2 Chronicles 15

Tswana (BAEBELE e e Boitshepo) 1992

← Chapter 14 Jump to: Chapter 16 →

1Mowa wa Modimo wa tla mo go Asaria morwa Obete.

2Mme a tswa a ya go kgatlhantsha Asa, a mo raya a re: “Lo nkutlweng, wena Asa, le Bajuta botlhe le Babenjamine; Jehofa o na le lona, fa lo sa ntse lo na le ene; fa lo mmatla o tlaa bonwa ke lona; mme fa lo mo latlha le ene o tlaa lo latlha.

3Jaana Baiseraele e sa le bogologolo ba bo ba ntse ba se na Modimo wa boammaaruri, ba se na moperesiti yo o rutang, le fa e le molao.

4E ne e tle e re mo pitlaganong ya bone fa ba boela mo go Jehofa Modimo wa Iseraele, mme ba mmatla, a bonwe ke bone.

5Ya re mo metlheng eo yo o bololang le yo o gorogang, ba ne ba sa bone kagiso, go le ditshwenyego tse dikgolo mo banning botlhe ba mafatshe.

6Ba ne ba thubaganngwa, morafe ke morafe le motse ke motse, gonne Modimo wa ba tshwenya ka dipitlagano tsotlhe fela.

7Lona lo nne thata, mabogo a lona a se repe, gonne tiro ya lona e tlaa duelwa.”

8E rile Asa a utlwa mafoko ao, le polelo ya ga Obete moperofeti, a itira pelokgale, a tlosa dilo tse di makgapha mo lefatsheng lotlhe la Juta le la Benjamine, le mo metseng e o ne a e gapile mo lefatsheng la Eferaime la makhujana; a šafatsa sebeso sa ga Jehofa, se se fa pele ga mokatako wa ga Jehofa.

9A phutha Bajuta botlhe le Babenjamine, le ba ba jakileng mo go bone ba tswa Eferaime le Manase, le ba ba tswang kwa go Simeone; gonne ba ne ba wela kwa go ene ba le bantsi ba tswa mo Iseraele, ka ba bona fa Jehofa Modimo wa gagwe a na nae.

10Ba phuthegela kwa Jerusalema ka kgwedi ya boraro, ka ngwaga wa 15 wa puso ya ga Asa.

11Ba isetsa Jehofa tlhabelo ka tsatsi leo, ga thopo e ba tsileng nayo, dikgomo di le 700 le dinku di le 7 000.

12Ba tsena mo kgolaganong, ya gore ba batle Jehofa Modimo wa borraabo, ka pelo yotlhe ya bone, le ka mowa otlhe wa bone;

13le gore le fa e le mang yo o ganang go batla Jehofa Modimo wa Iseraele, a bolawe, le fa e ka bo e le yo monnye kgotsa yo mogolo, le fa e ka bo e le monna kgotsa mosadi.

14Ba ikanela Jehofa ka lentswe le le godileng, le ka lošalaba, ka dinaka le ka diphala.

15Bajuta botlhe ba itumelela ikano eo, gonne ba ikanne ka pelo yotlhe, mme ba mmatla ka keletso yotlhe ya bone; mme a bonwa ke bone; mme Jehofa a ba naya boikhutso mo tikologong.

16Le ene Maaka, mma Asa kgosi, a mo tlosa mo go tlholeng a le mohumagadi, gonne a diretse Modimako setshwantsho se se maswe; mme Asa a rema setshwantsho sa gagwe, a se dira lorole, a se fisetsa fa molatswaneng wa Kiterone.

17Mafelo a a tlotlometseng ga a ka a tlosiwa mo Iseraele; le fa go ntse jalo pelo ya ga Asa e ne e itekanetse ka metlha yotlhe ya gagwe.

18A isa mo ntlong ya Modimo dilo tse rraagwe o ne a di tshwaetse Modimo le tse ene ka esi o ne a di tshwaile, selefera, gouta le dilwana.

19Go se ka ga tlhola go le ntwa go ya go fitlha ngwageng wa 35 wa puso ya ga Asa.

← Chapter 14 Jump to: Chapter 16 →