2 Chronicles 8

Tswana (BAEBELE e e Boitshepo) 1992

← Chapter 7 Jump to: Chapter 9 →

1Ga dirala ya re dinyaga di le 20 di sena go feta, tse Solomone o ne a aga ntlo ya ga Jehofa le ntlo ya gagwe tota ka tsone,

2metse e Hurame o kileng a e naya Solomone, Solomone a e aga, mme a baya bana ba Iseraele, gore ba age mo go yone.

3Solomone a ya motseng wa Hamathe-soba, mme a o fenya.

4A aga Tatamore mo nageng, le metse yotlhe ya mabolokelo, e o e agileng mo Hamathe.

5Le gone a aga Bethehorone, o o kwa godimo le Bethehorone, o o kwa tlase, e le metse e e thekeleditsweng ka dithako, ka ditswalo, le mephakalego;

6le Baalathe, le metse yotlhe ya mabolokelo e Solomone o ne a na nayo, le metse yotlhe ya dikara tsa gagwe, le metse ya bapalami ba dipitse, le tsotlhe tse Solomone o ne a eletsa go di aga go tla a ikgatlha ka tsone, mo Jerusalema, le mo Lebanone, le mo lefatsheng lotlhe la mmuso wa gagwe.

7Ka ga batho botlhe ba ba setseng ba Bahite, le ba Baamore, le ba Baperise, le ba Bahifa, le ba Bajebuse, le ba e ne e se Baiseraele;

8mo baneng ba bone ba ba setseng morago ga bone mo lefatsheng, ba bana ba Iseraele ba se kang ba ba nyeletsa, Solomone a ba tsaya lekgetho go tla ba nna batlhanka, nako e sa le eno.

9Mo baneng ba Iseraele Solomone a se ka a dira batlhanka bape ba go dira tiro ya gagwe; bone ya bo e le batlhabani, le ditlhogo tsa balaodi ba gagwe, le balaodi ba dikara tsa gagwe, le bapalami ba dipitse tsa gagwe.

10Bano e ne e le balaodisiwa ba bagolo ba ga Solomone, e bong batho ba le 250 ba ba laolang batho.

11Solomone a tlhatlosa morwadia Faro kwa motseng wa ga Dafite a mo isa kwa ntlong e o e mo agetseng gonne a re: “Mosadi wa me ga a ketla a nna mo ntlong ya ga Dafite kgosi ya Iseraele gonne mafelo ao a itshepile, kwa letlole la ga Jehofa le tsileng gone.”

12Foo Solomone a isetsa Jehofa ditshupelo tse di fisiwang mo sebesong sa ga Jehofa, se o se agileng fa pele ga mokatako.

13Fela jaaka tshwanelo ya letsatsi lengwe le lengwe e lopa, a isa ka fa taolong ya ga Moše, ka metlha ya bosabata, le ya go rogwa ga dikgwedi, le ya mediro e e laotsweng, mediro e le meraro ka ngwaga, e bong mo motlheng wa modiro wa senkgwe se se sa bedisiwang, le mo go wa modiro wa dibeke, le mo go wa modiro wa metlaagana.

14Makoko a diphapaano a baperesiti a a laolela tirelo ya one, ka fa taolong ya ga Dafite rraagwe, le Balefi a ba laolela ditebelo tsa bone, go baka le go direla fa pele ga baperesiti ka fa tshwanelo ya letsatsi lengwe le lengwe e lopang ka gone; le balebedi ba mejako ka fa diphapaanong tsa bone fa kgorong nngwe le nngwe; gonne Dafite monna wa Modimo o ne a laotse jalo.

15Ga baa ka ba tlogela taolo ya kgosi, e o e laoletseng baperesiti le Balefi ka ga tiro epe, le fa e le ka ga dikhumo.

16Jaana tiro yotlhe ya ga Solomone e bo e ne e baakantswe go tla mo tsatsing la go thaiwa ga ntlo ya ga Jehofa, le go ya mo go wediweng ga yone. Jalo ntlo ya ga Jehofa ya dirwa boitekanelo.

17Foo Solomone a ya Esione-gebere, le kwa Elothe, fa losing lwa lewatle mo lefatsheng la Etome.

18Mme Hurame a mo isetsa dikepe ka batlhanka ba gagwe, le batlhanka ba ba nang le kitso ya lewatle, ba ya le batlhanka ba ga Solomone kwa Ofire, ba tsaya gouta gone e le dikilokerame di feta 15 000, ba e isa kwa go kgosi Solomone.

← Chapter 7 Jump to: Chapter 9 →