Deuteronomy 16

Tswana (BAEBELE e e Boitshepo) 1992

← Chapter 15 Jump to: Chapter 17 →

1“Tlhokomela kgwedi ya Abibe, o tshegeletse Jehofa Modimo wa gago tlolaganyo; gonne Jehofa Modimo wa gago o go ntshitse kwa Egepeto go le bosigo, ka yone kgwedi ya Abibe.

2O tlhabele Jehofa Modimo wa gago tlolaganyo, ya matsomane le ya matlhape, kwa felong fa Jehofa o tlaa go itshenkelang go agisa leina la gagwe gone.

3O se ka wa e ja le senkgwe se se bedisitsweng; o e je le senkgwe se se sa bedisiwang ka malatsi a supa, e bong senkgwe sa pogiso; gonne o dule mo lefatsheng la Egepeto ka potlako; gore letsatsi le o duleng ka lone mo lefatsheng la Egepeto o le gakologelwe ka malatsi otlhe a botshelo jwa gago.

4Go se bonwe sebediso nao mo melelwaneng yotlhe ya gago ka malatsi a supa; le gone nama e o e tlhabang ka letsatsi la ntlha go le maitsebowa, go se ka ga lala epe e ya go fitlhelwa ke moso.

5“Ga o kake wa tlhaba tlolaganyo mo teng ga dikgoro dipe tsa gago, tse Jehofa Modimo wa gago o di go nayang,

6fa e se kwa felong fa Jehofa Modimo wa gago o tlaa go itshenkelang go agisa leina la gagwe gone; ke gone kwa o tlaa tlhabelang tlolaganyo gone go le maitsebowa, letsatsi le phirima, ka lobaka lwa ngwaga lo o duleng ka lone kwa Egepeto.

7O e bese mo felong fa Jehofa Modimo wa gago o tlaa go itshenkelang, mme e re ka moso o menoge o ye kwa megopeng ya gago.

8O je senkgwe se se sa bedisiwang ka malatsi a le marataro, mme e re ka letsatsi la bosupa go nne phuthego e e masisi ya ga Jehofa Modimo wa gago, o se ka wa dira tiro epe mo go lone.

9“O ipalele dibeke di supa, go simolola ka lobaka lo o tsenyang thipa mo mabeleng a a emeng ka lone, o simolole go bala dibeke di supa.

10Modiro wa dibeke, o o tshegeletse Jehofa Modimo wa gago ka lekgetho la tshupelo ya peleego, le tswa seatleng sa gago, le o tlaa le ntshang, ka fa Jehofa Modimo wa gago o go segofaditseng ka gone.

11O itumele fa pele ga Jehofa Modimo wa gago, wena le morwao, le morwadio, le motlhanka wa gago, le lelata la gago, le Molefi yo o mo teng ga dikgoro tsa gago, le moeng le lesiela, le motlholagadi, ba ba mo gare ga gago mo felong fa Jehofa Modimo wa gago o tlaa go itshenkelang go agisa leina la gagwe gone.

12O gakologelwe fa o ne o le mogolegwa mo Egepeto; mme o tlhokomele, o dire ditao tse.

13“O tshegetse modiro wa diobo ka malatsi a supa, o sena go rora kwa seboping sa gago sa pholelo, le kwa kgatisetsong ya gago ya bojalwa jwa mofine.

14O itumele mo moletlong wa gago, wena le morwao, le morwadio, le motlhanka wa gago, le lelata la gago, le Molefi, le moeng, le lesiela, le motlholagadi, ba ba mo teng ga dikgoro tsa gago.

15Tshegeletsa Jehofa Modimo wa gago modiro ka malatsi a supa, mo felong fa Jehofa o tlaa go itshenkelang; gonne Jehofa Modimo wa gago o tlaa go segofatsa mo totafalelong yotlhe ya gago, le mo tirong yotlhe ya diatla tsa gago, mme o tlaa itumela gotlhe fela.

16“Lonna lotlhe lwa gago lo bonale fa pele ga Jehofa Modimo wa gago gararo ka ngwaga, mo felong fa o tlaa go itshenkelang; mo moletlong wa senkgwe se se sa bedisiwang, le mo moletlong wa dibeke, le mo moletlong wa diobo; ba se ka ba bonala fa pele ga Jehofa ba iphotlhere fela.

17A monna mongwe le mongwe a ntshe ka fa o nonofileng ka gone, ka fa tshegofatsong e Jehofa Modimo wa gagwe o e mo neileng.

18“Itlhomele baatlhodi le maotlana mo dikgorong tsa gago tsotlhe, tse Jehofa Modimo wa gago o di go nayang, ka fa ditsong tsa gago, mme ba atlhole batho ka katlholo e e siameng.

19O se ka wa soka katlholo; o se ka wa tlhokomela bomangmang jwa batho; le gone o se ka wa amogela neo; gonne neo e tle e foufatse matlho a yo o botlhale, e sokamise mafoko a mosiami.

20Se se siameng sotlhesotlhe fela ke sone se o tlaa se salang morago, gore o tshele, o je lefatshe boswa le Jehofa Modimo wa gago o le go nayang.

21O se ka wa itirela modimako wa setlhare sepe fa sebesong sa ga Jehofa Modimo wa gago, se o tlaa se itirelang.

22Le gone o se ka wa itlhomela lentswe le le motloutlo, le Jehofa Modimo wa gago o le ilang.

← Chapter 15 Jump to: Chapter 17 →