2 Chronicles 21

Tswana (BAEBELE e e Boitshepo) 1992

← Chapter 20 Jump to: Chapter 22 →

1Jehošafate a robala le borraagwe, mme a fitlhwa le borraagwe mo motseng wa ga Dafite; mme Jehorame morwawe a busa mo boemong jwa gagwe.

2O ne a na le bomonnawe bomorwa Jehošafate, e bong Asaria, le Jehiele, Sekaria, le Asaria, le Mikaele le Shafatia; boa botlhe e le bomorwa Jehošafate kgosi ya Iseraele.

3Rraabo a ba tshwaela a ba naya dineo tse dikgolo, tsa selefera, le tsa gouta le tsa dilo tse di tlhokegang, le metse e e thekeleditsweng mo Juta; mme bogosi jone a bo naya Jehorame, ka e le ene motsalwapele.

4Jaana e rile Jehorame a le mo bogosing jwa ga rraagwe, a ithatafaditse, a bolaya bomonnawe botlhe ka tšhaka, le bangwe ba dikgosana tsa Iseraele.

5Jehorame o rile a simolola go busa a bo a le dinyaga di le 32; mme a busa ka dinyanga di 8 mo Jerusalema.

6Mme a sepela mo tseleng ya dikgosi tsa Iseraele jaaka ba ntlo ya ga Ahabe ba ne ba dira; gonne o ne a nyetse morwadia Ahabe, mme a dira se se bosula mo matlhong a ga Jehofa.

7Mme Jehofa a gana go senya ntlo ya ga Dafite ka ntlha ya kgolagano e o kileng a e dira le Dafite, le jaaka a mo solofeditse, go re o tlaa naya ene le bana ba gagwe lobone ka metlha yotlhe.

8E rile mo metlheng ya ga Jehorame Baetome ba tsuololela Bajuta, ba itirela kgosi ya bone.

9Foo Jehorame a kgabaganya a na le balaodi ba gagwe ba mephato, le dikara tsotlhe tsa gagwe di na nae; a tsoga bosigo a kgemetha Baetome ba ba mo dikanyeditseng, le balaodi ba dikara.

10Jalo Baetome ba sa le ba tsuololela Juta ba tswa taolong ya bone nako ke eno. Balibena le bone ba mo tsuololela ka lone lobaka loo, ka gobo o ne a latlhile Jehofa, Modimo wa borraagwe.

11Gape o ne a dira mafelo a a tlotlometseng mo dithabeng tsa Juta, a akafadisa banni ba Jerusalema, a timetsa Bajuta.

12Mme ga tla lokwalo kwa go ene lo tswa mo go Elija moperofeti, lwa re: “Jehofa o bua jaana, Modimo wa ga Dafite rraago, a re: ‘E re ka o se ka wa sepela mo ditseleng tsa ga Jehošafate rraago, le fa e le mo ditseleng tsa ga Asa kgosi ya Juta,

13mme o sepetse mo tseleng ya dikgosi tsa Iseraele, o akafaditse Bajuta le banni ba Jerusalema, go bile go tshwana jaaka go dirile ba ntlo ya ga Ahabe; gape o bolaile bomonnao ba ntlo ya ga rraago ba ba neng ba go gaisa ka molemo:

14Bona, Jehofa o tlaa itaya batho ba gago ka sebetso se segolo, le bana ba gago, le basadi ba gago, le dilo tsa gago tsotlhe fela.

15O tlaa bona bolwetse jo bogolo ka botlhoko jwa mala, go tsamaya mala a gago a wela kwa ntle ka ntlha ya bolwetse, ka gale le ka gale.’ ”

16Jehofa a tsosetsa Jehorame mowa wa Bafilisitia, le wa Baarabia ba ba bapileng le Baethiopia.

17Mme ba bololela lefatshe la Juta, ba thobela mo go jone ka thata, ba tlosa thoto yotlhe e e fitlhetsweng mo ntlong ya kgosi, le bomorwawe, le basadi ba gagwe; a ba a tla a se ka a salelwa ke ngwana ope wa mosimane, fa e se Jehoahase, yo mmotlana wa bomorwawe.

18Morago ga moo gotlhe, Jehofa a mo itaya mo maleng ka botlhoko jo bo se nang kalafo.

19Ga dirala ya re motlha mongwe, go sena go feta dinyaga di le pedi mala a gagwe a wela kwa ntle ka ntlha ya bolwetse jwa gagwe, mme a swa ka matlhoko a a thata. Mme batho ba gagwe ba se ka ba mo direla phisetso e e etsang phisetso ya borraagwe.

20O rile a simolola go busa a bo a le dinyaga di le 32, mme a busa mo Jerusalema ka dinyaga di fera mebedi; a swa a sa elediwe ke ope; mme ba mo fitlha mo motseng wa ga Dafite, mme e seng mo diphupung tsa dikgosi.

← Chapter 20 Jump to: Chapter 22 →