Deuteronomy 25

Tswana (BAEBELE e e Boitshepo) 1992

← Chapter 24 Jump to: Chapter 26 →

1“E re fa go na le kgang mo banneng, mme ba ya katlholong, mme baatlhodi ba ba atlhola; foo a ba siamisetse mosiami, mosiamolodi ba mo sekise;

2fa mosiamolodi a tshwanetse go bediwa, moatlhodi a laole gore a kgwathe, a bediwe fa pele ga matlho a gagwe, palo ya dithupa e le ka fa tshiamololong ya gagwe.

3O ka mmaya dithupa di le 40, mme a se ka a di fetisa, gonne fa a fetisa, mme a mmaya dithupa di le dintsi tse di fetang tseo, foo ngwana wa ga rraago o ka tla a kaiwa selo fela mo go wena.

4“O se ka wa bofa kgomo molomo fa e photha mabele.

5“Fa bana ba monna ba agile mmogo, mongwe wa bone a swa, mme a se na ngwana wa mosimane, mosadi wa moswi a se ka a nyalelwa kwa ntle ke moeng; a morwa rra monna wa gagwe a tsene kwa go ene, a mo tseye go nna mosadi, a mo direle tshwanelo ya morwa rra monna.

6Ngwana yo o tlaa mo tsalang pele, a tsalelwe leina la ga morwa rraagwe yo o suleng, gore leina la gagwe le se ka la phimoga mo Iseraele.

7Fa monna yoo a sa rate go tsaya mosadi wa ga morwa rraagwe, foo mosadi wa ga morwa rraagwe a ye kwa bagolong kwa kgotleng ya motse, a re: ‘Morwa rra monna wa me o gana go tsosetsa morwa rraagwe leina mo go Iseraele, o gana go ntirela tshwanelo ya morwa rra monna wa me.’

8Foo a bagolwane ba motse ba mmitse, ba bue nae; fa a ema, a re: ‘Ga ke rate go mo tsaya;’

9foo mosadi wa morwa rra monna wa gagwe a ye kwa go ene fa pele ga bagolo a mo role setlhako, a mo kgwele mathe mo sefatlhogong mme a mo fetole a re: ‘A go direlwe jalo monna yo o sa ageng ntlo ya ga morwa rraagwe.’

10Leina la gagwe monna le bidiwe mo Iseraele, go twe: ‘Ntlo ya yo o rotsweng setlhako.’

11“E re fa banna ba lwa mmogo, mme mosadi wa yo mongwe a atamela a tla go golola monna wa gagwe mo seatleng sa yo o mo itayang, mme a ntsha letsogo a mo gamutla ka lepele;

12foo o kgaole mosadi letsogo; leitlho la gago le se ka la mo utlwela botlhoko gope.

13“O se ka wa nna le di lekanya bokete tse di mefuta mebedi e e fapaanyeng mo kgetseng ya gago, tse dikgolo le tse dinnye.

14O se ka wa dira le dielo tse di fapaanyeng mo ntlong ya gago, tse dikgolo le tse dinnye.

15O nne le sebokete se se lekanyang se se itekanetseng, se se siameng; o bo o nne le seelo se se itekanetseng, se se siameng; gore malatsi a gago a nne maleele mo lefatsheng le Jehofa Modimo wa gago o le go nayang.

16Gonne botlhe ba ba dirang dilo tse di ntseng jalo, e bong botlhe ba ba dirang ka tshiamololo, ba makgapha mo go Jehofa Modimo wa gago.

17“Gakologelwa se Amaleke o se go diretseng mo tseleng fa lo tswa kwa Egepeto;

18ka fa o ne a go kgatlhantsha mo tseleng ka gone, a go bolaela ba ba kwa morago, botlhe ba ba bokoa fa morago ga gago, ka o ne o lapile o tsenywe ke letsapa; a se ka a boifa Modimo.

19Ke gone a e re Jehofa Modimo wa gago a sena go go naya boikhutso mo babeng botlhe ba gago mo tikologong, mo lefatsheng le Jehofa Modimo wa gago o le go nayang go nna boswa go le rua, o phimolele ruri kgakologelo ya ga Amaleke fa tlase ga legodimo; o se ka wa lebala.

← Chapter 24 Jump to: Chapter 26 →