Deuteronomy 4 — Tswana (BAEBELE e e Boitshepo) 1992

1“Jaana wena Iseraele, reetsa ditaelo le dikatlholo tse ke di go rutang go di dira; gore lo tshele, le gore lo tsene lo ye go rua lefatshe le Jehofa, Modimo wa borraa lona, o le lo nayang.

2Lefoko le ke le lo laolelang lo se ka lwa le oketsa, le gone lo se ka lwa le fokotsa, gore lo tle lo tshegetse ditaolo tsa ga Jehofa Modimo wa lona, tse ke di lo laolelang.

3Matlho a lona a bonye se Jehofa o ne a se dira ka ntlha ya Baale-peore; gonne banna botlhe ba ba setseng Baale-peore morago, Jehofa Modimo o ba senyeditse ruri mo gare ga gago.

4Mme lona ba lo ngaparetseng Jehofa Modimo wa lona, lo tshedile lotlhe le gompieno.

5“Gonne go na le morafe o mogolo

6“Bonang, ke lo neile ditaetso le dikatlholo, fela jaaka Jehofa Modimo wa me a ntaotse, gore lo dire jalo mo gare ga lefatshe le lo tsenang mo go lone lo ya go le rua.

7Ke gone, lo di tshegetseng lo di dire; gonne mo ke botlhale jwa lona, le tlhaloganyo ya lona, mo ponong ya ditšhaba, tse di tlaa utlwang ditao tse, mme di re: ‘Ruri morafe o mogolo o, ya bo e le tšhaba e e tlhalefileng, e e tlhaloganyang.’ ofe o o nang le modimo mongwe o o gaufi nao, jaaka Jehofa Modimo wa rona o ntse gongwe le gongwe, mogang re o bitsang gone?

8Go na le morafe o mogolo ofe o o nang le ditao le dikatlholo tse di siameng jaaka molao o otlhe, o ke o bayang fa pele ga lona gompieno?

9O itise fela, mme o boloke mowa wa gago thata gore o se lebale dilo tse matlho a gago a di bonyeng, le gore di se tloge mo pelong ya gago ka malatsi otlhe a botshelo jwa gago; o bo o di itsise bana ba gago le bana ba bana ba gago;

10letsatsi le o ne wa ema ka lone fa pele ga Jehofa Modimo wa gago mo Horebe, jale ka Jehofa a nthaya a re: ‘Mphuthela batho, mme ke tlaa ba utlwisa mafoko a me, gore ba tle ba ithute go mpoifa ka malatsi otlhe a ba tlaa tshelang ka one mo lefatsheng, le gore ba rute bana ba bone.’

11“Lwa atamela lwa ema ka fa tlase ga thaba, mme thaba ya tuka molelo, wa tukela kwa bogareng ja legodimo, go bile ga nna lefifi, le maru, le lefifi le le kwenneng.

12Jehofa a bua le lona a le mo gare ga molelo; lo no lwa utlwa lentswe le le buang, mme lo se ka lwa bona popego epe, lwa utlwa lentswe fela.

13A lo bolelela kgolagano ya gagwe, e o e lo laoletseng gore lo e dire, e bong ditaolo tse some, mme a di kwala mo matlapeng a le mabedi.

14Jehofa a ntaola ka baka loo, gore ke lo rute ditao le dikatlholo, gore lo di dire mo lefatsheng le lo kgabagabyetsang kwa go lone go le rua.

15“Ke gone lo itiseng thata; gonne ga lo a ka lwa bona popego epe ka tsatsi le Jehofa a buileng le lona ka lona mo Horebe a le mo gare ga molelo;

16gore lo tle lo se ka lwa ipodisa, lwa itirela setshwantsho se se setilweng, se se tshwanang le popego nngwe ya setshwano sa se setona, kgotsa sa se senamagadi,

17le fa e le setshwano sa setshedi sengwe se se mo lefatsheng, le fa e le setshwano sa nonyane nngwe e e diphuka e e fofang mo loaping,

18le fa e le setshwano sa sengwe se se gagabang fa fatshe, le fa e le setshwano sa tlhapi nngwe e e mo metsing tlase ga lefatshe.

19Le gone gore o tle o se ka wa tsholeletsa matlho a gago legodimong, mme ya re o bona letsatsi le kgwedi le dinaledi, le lesomosomo lotlhe la legodimo, wa faposediwa koo wa di obamela, wa di direla, e le dilo tse Jehofa Modimo wa gago o di abetseng ditšhaba tsotlhe tse di fa tlase ga legodimo lotlhe fela.

20Mme Jehofa o tshotse lona, a lo ntsha mo leisong la leubelo la tshipi, e bong mo Egepeto, gore lo nne tšhaba ya boswa mo go ene, jaaka go ntse gompieno.

21Gape Jehofa o ne a nna bogale le nna ka ntlha ya lona, mme a ikana a re: ga nketla ke kgabaganya Joretane, a ba a re ga nketla ke ya go tsena mo lefatsheng le le molemo leo, le Jehofa Modimo wa gago o le nayang go nna boswa.

22Ke na le go swela mo fatsheng leno, ga ke na go kgabaganya Joretane; lona lo tlaa kgabaganya, lo ya go rua lefatshe le le molemo lele.

23Lo itise, gore lo se ka lwa lebala kgolagano ya ga Jehofa Modimo wa lona, e o e dirileng le lona, lwa itirela setshwantsho se se setilweng se se mo popegong ya sengwe se Jehofa Modimo wa gago o se go ileditseng.

24Gonne Jehofa Modimo wa gago ke molelo o o lailang, ke Modimo o o lefufa.

25“E tlaa re mogang o tsholang bana le bana ba bone, lo ntse lo dule mo lefatsheng, lo ipodisa lo dira setshwantsho se se setilweng mo popepong ya sengwe, mme lo dira se se bosula mo ponong ya Jehofa Modimo wa lona go mo tlhotlheletsa mo bogaleng;

26ke lo biletsa legodimo le lafatshe gompieno go supa ka ga lona, gore lo tlaa akofa lo nyelelela ruri mo lefatsheng le lo kgabaganyang Joretane lo ya go le rua; ga lo ketla lo lelefatsa malatsi a lona mo go lone, mme lo tlaa senyediwa ruri.

27Jehofa o tlaa lo gasanyetsa mo ditšhabeng, lo tlaa sadisiwa lo le bannye fela mo merafeng e Jehofa o tlaa lo gogelang kwa go yone.

28Gone lo tlaa direla medimo e e leng tiro ya diatla tsa batho ka logong le lentswe, e le e e sa boneng, e e sa utlweng, e e sa jeng, e e sa dupeng ka nko.

29E tlaa re lo le gone fa lo ka batla Jehofa Modimo wa gago, o tlaa mmona, fa o mo senka ka pelo yotlhe ya gago le ka mowa otlhe wa gago.

30E tlaa re o le mo pitlaganong mme dilo tse tsotlhe di go wetse, fa e tlaa re mo metlheng ya bofelo o boela mo go Jehofa Modimo wa gago, o reetsa lentswe la gagwe,

31ka Jehofa Modimo wa gago e le Modimo o o boutlwelobotlhoko; ga a ketla a go tlogela, le gone ga a ketla a go senya, le fa e le go lebala kgolagano ya borraago e o ne a e ba ikanela.

32“Gonne, a ko lo botseng jaana ka ga malatsi a a fetileng, a a ne a ntse pele ga gago, a a sa leng ka Modimo o bopa motho mo lefatsheng, go tswa sekhutlong sengwe sa legodimo go ya sekhutlong se sengwe, go re: A go kile ga ne go le sengwe se se tshwanang le se segolo se, le fa e le go utlwelwa, se se tshwanang naso?

33A tšhaba nngwe e kile ya utlwa lentswe la Modimo, gongwe le bua le le mo gare ga molelo, jaaka wena o utlwile, mme ya tshela?

34Kgotsa a Modimo o kile wa leka go ya go itseela morafe mo gare ga morafe o mongwe ka diteko, ka ditshupo, ka dikgakgamatso, le ka dintwa, ka letsogo la bonatla, ka letsogo le le otlologileng le ka ditheregiso tse dikgolo, jaaka tsotlhe tse Jehofa Modimo wa lona o di lo diretseng kwa Egepeto fa pele ga matlho a lona?

35Ga supediwa wena, gore o itse fa Jehofa e le ene Modimo; ga go na ope o sele kwa ntle ga one.

36O go utlwisitse lentswe la gagwe le tswa kwa legodimong, gore a tle a go rute; mo lefatsheng o go bontshitse molelo wa gagwe o mogolo; wa utlwa mafoko a gagwe a tswa mo gare ga molelo.

37E re ka a rata borraago, ke gone ka fa o ne a itshenkela losika lwa bone ka gone morago ga bone, a go ntsha ka sebonalo sa gagwe mo Egepeto, ka thata ya gagwe e kgolo;

38go tla a leleka fa pele ga gago merafe e megolo le e e thata bogolo go wena, le go go isa mo teng, go go ruisa lefatshe la bone jaaka go ntse gompieno.

39Ke gone itse gompieno, o go tsenye mo pelong, gore Jehofa ke ene Modimo kwa legodimong kwa godimo, le mo lefatsheng fa tlase; ga go na ope o sele.

40O tshegetse ditao tsa gagwe, le ditaolo tsa gagwe, tse ke di go laolelang gompieno, gore go nne sentle nao, le bana ba gago morago ga gago, le gore o lelefatse malatsi a gago mo lefatsheng le Jehofa Modimo wa gago o le go nayang ka bosakhutleng.”

41Foo Moše a lomolola metse e le meraro moseja ga Joretane, ntlheng ya botlhabatsatsi;

42gore mmolai wa motho a tshabele gone, yo o bolayang wa ga gabo a sa itse, a sa mo ila mo metlheng e e fetileng; le gore fa a tshabetse kwa go mongwe wa metse e, a tle a tshele:

43E bong, Besere mo nageng mo lefatsheng la lobala, e le wa Barubene; le Ramothe mo Gileate, e le wa Bagate le Golane mo Bašane, e le wa Bamanase.

44O, ke one molao o Moše o o beileng fa pele ga bana ba Iseraele.

45Tse ke tsone ditshupo le ditao le dikatlholo tse Moše o di buileng le bana ba Iseraele ba tswa Egepeto,

46moseja ga Joretane, mo molapong o o lebaganyeng le Bethepeore, mo lefatsheng la ga Sihone kgosi ya Baamore, ba ba neng ba agile mo Hešebone, ba Moše le bana ba Iseraele ba ba kgemethileng ka ba tswa kwa lefatsheng la Egepeto,

47ba gapa lefatshe la gagwe ba le rua, le lefatshe la ga Oge kgosi ya Bašane, dikgosi tse pedi tsa Baamore, ba ba neng ba le moseja ga Joretane, ntlheng ya botlhabatsatsi;

48go tswa Aroere, o o fa ntlheng ya molapo wa Arenone, go ya fela kwa thabeng ya Sione (ke yone Heremone),

49le molapo otlhe wa Areba moseja ga Joretane ntlheng ya botlhabatsatsi go ya fela kwa lewatleng la Areba, fa tlase ga meripo ya Pisega.