄຫວ້ ເພາະພຣະເຈົ້າຢາເວ ພຣະເຈົ້າຂອງພວກເຈົ້າກຽດຊັງສິ່ງເຫຼົ່ານີ້.”

← Chapter 15 Jump to: Chapter 17 →