2 Chronicles 17

Tswana (BAEBELE e e Boitshepo) 1992

← Chapter 16 Jump to: Chapter 18 →

1Jehošafate morwawe a busa mo boemong jwa gagwe, mme a ithatafaletsa Baiseraele.

2A baya batlhabani mo metseng yotlhe e e thekeleditsweng ya Juta, a baya ditlhopha tsa masole mo lefatsheng la Juta le mo metseng ya Eferaime, e Asa rraagwe o ne a e gapile.

3Jehofa o ne a na le Jehošafate, gonne a sepela mo ditseleng tsa ntlha tsa ga Dafite rraagwe, mme a se ka a batla kwa go boBaale.

4A batla mo Modimong wa ga rraagwe, a sepela mo ditaolong tsa one, mme e seng ka fa ditirong tsa Baiseraele.

5Ke gone ka moo Jehofa a tlhomamisa bogosi mo seatleng sa gagwe; mme Bajuta botlhe ba leretse Jehošafate dineo; a bona khumo le tlotlo ka botlalo.

6Pelo ya gagwe ya tsholetsega mo tseleng tsa ga Jehofa; gape a tlosa mafelo a a tlotlometseng le Medimako mo Juta.

7Gape ya re ka ngwaga wa boraro wa puso ya gagwe a roma dikgosana tsa gagwe, e bong Benehaile, le Obadia, le Sekaria, le Nathanaele le Mikaia, ba ya go ruta mo metseng ya Juta;

8le Balefi nabo, e bong Shemaia, le Nathania, le Sebadia, le Asafele, le Shemi-ramothe, le Jehonathane, le Atonija, le Tobija le Tobatonija ba Balefi; le baperesiti nabo, e bong Elišame le Jehorame.

9Ba ruta mo Juta ba tshotse lokwalo lwa molao wa ga Jehofa, ba tsamaya ba ralala metse yotlhe ya Juta, ba ruta mo bathong.

10Poifo ya ga Jehofa ya wela mo magosing otlhe a mafatshe a a mo tikologong ya Juta, mme ba se ka ba dira ntwa le Jehošafate.

11Bangwe ba Bafilisitia ba leretse Jehošafate dineo le selefera sa lekgetho; Baarabia ba mo leretse matsomane, diphelefu di le 7 700; le diphoko di le 7 700.

12Jehošafate a kokotlegela thata; a aga dikago tsa tlhabanelo le metse ya dipolokelo mo Juta.

13O ne a na le ditiro di le dintsi mo metseng ya Juta; le banna ba ntwa e le diganka tse di pelokgale mo Jerusalema.

14Mme e ke yone palo ya bone ka fa makgotleng a borraabo: Bajuta, balaodi ba dikete; Atane wa molaodi le diganka tse di pelokgale di le 300 000 di na nae.

15Le Jehohanane wa molaodi a rulagana nae, a na le batho ba le 280 000.

16Yo o ne a rulagana le ene e ne e le Amasia morwa Sikeri, yo o ne a ineela mo go Jehofa ka peleego; le diganka tse di pelokgale di le 200 000 nae.

17Le Babenjamine; Eliate wa seganka se se pelokgale le batho ba le 200 000 ba ba tlhometseng bora le thebe, ba na nae.

18Yo o ne a rulagana le ene e ne e le Jehosabate, a na le batho ba le 180 000 ba ba iketleeleditseng ntwa.

19Bao ke bone ba ba neng ba direla fa kgosing, kwa ntle ga ba kgosi e ba beileng mo metseng e e thekeleditsweng mo lefatsheng lotlhe la Juta.

← Chapter 16 Jump to: Chapter 18 →