Deuteronomy 7

Tswana (BAEBELE e e Boitshepo) 1992

← Chapter 6 Jump to: Chapter 8 →

1“E tlaa re mogang Jehofa Modimo wa gago o go fitlhisang mo lefatsheng le o yang go le rua, a kgoromeletse ntle merafe e le mentsi fa pele ga gago: Bahite le Bagiregaše, le Baamore le Bakanana, le Baperise, le Bahife le Bajebuse, merafe e supa e megolo e e nonofileng bogolo go wena;

2mme mogang Jehofa Modimo wa gago o ba go neelang fa pele ga gago o ba kgemetha; foo o ba senyetse ruri; o se ka wa dira kgolagano epe nabo, le fa e le go nna boutlwelobotlhoko mo go bone.

3Le gone o se ka wa nyalana nabo; ngwana wa gago wa mosetsana o se ka wa mo naya ngwana wa bone wa mosimane, le gone o se ka wa tseisa ngwana wa gago wa mosimane ngwana wa bone wa mosetsana.

4Gonne o tlaa faposa morwao mo go ntshaleng morago, gore ba direle medimo e sele, jalo bogale jwa ga Jehofa bo lo tukele, mme a go senye ka bonako.

5Lo ba direle jaana: Lo rutle dibeso tsa bone, lo thubaganye maje a bone a a emeng metloutlo, lo reme medimako ya bone, le ditshwantsho tsa bone tse di setilweng lo di fise ka molelo.

6Gonne o tšhaba e e itshepetseng Jehofa Modimo wa gago; Jehofa Modimo wa gago o go itshenketse gore o nne tšhaba ya gagwe e e tlhaolegileng, go feta ditšhaba tsotlhe tse di mo lefatsheng.

7“Jehofa ga a ka a tlhoma lorato lwa gagwe mo go lona, le fa e le go lo itshenkela, ka gore lo ne lo feta ditšhaba tsotlhe ka bontsi; gonne lo ne lo le babotlana mo ditšhabeng tsotlhe fela.

8Jehofa a lo ntsha ka letsogo le le nonofileng, a lo rekolola mo ntlong ya botlhanka, mo seatleng sa ga Faro kgosi ya Egepeto, ka gobo Jehofa o a lo rata, le ka gobo a rata go tlhomamisa ikano e o ne a e ikanetse borra ba lona.

9Ke gone, itse fa Jehofa Modimo wa gago e le ene Modimo, Modimo o boikanngo, o o tlhomamisang kgolagano ya one le boutlwelobotlhoko jwa one, mo go bone ba ba o ratang, le ba ba tshegetsang ditaolo tsa one, go ya le dikokomana di le sekete.

10Ba ba o ilang, o ba lefele mo matlhong, o ba senye; ga o ketla o nyafalela ene yo o o ilang; o tlaa mo lefela mo matlhong fela.

11Ke gone o tshegetse taolo, le ditao, le dikatlholo tse ke di go laolelang gompieno, go di dira.

12“Go tlaa dirala gore e tlaa re fa lo tlaa bo lo reeditse dikatlholo tse, lo di tshegetsa, lo di dira, Jehofa Modimo wa gago o tlaa go tlhomamisetsa kgolagano le boutlwelobotlhoko jo o bo ikanetseng borraeno.

13O tlaa go rata a go segofatsa, a go ntsifatsa; le gone o tlaa segofatsa loungo lwa mmele wa gago, le loungo lwa lefatshe la gago, mabele a gago, le bojalwa jwa gago jwa mofine, le lookwane lwa gago, loato lwa logamo lwa gago, le loonyana lwa letsomane la gago, mo lefatsheng le le ikanetseng borraeno, a re o tlaa le ba naya.

14O tlaa segofadiwa bogolo go ditšhaba tsotlhe; ga go ketla go nna le moopa mo go lona wa monna kgotsa wa mosadi kgotsa mo dikgomong tsa lona.

15Jehofa o tlaa tlosa bolwetse jotlhe mo go wena; ga a ketla a baya mo go wena bolwetse bope jwa matlhoko a a bosula a Egepeto, a o a itseng; o tlaa a baya mo go botlhe ba ba go ilang.

16O nyeletse ditšhaba tsotlhe tse Jehofa Modimo wa gago o tlaa di go neelang; leitlho la gago le se ba utlwele botlhoko, le gone o se ka wa direla medimo ya bone; gonne moo e tlaa bo e le seru mo go wena.

17“E tlaa re fa o bua mo pelong ya gago o re: ‘Merafe e, e mentsi e a mpheta; ke tlaa e ruolola jang?’

18O se ka wa e boifa; o gakologelwe sentle se Jehofa Modimo wa gago o se diretseng Faro, le lefatshe lotlhe la Egepeto;

19diteko tse dikgolo tse matlho a gago a di bonyeng, le ditshupo, le dikgakgamatso, le letsogo la nonofo, le letsogo le le otlologileng, dilo tse Jehofa Modimo wa gago o go ntshitseng ka tsone; Jehofa Modimo wa gago o tlaa direla jalo ditšhaba tsotlhe tse o di boifang.

20Gape Jehofa Modimo wa gago o tlaa tlisa moruthwane mo go bone; go tle go tsamaye ba ba setseng, mme ba iphitlha, ba nyelele fa pele ga gago.

21O se ka wa ba tshoga; gonne Jehofa Modimo wa gago o mo gare ga gago, e le Modimo o mogolo o o boitshegang.

22Jehofa Modimo wa gago o tlaa kgoromeletsa ntle merafe eo fa pele ga gago ka thafolo; ga o kake wa e nyeletsa ka lobaka lo le longwe fela, dibatana tsa naga di ka tla tsa go atela.

23Mme Jehofa Modimo wa gago o tlaa e go neela fa pele ga gago, mme o tlaa ba tseanya ka tseanyo e kgolo, go tsamaya e senyega.

24O tlaa tsenya dikgosi tsa yone mo seatleng sa gago, o tlaa dira gore maina a yone a nyelelele ruri fa tlase ga legodimo, ga go ketla go nna monna ope yo o ka nonofang go ema fa pele ga gago, go tle go tsamaye o e senye.

25Ditshwantsho tse di setilweng tsa medimo ya yone lo di fise ka molelo; o se ka wa eletsa selefera kgotsa gouta tse di mo go yone, le fa e le go di itseela; o ka tla wa raelwa ke tsone; gonne ke makgapha mo go Jehofa Modimo wa gago.

26Le gone o se ka wa isa se se makgapha mo ntlong ya gago, wa tswa selo se se neeletsweng jaaka sone; o se ilele ruri, o se tlhoele ruri, gone ke selo se se neeletsweng.

← Chapter 6 Jump to: Chapter 8 →