Deuteronomy 10

Tswana (BAEBELE e e Boitshepo) 1992

← Chapter 9 Jump to: Chapter 11 →

1“E rile ka baka loo Jehofa a nthaya a re: ‘Ipetlele matlapa a le mabedi a a tshwanang le a ntlha, o tlhatlogele kwano go nna mo thabeng, o bo o itirele letlole la logong.

2Ke tlaa kwala mo matlapeng a, mafoko a a ne a le mo matlapeng a ntlha a o a thubileng, mme o tlaa a tsenya mo letloleng.’

3“Jalo ka dira letlole ka mokala, ka betla matlapa a a tshwanang le a ntlha, ka tlhatloga mo thabeng ke tshotse matlapa a mabedi ka seatla.

4Mme a kwala mo matlapeng, jaaka go kwalwa ga ntlha, ditaolo tse some, tse Jehofa o ne a di buile le lona mo thabeng a le mo gare ga molelo ka letsatsi la phuthego, mme Jehofa a a nneela.

5Ka retologa ka fologa mo thabeng, ka tsenya matlapa mo letloleng le ke ne ke le dirile; ke gone kwa a gone jaaka Jehofa a ntaotse.”

6Bana ba Iseraele ba bothologa ba tswa Beerothe-bene-jaakane ba ya kwa Mosera; Arone a swela gone, a ba a fitlhwa gone; mme Eleasare morwawe a direla mo tirong ya boperesiti mo boemong jwa gagwe.

7Go tloga foo ba etela kwa Gutegota; go tswa Gutegota ba ya kwa Jotebatha, lefatshe la dinokana tsa metsi.

8Ya re ka baka loo Jehofa a lomolola lotso lwa ga Lefi, go tla ba rwala letlole la kgolagano ya ga Jehofa, le go ema fa pele ga Jehofa go mo direla, le go segofatsa ka leina la gagwe, nako e sa le eno.

9Ke gone ka moo Lefi o se nang kabelo le fa e le boswa mo baneng ba ga rraagwe; Jehofa ke ene boswa jwa gagwe, jaaka Jehofa Modimo wa gago a ne a bua nae.

10“Ka tlhola mo thabeng, jaaka ga ntlha, malatsi a le 40 le masigo a le 40, mme Jehofa a ntlheetsa le ka lone lobaka loo; Jehofa a se ka a ikutlwa go go senya.

11Jehofa a ntlhaya a re: ‘Nanoga, o etelele tšhaba e pele; ba tlaa tsena ba ya go rua lefatshe le ke le ikanetseng borra ba bone go le ba naya.’

12“Jaana wena Iseraele, ana Jehofa Modimo wa gago o lopang mo go wena, fa e se gore o boife Jehofa Modimo wa gago, go sepela mo ditseleng tsotlhe tsa gagwe, le go mo rata, le go direla Jehofa Modimo wa gago ka pelo yotlhe ya gago le ka mowa otlhe wa gago.

13Go tshegetsa ditaolo tsa ga Jehofa, le ditao tsa gagwe, tse ke di go laolelang gompieno, gore go nne molemo mo go wena?

14Bona, legodimo ke la ga Jehofa Modimo wa gago, le legodimo la magodimo, le lefatshe le tsotlhe tse di mo go one.

15Jehofa o ne a kgatlhega fela mo go borraeno go ba rata, a itshenkela losika lwa bone morago ga bone, e bong lona, mo ditšhabeng tsotlhe jaaka go ntse gompieno.

16Ke gone rupisang dipelo tsa lona, mme lo se tlhole lo nna thamo di thata.

17Gonne Jehofa Modimo wa lona ke one Modimo wa medimo le Morena wa barena, Modimo o mogolo o o nonofileng, o o boitshegang, o o sa tlhokomeleng bomangmang jwa batho, le fa e le go amogela tuelo.

18O dirisetsa masiela le mosadi wa motlholagadi katlholo, o rata moeng ka go mo naya dijo le diaparo.

19Ke gone lo rateng moeng, gonne lo ne lo le baeng mo lefatsheng la Egepeto.

20O boife Jehofa Modimo wa gago; o direle ene; o ngaparele ene, o ikane ka leina la gagwe.

21Ke ene pako ya gago, ke ene Modimo wa gago o o go diretseng dilo tse dikgolo tse di boitshegang tse, tse matlho a gago a di bonyeng.

22Borraeno ba ne ba fologela kwa Egepeto, e le batho ba le 70 fela; jaanong Jehofa Modimo wa gago o go dirile jaaka dinaledi tsa legodimo ka bontsi.

← Chapter 9 Jump to: Chapter 11 →