Deuteronomy 21

Lao Bible 2012 (ພຣະຄຳພີສັກສິ)

← Chapter 20 Jump to: Chapter 22 →

1“ຖ້າວ່າຄົນໄດ້ພົບຜູ້ໜຶ່ງທີ່ຖືກຂ້າຢູ່ໃນທົ່ງນາ ໃນດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້ ແລະພວກເຈົ້າບໍ່ຮູ້ວ່າແມ່ນໃຜເປັນຜູ້ຂ້າ

2ກໍໃຫ້ພວກຜູ້ນຳແລະພວກຜູ້ຕັດສິນອອກໄປແທກເບິ່ງໄລຍະທາງ ຈາກບ່ອນທີ່ພົບສົບຜູ້ຕາຍໃສ່ເມືອງຕ່າງໆທີ່ໃກ້ຄຽງ.

3ແລ້ວໃຫ້ພວກຜູ້ນຳໃນເມືອງທີ່ຢູ່ໃກ້ຊິດກັບບ່ອນພົບສົບນັ້ນ ເລືອກເອົາງົວແມ່ໜຸ່ມໂຕໜຶ່ງທີ່ບໍ່ເຄີຍໃຊ້ວຽກມາກ່ອນ.

4ແລ້ວໃຫ້ພວກເຂົານຳມັນໄປບ່ອນໜຶ່ງໃກ້ຫວ້ຍນໍ້າທີ່ບໍ່ເຄີຍແຫ້ງຈັກເທື່ອ ແລະດິນຢູ່ໃນທີ່ນັ້ນກໍບໍ່ເຄີຍຂຸດຄົ້ນປູກຝັງມາກ່ອນ ແລ້ວໃຫ້ຫັກຄໍງົວແມ່ໜຸ່ມຢູ່ທີ່ນັ້ນ.

5ໃຫ້ພວກປະໂຣຫິດຊາວເລວີໄປຮ່ວມໃນພິທີເໝືອນກັນ ເພາະແມ່ນພວກເຂົາທີ່ເປັນຜູ້ຕັດສິນຊີ້ຂາດທຸກໆຄະດີຕາມກົດບັນຍັດກ່ຽວກັບການທຳລາຍຮ່າງກາຍ. ພຣະເຈົ້າຢາເວ ພຣະເຈົ້າຂອງພວກເຈົ້າ ໄດ້ເລືອກເອົາປະໂຣຫິດຊາວເລວີໃຫ້ຮັບໃຊ້ພຣະອົງ ແລະໃຫ້ກ່າວຄຳອວຍພອນໃນນາມຂອງພຣະເຈົ້າຢາເວ.

6ແລ້ວຈົ່ງໃຫ້ພວກຜູ້ນຳທັງໝົດຂອງເມືອງ ຊຶ່ງໃກ້ທີ່ສຸດກັບບ່ອນທີ່ພົບສົບຄົນຕາຍລ້າງມືໃສ່ເທິງງົວ

7ແລະເວົ້າວ່າ, ‘ພວກເຮົາບໍ່ໄດ້ຂ້າຊາຍຄົນນີ້ ແລະພວກເຮົາບໍ່ຮູ້ວ່າແມ່ນໃຜເປັນຜູ້ຂ້າ.

8ພຣະເຈົ້າຢາເວເອີຍ ໂຜດຍົກໂທດໃຫ້ຊາວອິດສະຣາເອນດ້ວຍເຖີດ ຄືປະຊາຊົນທີ່ພຣະອົງໄດ້ຊ່ວຍກູ້ອອກມາຈາກປະເທດເອຢິບ. ໂຜດຍົກໂທດໃຫ້ພວກຂ້ານ້ອຍ ແລະຢ່າໃຫ້ພວກຂ້ານ້ອຍຮັບຜິດຊອບເລື່ອງການຕາຍຂອງຄົນໜຶ່ງ ທີ່ບໍ່ຮູ້ຜູ້ສັງຫານ.’

9ສະນັ້ນ ເມື່ອເຮັດຕາມພຣະເຈົ້າຢາເວໄດ້ກຳນົດແລ້ວ ພວກເຈົ້າກໍຈະບໍ່ເປັນຜູ້ຮັບຜິດຊອບສຳລັບການຂ້າຄົນ.”

10“ເມື່ອພຣະເຈົ້າຢາເວ ພຣະເຈົ້າຂອງພວກເຈົ້າ ໃຫ້ພວກເຈົ້າໄຊຊະນະຢູ່ໃນສະໜາມຮົບແລະຈັບຊະເລີຍເສິກໄດ້

11ພວກເຈົ້າອາດຈະເຫັນຍິງສາວທີ່ສວຍງາມໃນທ່າມກາງພວກຊະເລີຍເສິກກໍໄດ້ ແລະຢາກໄດ້ນາງມາເປັນເມຍ.

12ຈົ່ງນຳນາງເມືອເຮືອນຂອງພວກເຈົ້າແລະໃຫ້ນາງແຖຫົວ ຕັດເລັບມື

13ແລະປ່ຽນເສື້ອຜ້າໃຫ້ນາງຢູ່ໃນເຮືອນ ແລະໄວ້ທຸກໃຫ້ພໍ່ແມ່ຂອງນາງໜຶ່ງເດືອນ; ຫລັງຈາກນັ້ນແລ້ວ ພວກເຈົ້າຈຶ່ງເອົານາງໄປເປັນເມຍໄດ້.

14ຕໍ່ມາ ຖ້າພວກເຈົ້າບໍ່ຕ້ອງການນາງອີກ ຈົ່ງປ່ອຍນາງໃຫ້ເປັນອິດສະຫລະ. ເມື່ອພວກເຈົ້າໄດ້ບັງຄັບນາງໃຫ້ເປັນເມຍ ສະນັ້ນ ຈຶ່ງບໍ່ສົມຄວນທີ່ພວກເຈົ້າຈະປະຕິບັດຕໍ່ນາງຢ່າງຄົນຮັບໃຊ້ ໂດຍຂາຍນາງຕໍ່ໃຫ້ຄົນອື່ນ.”

15“ຖ້າວ່າຊາຍຜູ້ໜຶ່ງມີເມຍສອງຄົນ ແລະທັງສອງກໍເກີດລູກຜູ້ຊາຍ. ແຕ່ລູກຊາຍຄົນທຳອິດບໍ່ແມ່ນລູກທີ່ເກີດຈາກເມຍທີ່ຕົນຮັກ.

16ເມື່ອຊາຍຄົນນີ້ຕົກລົງຈະແບ່ງປັນມໍຣະດົກໃຫ້ແກ່ລູກໆຂອງຕົນ ລາວບໍ່ຕ້ອງເຂົ້າຂ້າງລູກຊາຍຂອງເມຍທີ່ຕົນຮັກ ໂດຍມອບມໍຣະດົກຂອງລູກເມຍກົກໃຫ້ລາວ.

17ລາວຕ້ອງແບ່ງມໍຣະດົກສອງເທົ່າໃຫ້ລູກຊາຍຄົນກົກ ເຖິງແມ່ນວ່າລາວບໍ່ແມ່ນລູກຊາຍຂອງເມຍທີ່ຕົນຮັກກໍຕາມ. ຊາຍຜູ້ໜຶ່ງຕ້ອງຮັບຮູ້ສິດທິຂອງລູກຊາຍກົກຂອງຕົນ ແລະແບ່ງມໍຣະດົກທີ່ຖືກຕາມກົດໝາຍທີ່ລາວສົມຄວນຈະໄດ້ຮັບໃຫ້ແກ່ລາວ.”

18“ຖ້າວ່າຜູ້ໜຶ່ງມີລູກຊາຍທີ່ດື້ດ້ານແລະບໍ່ຢູ່ໃນຄຳໂອວາດ ຄືລູກຊາຍທີ່ບໍ່ຟັງຄວາມພໍ່ແມ່ຂອງຕົນ ເຖິງແມ່ນວ່າພໍ່ແມ່ໄດ້ລົງໂທດລາວແລ້ວກໍຕາມ.

19ພໍ່ແມ່ຕ້ອງນຳລູກຊາຍຂອງຕົນໄປຫາພວກຜູ້ນຳໃນເມືອງທີ່ຕົນອາໄສຢູ່ ແລະນຳລາວຂຶ້ນສານ.

20ພໍ່ແມ່ຕ້ອງເວົ້າກັບພວກເພິ່ນວ່າ, ‘ລູກຊາຍຂອງພວກຂ້ານ້ອຍດື້ດ້ານທັງບໍ່ຢູ່ໃນຄຳໂອວາດ ແລະບໍ່ເຊື່ອຟັງພວກຂ້ານ້ອຍດ້ວຍ; ລາວລ້າງຜານເງິນຄຳແລະຕິດເຫລົ້າເມົາສຸຣາ.’

21ແລ້ວຊາວເມືອງກໍຈະເອົາກ້ອນຫີນແກວ່ງໃສ່ລາວໃຫ້ເຖິງຕາຍ. ດັ່ງນັ້ນ ພວກເຈົ້າຈຶ່ງຈະກຳຈັດຄວາມຊົ່ວຊ້າເຊັ່ນນີ້ໃຫ້ໝົດໄປໄດ້. ທຸກຄົນໃນຊາດອິດສະຣາເອນຈະໄດ້ຍິນສິ່ງທີ່ເກີດຂຶ້ນ ແລະພວກເຂົາຈະຢ້ານກົວ.”

22“ຖ້າຄົນໜຶ່ງຖືກປະຫານສຳລັບຄວາມຜິດທາງອາດຍາໂດຍການແຂວນຄໍ

23ຢ່າປ່ອຍຊາກສົບແຂວນໄວ້ຈົນຮອດກາງຄືນ. ໃຫ້ຝັງຊາກສົບຂອງຄົນນີ້ໃນມື້ນັ້ນໂລດ ເພາະຊາກສົບຂອງຄົນຕາຍທີ່ຖືກແຂວນຄໍກັບເສົາ ນຳຄວາມສາບແຊ່ງຂອງພຣະເຈົ້າມາສູ່ດິນແດນ. ຈົ່ງຝັງຊາກສົບນັ້ນສາ ເພື່ອບໍ່ເປັນການນຳການສາບແຊ່ງມາສູ່ດິນແດນ ທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້.”

← Chapter 20 Jump to: Chapter 22 →