2 Chronicles 23

Tswana (BAEBELE e e Boitshepo) 1992

← Chapter 22 Jump to: Chapter 24 →

1E rile ka ngwaga wa bosupa Jehoiata a ithatafatsa, a tsaya balaodi ba makgolo, e bong Asaria morwa Jerohame, le Išemaele morwa Jehohanane, le Asaria morwa Obete, le Maaseia morwa Ataia le Elišafate morwa Sikiri, a tsena mo kgolaganong nabo.

2Ba ralala lefatshe la Juta, ba phutha Balefi mo metseng yotlhe ya Juta, le ditlhogo tsa makgotla a borara ba Iseraele, mme ba tla mo Jerusalema.

3Phuthego yotlhe ya dira kgolagano le kgosi mo ntlong ya Modimo. Jehoiata a ba raya a re: “Bonang, morwa kgosi o tlaa busa jaaka Jehofa a buile ka ga bomorwa Dafite.

4Se ke sone se lo tlaa se dirang; lo tlaa kgaogana seraro, kgaogano e ngwe ya lona e nne ba lo tsenang ka Sabata, ba baperesiti le Balefi, lo nne balebedi ba dikgoro;

5kgaogano nngwe a e nne fa ntlong ya kgosi; kgaogano e nngwe a e nne fa kgorong ya motheo; mme batho botlhe ba tlaa nna mo malwapeng a ntlo ya ga Jehofa.

6A go se tle bape mo ntlong ya ga Jehofa, fa e se baperesiti le Balefi ba ba direlang; bone ba tlaa tsena, ka gonne ba boitshepo; mme bontsi jwa batho ba tlaa tshegetsa tebelo ya ga Jehofa.

7Balefi ba tlaa dikanyeletsa kgosi, mongwe le mongwe a tshotse dibolao tsa gagwe; le fa e le mang yo o tsenang mo ntlong, a a bolawe; mme lona lo nne le kgosi fa e tsena, le fa e tswa.”

8Balefi le Bajuta botlhe ba dira ka fa go tsotlhe tse Jehoiata moperesiti o di laotseng. Mongwe le mongwe wa bone a tsaya banna ba gagwe ba ba laoletsweng go tsena ka Sabata ba na le ba ba laoletsweng go tswa ka Sabata; gonne Jehoiata moperesiti ga a ka a naya makoko a diphapaano tsela ya go phatlalala.

9Jehoiata moperesiti a neela balaodi ba makgolo marumo le dithejana le dithebe tse e neng e le tsa kgosi Dafite, tse di mo ntlong ya Modimo.

10A tlhoma batho botlhe, motho mongwe le mongwe a tshotse sebolao sa gagwe, go tswa ka fa ntlheng ya ntlo ya letsogo le legolo go ya fela ntlheng ya la molema, go tla ka sebeso le ntlo, ka fa kgosing, tikologong.

11Foo ba ntsha morwa kgosi, ba baya serwalo sa bogosi mo go ene, ba mo naya tshupo, ba mo dira kgosi; Jehoiata le bomorwawe ba mo tlotsa; ba re: “A kgosi e tshele.”

12E rile Athalia a utlwa modumo wa batho ka ba siana ba baka kgosi, a tla kwa bathong mo ntlong ya ga Jehofa.

13A leba, mme bonang, kgosi ya bo e eme fa lekotwaneng fa botsenong, balaodi le bone ba le fa kgosing le ba dinaka; batho botlhe ba lefatshe ba itumela, ba letsa dinaka; baopedi le bone ba letsa ka dilo tsa kopelo, ba tlhabeletsa ka go opela pako. Foo Athalia a ikgagola diaparo a re: “Mooko! Mooko!”

14Jehoiata moperesiti a ntsha balaodi ba makgolo ba ba laolang ntwa, a ba raya a re: “A Athalia a ntshediwe kwa ntle, a tswe mo bathong ba ba rulagantsweng, le fa e le mang yo o mo salang morago, a a bolawe ka tšhaka;” gonne moperesiti o ne a rile: “Lo se ka lwa mmolaela mo ntlong ya ga Jehofa.”

15Mme ba mo ntshetsa tsela, a ya kwa botsenong jwa kgoro ya dipitse ya ntlo ya kgosi, mme ba mmolaela gone.

16Jehoiata a dira kgolagano gare ga gagwe le batho botlhe, le kgosi, ya go re ba tla nna batho ba ga Jehofa.

17Batho botlhe ba ya mo ntlong ya ga Baale, ba e rutlolola, le dibeso tsa gagwe, le ditshwantsho tsa gagwe ba di thubela ruri, ba bolaela Matane moperesiti wa ga Baale fa pele ga dibeso.

18Ditiro tsa ntlo ya ga Jehofa Jehoiata a di tsenya mo seatleng sa baperesiti le Balefi, ba Dafite o kileng a ba aba mo ntlong ya ga Jehofa, go tla ba isa ditshupelo tsa ga Jehofa tse di fisiwang ka boitumelo le kopelo, jaaka go kwadilwe mo molaong wa ga Moše, ka fa taolong ya ga Dafite.

19Mme a tlhoma balebedi fa dikgorong tsa ntlo ya ga Jehofa, gore go se ka ga tsena ope yo o itshekologileng ka sengwe.

20Jalo balaodi ba makgolo a ba tsaya, le batho ba batona, le balaodi ba batho, le batho botlhe ba lefatshe, a folosa kgosi kwa ntlong ya ga Jehofa, mme ba tsena ka kgoro ya godimo mo ntlong ya kgosi, ba baya kgosi mo setulong sa bogosi.

21Jalo batho botlhe ba lefatshe ba itumela, motse wa ba wa iketla; mme ba bo ba bolaile Athalia ka tšhaka.

← Chapter 22 Jump to: Chapter 24 →