2 Chronicles 19

Tswana (BAEBELE e e Boitshepo) 1992

← Chapter 18 Jump to: Chapter 20 →

1Jehošafate a boela kwa ntlong ya gagwe kwa Jerusalema ka kagiso.

2Jehu morwa Hanani molebi, a tswa a ya go mo kgatlhantsha, mme a raya kgosi Jehošafate a re: “A o ne o tshwanetse go thusa baikepi, le go rata bone ba ba ilang Jehofa? Bogale jo bo tswang kwa go Jehofa bo mo go wena ka ntlha ya selo se.

3Legale dilo tse di molemo di fitlhetswe mo go wena, ka o tlositse Medimako mo lefatsheng, o itlhomamisitse pelo go batla Modimo.”

4Jehošafate a aga mo Jerusalema, a tswa gape a tsamayatsamaya mo bathong, go tswa Beerešeba go ya lefatsheng la Eferaime la makhujana, mme a ba busetsa mo go Jehofa Modimo wa borraabo.

5A tlhoma baatlhodi mo lefatsheng mo metseng yotlhe ya Juta e e thekeleditsweng, mo motseng mongwe le mongwe.

6A raya baatlhodi a re: “Lo gopole se lo se dirang, gonne ga lo atlhole ka ga motho, fa e se ka ga Jehofa fela; mme o na le lona mo go atlholeng.

7Ke gone jaana a poifo ya go Jehofa e nne mo go lona; lo tlhokomele lo e dire, gonne ga go na boikepo bope mo go Jehofa Modimo wa rona, le fa e le go tlhokomela bomangmang jwa batho, le fa e le go amogela dineo.”

8Gape mo Jerusalema Jehošafate a tlhoma ga Balefi le ga baperesiti, le ga ditlhogo tsa matlo a borara ba Iseraele, a ba tlhomela katlholo ya ga Jehofa, le ka ga dikgang. Mme ba boela Jerusalema.

9Mme a ba laya, a re: “Lo dire jaana mo go boifeng Jehofa, ka boikanngo, le ka pelo e e itekanetseng.

10E a tle e re kgang nngwe e tla kwa go lona e tswa mo baneng ba ga rraeno ba ba agileng mo metseng ya bone, gare ga madi le madi, le gare ga molao le taolo, le gare ga tao le katlholo, lo ba tlhagise, gore ba tle ba se ka ba nna molato mo go Jehofa, mme bogale jwa tla mo go lona le mo baneng ba ga rraeno; dirang mo, mme ga lo ketla lo nna molato.

11Mme bonang, Amaria moperesiti yo mogolo o lo laola mo dilong tsotlhe tse e leng tsa ga Jehofa; mme Sebadia morwa Išemaele, molaodi wa ntlo ya Juta, o lo laola mo dilong tsotlhe tse e leng tsa kgosi; le bone Balefi ba tlaa nna balaodisiwa fa pele ga lona. Dirang ka botlhoka poifo; mme a Jehofa a nne le ba ba molemo.”

← Chapter 18 Jump to: Chapter 20 →