2 Chronicles 13

Tswana (BAEBELE e e Boitshepo) 1992

← Chapter 12 Jump to: Chapter 14 →

1Abija a simolola go busa Bajuta ka ngwaga wa 18 wa kgosi Jeroboame.

2A busa ka dinyaga di le tharo mo Jerusalema; leina la ga mmaagwe e ne e le Mikaia morwadia Uriele wa Gibea. Mme go ne go le ntwa gare ga Abija le Jeroboame.

3Abija a rulaganya tlhabano a na le ntwa ya diganka tsa tlhabano, e bong banna ba ba tlhophegileng ba le 400 000. Jeroboame a mo abela tlhabano a na le banna ba ba tlhophegileng ba le 800 000, ba e ne e le diganka tse di dinatla.

4Abija a ema mo godimo ga thabana ya Semaraime e e mo lefatsheng la Eferaime la makhujana a re: “A ko o nkutlwe wena Jeroboame le Baiseraele botlhe.

5A ga lo a tshwanela go itse fa Jehofa Modimo wa Iseraele a neile Dafite bogosi jwa Iseraele ka bosakhutleng, e bong ene le bomorwawe ka kgolagano ya letswai?

6Le fa go ntse jalo Jeroboame morwa Nebate, motlhanka wa ga Solomone morwa Dafite, a ema, a tsuololela morena wa gagwe.

7Ga phuthegela kwa go ene banna ba ba difafalele, banna ba ba diramatla, ba ithatafaletsa go tlhabana le Rehoboame morwa Solomone ka Rehoboame a sa ntse a le lekau, a le pelo e e sisimogang, mme a retelelwa ke go ganela nabo.

8Mme jaana gompieno lo gopotse go ganela le bogosi jwa ga Jehofa bo le mo seatleng sa bomorwa Dafite, lo bontsi jo bogolo, lo na le dinamane tsa gouta tse Jeroboame o di lo diretseng go nna medimo.

9A ga lo a leleka baperesiti ba ga Jehofa bomorwa Arone, le Balefi, mme lo itiretse baperesiti ka fa mokgweng wa ditšhaba tsa mafatshe a mangwe? Ke go re, le fa mongwe a ka tla go itshwaya ka kgongwana le diphelefu di supa, yo o ka nna moperesiti fela wa yone e e seng medimo.

10“Mme ka ga rona, Jehofa ke ene Modimo wa rona, ga re a mo latlha; re na le baperesiti ba ba direlang Jehofa, e bong bomorwa Arone, le Balefi mo tirong ya bone:

11Ba fisetsa Jehofa ka moso le maitsebowa ditshupelo tse di fisiwang le maswalo a a monate; le senkgwe sa tshupo ba tle ba se baakanye mo lomating lwa bojelo lo lo itshepileng; le setlhomo sa lobone sa gouta se na le dilampa tsa sone, go tla di tuka ka maitsebowa otlhe, gonne rona re tshegeditse tebelo ya ga Jehofa Modimo wa rona; mme lona lo mo latlhile.

12Mme bonang, Modimo o na le rona kwa tlhogong ga rona, le baperesiti ba one ba na le dinaka tsa tlhagiso, ba letsa modumo wa tlhagiso ka ga lona. Lona bana ba Iseraele, lo se ka lwa tlhabana le Jehofa, Modimo wa borraeno; gonne ga lo ketla lo tlhogonolofala.”

13Jeroboame ene a tsamaisa talelo, ya ba dika morago, ba bo ba le fa pele ga Juta, talelo yone ya bo e le kwa morago ga bone.

14E rile Bajuta ba gadima, bonang, ntwa e bo e le fa pele ga bone le fa morago ga bone; mme ba goela kwa go Jehofa, le baperesiti ba letsa dinaka.

15Foo banna ba Juta ba thela lošalaba; ya re banna ba Juta ba thela lošalaba, ga dirala, go re, Modimo wa lotlha Jeroboame le Baiseraele botlhe fa pele ga Abija le ba Juta.

16Mme bona, Baiseraele ba tshaba fa pele ga Bajuta, mme Modimo wa ba tsenya mo seatleng sa bone.

17Abija le batho ba gagwe ba ba bolaya ka polao e kgolo, mme ba Iseraele ba wa ba bolailwe e le banna ba ba tlhophegileng ba le 500 000.

18Jalo Baiseraele ba kokobediwa ka lobaka loo, mme bana ba Juta ba fenya ka ba ikaegile mo go Jehofa Modimo wa borraabo.

19Abija a konatelela Jeroboame, a gapa metse mengwe mo go ene, Bethele le metse ya teng, le Ješana le metse ya teng, le Eferone le metse ya teng.

20Le gone Jeroboame ga a ka a tlhola a bona go thatafala mo metlheng ya ga Abija. Mme Jehofa a mo itaya, mme a swa.

21Mme Abija a natlafala, mme a tsaya basadi ba le 14, a tshola bana ba basimane ba le 22, le basetsana ba le 16.

22Ditiro tse dingwe tsa ga Abija, le mekgwa ya gagwe le dipolelo tsa gagwe, di kwadilwe mo phuthololong ya ga Ito moperofeti.

← Chapter 12 Jump to: Chapter 14 →