Deuteronomy 14

Tswana (BAEBELE e e Boitshepo) 1992

← Chapter 13 Jump to: Chapter 15 →

1“Lo bana ba ga Jehofa Modimo wa lona; lo se ka lwa itshega mmele, le fa e le go ipeolela baswi fa gare ga phatla.

2Gonne o sešaba se se itshepileng sa ga Jehofa Modimo wa gago, Jehofa o go itshenketse gore o nne sešaba sa gagwe sa boswabotshwerwe, go feta ditšhaba tsotlhe tse di mo lefatsheng.

3“O se ka wa ja sepe se se moila.

4Ditshedi tse lo ka di jang ke tse: Kgomo, nku, podi,

5kwalata, le tshephe, le tholo, le mhele, le phala, le kukama le mokabawane.

6Le setshedi sengwe le sengwe mo ditsheding, se se patologanyang tlhako, se tlhako ya sone e maphata, mme se otla, lo ka se ja.

7Le fa go ntse jalo, mo go tse di otlang lo se ka lwa ja tse, le mo go tse di fatogileng tlhako: E bong kamela, mmutla le pela, gonne dilo tseo dia otla, mme ga di patologanye tlhako, di lo itshekologetse;

8le kolobe e lo itshekologetse, gonne e patologanye tlhako, mme ga e otle; lo se ka lwa ja nama ya tsone, le gone lo se ka lwa ama setoto sa tsone.

9“Mo go tse di nnang mo metsing lo ka ja tse: Le fa e le eng se se nang le diphuka le makape lo ka se ja.

10Mme le fa e le eng se se nang diphuka le makape lo se ka lwa se ja; se lo itshekologetse.

11“Lo ka ja dinonyane tsotlhe tse di itshekileng.

12Tse ke tsone tse lo sa kakeng lwa di ja: Ntswi yo motona, kgonyaitlhwe, le kgwadire;

13le nkgwedi, le malelakokwane, le phakalane ka fa losikeng lwa yone;

14le magakabe otlhe ka fa losikeng lwa one.

15Ntšhe, le lerololwane, le dinong tsa lewatle le le segodi ka fa losikeng lwa sone;

16le morubisana, le morubisi le makgotlwe;

17le kukara, lenong, le timeletswane;

18le lewang, le kokolohute ka fa losikeng lwa yone, le letheetšane, le mmamathwane.

19“Dilo tsotlhe tse di diphuka, mme di gagaba, di lo itshekologetse, a di se jewe.

20Lo ka ja dinonyane tsotlhe tse di itshekileng.

21“Lo se ka lwa ja sepe se se suleng fela; o ka se naya moeng yo o mo teng ga dikgoro tsa gago, gore a se je; kgotsa o ka se rekisa mo mothong wa tšhaba e sele; gonne wena o sešaba se se itshepetseng Jehofa Modimo wa gago. O se ka wa tlhadia potsane ka maši a mmaayo.

22“Ruri o tlaa ntsha sa bosome sa totafalo ya peo ya gago, e e tswang mo masimong ka ngwaga le ngwaga.

23O jele fa pele ga Jehofa Modimo wa gago sa bosome sa mabele a gago, le sa bojalwa jwa gago jwa mofine, le sa lookwane lwa gago, le tsa maitibolo a matlhape a gago le matsomane a gago, o di jele mo felong fa o tlaa go itshenkelang go baya leina la gagwe gone; gore o tle o ithute go boifa Jehofa Modimo wa gago ka metlha yotlhe.

24Fa tsela e le telele bobe mo go wena, mme o retelelwa ke go di isa, ka ntlha ya gonne go le kgakala bobe kwa Jehofa Modimo wa gago o go itshenkelang go baya leina la gagwe gone, mogang Jehofa Modimo wa gago o go segofatsang,

25foo o di fetole madi, mme o a tseye a bofeletswe, o ye kwa Jehofa Modimo wa gago o tlaa go itshenkelang.

26Madi ao o a ntshetse se mowa wa gago o se eletseng, a dikgomo, kgotsa dinku, kgotsa bojalwa jwa mofine, kgotsa bojalwa jo bo loileng, kgotsa sengwe fela se mowa wa gago o se lopang mo go wena; o jele gone fa pele ga Jehofa Modimo wa gago, mme o itumele, wena le bantlo ya gago.

27“Molefi yo o mo teng ga dikgoro tsa gago, o se ka wa mo latlha; ka gonne ga a na kabelo le fa e le boswa nao.

28E re go fetile dinyaga dingwe di le tharo, o ntshe sa bosome sa totafalo ya gago ya ngwaga oo, mme o se beye mo teng ga dikgoro tsa gago;

29mme Molefi, ka a se na kabelo le fa e le boswa nao, le moeng, le lesiela, le mosadi wa motlholagadi, ba ba mo teng ga dikgoro tsa gago, ba tlaa tla, ba ja ba kgora; gore Jehofa Modimo wa gago a go segofatse mo tirong yotlhe ya seatla sa gago, e o e dirang.

← Chapter 13 Jump to: Chapter 15 →