2 Chronicles 26

Tswana (BAEBELE e e Boitshepo) 1992

← Chapter 25 Jump to: Chapter 27 →

1Batho botlhe ba Juta ba tsaya Usia yo o ne a le dinyaga di le 16, ba mo dira kgosi mo boemong jwa ga Amasia rraagwe.

2Mme a aga Elothe, a o busetsa mo go Juta, morago ga kgosi e sena go robala le borraagwe.

3E rile Usia a simolola go busa a bo a le dinyaga di le 16; mme a busa ka dinyaga di le 52 mo Jerusalema. Leina la ga mmaagwe e ne e le Jekilia wa Jerusalema.

4Mme a dira se se siameng mo matlhong a ga Jehofa, jaaka tsotlhe tse Amasia rraagwe o ne a di dira.

5A itlhomamisa go batla Modimo mo metlheng ya ga Sekaria, yo o ne a na le tlhaloganyo mo ponatshegong ya Modimo; mme ya re a sa ntse a batla Jehofa, Modimo wa mo tlhogonolofatsa.

6A bolola a tlhabana le Bafilisitia, a thuba loraka lwa Gathe, le loraka lwa Gabene le lorako lwa Ašetote; a aga metse mo lefatsheng la Ašetote le mo gare ga Bafilisitia.

7Modimo wa mo thusa go tlhabana le Bafilisitia, le go tlhabana le Baarabia ba ba agileng mo Gure-baale le Bameunime.

8Baamone ba naya Usia dineo; mme leina la gagwe la tumela ntlheng tsotlhe, la ya fela kwa botsenong jwa Egepeto; gonne o ne a thatafala mo go feteletseng.

9Gape Usia a aga dikago tse di godileng mo Jerusalema fa kgorong ya kgokgotsho, le fa kgorong ya molapo, le fa tshokologong ya lorako, a di thatafatsa.

10A aga dikago tse di godileng mo nageng, a gaba madu a le mantsi, gonne o na a na le dikgomo di le dintsi; le gone mo lefatsheng le le khuti le mo lobaleng; o ne a na le balemi, le badiri ba masimo a mafine mo dithabeng le mo matlhagareng a a ungwisang; gonne a rata tiro ya masimo.

11Gape Usia o na a na le ntwa ya batlhabani, ba ba bololang ntwa ka masomo, ka fa palong ya go balwa ga bone mo go dirilweng ke Jeiele mokwadi, le Maaseia leotlana, fa tlase ga taolo ya ga Hanania molaodisiwa mongwe wa kgosi.

12Palo yotlhe ya ditlhogo tsa makgotla a borara, e bong diganka tse di pelokgale, e ne e le 2 600.

13Mo taolong ya bone go ne go le ntwa e e rutilweng, e le 307 500, ba ba tlhabanang ka thata e kgolo, ba thusa kgosi go tlhabana le mmaba.

14Usia a baakanyetsa ntwa yotlhe dithebe le marumo, le ditlhoro tsa phemelo, le meitshomelo ya phemelo, le mara le maje a metsekedi.

15A dira dikgaraga mo Jerusalema, tse di simolotsweng ke banna ba ba ditsetse tsa go tla di bewa mo dikagong tse di godileng mo godimo ga dikgokgotsho, go tla ba hula ka tsone metswi le maje a magolo. Mme leina la gagwe la tumela kwa kgakala; ka a ne a thusiwa mo go gakgamatsang, ga tsamaya a nna thata.

16E rile a sena go nna thata, pelo ya gagwe ya tsholetsega a ba a tla a dira ditiro tsa sebodu, a leofela Jehofa, Modimo wa gagwe; gonne o ne a ya mo tempeleng ya ga Jehofa a ya go fisa maswalo mo sebesong sa maswalo.

17Asaria moperesiti a tsena a mo setse morago, a na le baperesiti ba ga Jehofa ba le 80, ba e neng e le diganka tse di pelokgale.

18Ba ganela le kgosi Usia, ba mo raya ba re: “Usia, ga se ga gago go fisetsa Jehofa maswalo, fa e se ga baperesiti bomorwa Arone fela, ba ba lomololetsweng go fisa maswalo; tswa mo felong ga boitshepo; gonne o tlodile; le gone ga e ketla e nna tlotlo e e tswang mo go Jehofa Modimo mo go wena.”

19Foo Usia a nna bogale; mme o ne a tshotse leiswana mo seatleng, la go fisa maswalo; o rile a sa ntse a le bogale le baperesiti, lepero la tsoga mo phatleng ya gagwe fa pele ga baperesiti, mo ntlong ya ga Jehofa, fa sebesong sa maswalo.

20Asaria moperesiti yo mogolo, le baperesiti botlhe, ba mo leba, mme bonang, a bo a le lepero mo phatleng, mme ba mo ntsha gone ka bonako; ee, le ene a itlhaganela go tswela kwa ntle, gonne Jehofa o na a mo iteile.

21Usia kgosi a nna molepero go ya go fitlha mo tsatsing la loso lwa gagwe, mme a nna mo ntlong e e kwa thoko e lo yosi, ka a le molepero; gonne o na a kgaotswe mo ntlong ya ga Jehofa. Mme Jothame morwawe a laola ntlo ya kgosi, a atlhola batho ba lefatshe.

22Ditiro tse dingwe tsa ga Usia tsa ntlha le tsa morago, Isaia moperofeti morwa Amose o na a di kwala.

23Jalo Usia a robala le borraagwe; mme ba mo fitlha le borraagwe mo nageng ya phitlhelo e e leng ya dikgosi; gonne ba re: “Ke molepero.” Mme Jothame morwawe a busa mo boemong jwa gagwe.

← Chapter 25 Jump to: Chapter 27 →