2 Chronicles 28

Tswana (BAEBELE e e Boitshepo) 1992

← Chapter 27 Jump to: Chapter 29 →

1E rile Ahase a simolola go busa a bo a le dinyaga di le 20, mme a busa ka dinyaga di le 16 mo Jerusalema; mme ga a ka a dira se se siameng mo matlhong a ga Jehofa jaaka Dafite rraagwe.

2A sepela mo ditseleng tsa dikgosi tsa Iseraele, le gone a direla boBaale ditshwantsho tse di thetsweng.

3Gape a fisetsa maswalo mo mogogorong wa morwa Hinome, a fisa bana ba gagwe mo molelong jaaka mekgwa e e makgapha ya merafe e Jehofa o ne a e kgoromeletsa ntle fa pele ga bana ba Iseraele.

4A isa tlhabelo a ba a fisa maswalo mo mafelong a a tlotlometseng le mo dithabeng, le fa tlase ga setlhare sengwe le sengwe se setala.

5Ke gone ka moo Jehofa Modimo wa gagwe a mo tsenya mo seatleng sa kgosi ya Siria; mme ba mo kgemetha, ba tshwara ba ga gabo ba le bantsi, ba ba tlosa ba ba isa Damaseko. Le gone a tsenngwa mo seatleng sa kgosi ya Iseraele, mme a mo kgemetha ka polao e kgolo.

6Gonne Peka morwa Remalia a bolaya mo Juta batho ba le 120 000 ka tsatsi le le lengwe fela, botlhe fela e le diganka; gonne ba latlhile Jehofa, Modimo wa borraabo.

7Sikiri, seganka sengwe se se nonofileng sa Eferaime, a bolaya Maaseia morwa kgosi le Aserikame molaodi wa ntlo, le Elekana yo o rulaganyeng le kgosi.

8Bana ba Iseraele ba tshwara ba tlosa bana ba ga rraabo ba le 200 000, basadi, le bana ba basimane le ba basetsana, le gone ba ba tlosetsa thopo e kgolo, mme ba isa thopo kwa Samaria.

9Ga bo go le moperofeti mongwe wa ga Jehofa gone, yo leina la gagwe e ne e le Otete; mme a tswa a ya go kgatlhantsha ntwa e e tlang mo Samaria, mme a ba raya a re: “Bona, e re ka Jehofa Modimo wa borraeno a le bogale le Bajuta, o ba tsentse mo seatleng sa lona, mme lo ba bolaetse mo tšhakgalong e e molelo e e ileng go fitlha kwa legodimong.

10Jaana lo ikaeletse go ntsha bana ba Juta le Jerusalema batlhanka le malata mo go lona; mme le mo go lona a ga go na ditlolo tse e leng tsa lona fa pele ga Jehofa Modimo wa lona?

11Ke gone jaana nkutlweng, lo buse ditshwarwa tse lo di tshwereng tsa bana ba rraeno, gonne bogale jo bo tukang jwa ga Jehofa bo mo go lona.”

12Foo banna bangwe ba ditlhogo tsa Baeferaime, e bong Asaria morwa Johanane, le Berekia morwa Mešilemothe, le Jehisekia morwa Shalume, le Amase morwe Hatelai, ba ema ba ganela le ba ba tswang ntweng.

13Ba ba raya ba re: “Ga lo ketla lo lere ditshwarwa mono; gonne lo ikaeletse se se tlaa lereng mo go rona tlolo fa pele ga Jehofa, go oketsa maleo a rona le tlolo ya rona; gonne tlolo ya rona e kgolo, mme Baiseraele ba tsogetswe ke bogale jo bo tukang.”

14Foo batho ba ba tlhometseng ba tlogela ditshwarwa le thopo fa pele ga dikgosana le phuthego yotlhe.

15Banna ba ba badilweng ka maina, ba ema, ba tsaya ditshwarwa, mme botlhe ba ba sa tswalang mo go bone ba ba tswesa ka dilo tsa thopo, ba ba kgabisa, ba ba rwesa ditlhako, ba ba naya go ja le go nwa, ba ba tlotsa, mme botlhe ba ba bokoa mo go bone ba ba palamisa mo dieseleng, ba ba lere mo Jeriko, motse wa makolane, mo baneng ba ga rraabo, foo ba itse go boela kwa Samaria.

16E rile ka lobaka loo kgosi Ahase a roma kwa dikgosing tsa Asiria gore di tle go mo thusa.

17Gonne Baetome ba ne ba bile ba tsile ba kgemethile Bajuta, mme ba ba tlositse e le ditshwarwa.

18Bafilisitia le bone ba ne ba tlhasetse metse ya kwa sekhuting, le ya Juta ntlheng ya borwa, ba bile ba thopile Bethešemeše, le Aiyalone, le Geterothe, le Soko le metse ya teng, le Timena le metse ya teng, le Gimeso le metse ya teng; mme ba aga gone.

19Gonne Jehofa o ne a kokobetsa Bajuta ka ntlha ya ga Ahase kgosi ya Iseraele; gonne o ne a dirile ka botlhoka ditlhong mo Juta, me a leofela Jehofa mo go botlhoko.

20Tilegathe-pilenesere kgosi ya Asiria a tla mo go ene, a mo pitlaganya, a se ka a mo thatafatsa.

21Gonne Ahase o na a tsaya bontlhanngwe jwa dilo mo ntlong ya ga Jehofa, le mo ntlong ya kgosi, le ya dikgosana, mme a di naya kgosi ya Asiria; mme ga se ka ga mo thusa.

22E rile mo lobakeng lwa pitlagano ya gagwe a fela a leofela Jehofa bogolo, ene yoo kgosi Ahase.

23Gonne o na a isetsa medimo ya Damaseko tlhabelo, yone e e mo kgemethileng, mme a re: “E re ka medimo ya dikgosi tsa Siria e ne ya ba thusa, ke gone ka moo ke tlaa e isetsang tlhabelo, gore e nthuse.” Mme ga nna tshenyego ya gagwe le ya Baiseraele botlhe.

24Ahase a phutha dilwana tsa ntlo ya Modimo, a remaganya dilwana tsa ntlo ya Modimo, a tswala ntlo ya ga Jehofa; a itirela dibeso mo kgokgotshong nngwe le nngwe ya Jerusalema.

25Mo motseng mongwe le mongwe wa Juta a dira mafelo a a tlotlometseng a go fisetsa medimo e sele maswalo gone, a tlhotlheletsa Jehofa Modimo wa borraagwe bogaleng.

26Ditiro tse dingwe tsa gagwe le ditsela tsotlhe tsa gagwe, tsa ntlha le tsa morago, bonang, di kwadilwe mo lokwalong lwa dikgosi tsa Juta le Iseraele.

27Mme Ahase a robala le borraagwe, mme ba mo fitlha mo motseng e bong mo Jerusalema; gonne ga ba a ka ba mo lere mo diphupung tsa dikgosi tsa Iseraele. Mme Hesekia morwawe a busa mo boemong jwa gagwe.

← Chapter 27 Jump to: Chapter 29 →