Deuteronomy 8

Tswana (BAEBELE e e Boitshepo) 1992

← Chapter 7 Jump to: Chapter 9 →

1“Taolo yotlhe e ke e go laolelang gompieno, lo e tlhokomele go e dira, gore lo tshele, lo ntsifale, lo tsene lo ye go rua lefatshe le Jehofa o ne a le ikanela borra ba lona.

2O ikgakolole tsela yotlhe e Jehofa Modimo wa gago o go gogileng ka yone, dinyaga tse di 40 tse, mo nageng, gore a go ise tlase, a go leke, a itse se se mo pelong ya gago, boo o tlaa tshegetsa ditaolo tsa gagwe kgotsa nnyaa.

3O ne a go isa tlase, a go bolaisa tlala, a go otla ka mana, a o ne o sa a itse, le fa e le bone borraeno ba ne ba sa a itse; gore a go itsise fa motho a sa tshele ka dijo di le tsosi, fa e se gore, motho o tshela ka sengwe le sengwe se se tswang mo molomong wa ga Jehofa.

4Diaparo tsa gago ga di a ka tsa go onalela, le lonao lwa gago ga lo a ka lwa ruruga, ka dinyaga tse di 40 tse.

5Le gone o akanye mo pelong ya gago gore jaaka motho a tle a otlhaye morwawe, Jehofa Modimo wa gago o a tla a go otlhaye jalo.

6O tshegetse ditaolo tsa ga Jehofa Modimo wa gago, go sepela mo ditseleng tsa gagwe, le go mmoifa.

7Gonne Jehofa Modimo wa gago, o go isa mo lefatsheng le le molemo, lefatshe la dinokana tsa metsi, la metswedi, le metlhodi e e tswelang mo megogorong le mo dithabeng;

8lefatshe la mabele le barele, la mafine, la mafeige le la magaranata; lefatshe la matlhware a lookwane le dinotshe;

9lefatshe le o tlaa jang dijo mo go lone di sa tlhokafale; ga o ketla o tlhoka sepe mo go lone; lefatshe le maje a lone a leng tshipi, le le o ka epang kgotlho mo makhubung a lone.

10O tlaa ja o kgora, mme o tlaa baka Jehofa Modimo wa gago ka ga lefatshe le le molemo le o le go neileng.

11“O itise gore o se lebale Jehofa Modimo wa gago, ka go tlhoka go tshegetsa ditalo tsa gagwe, le dikatlholo tsa gagwe, le ditao tsa gagwe tse ke di go laolelang gompieno;

12e se re gonwe o sena go ja o kgora, o agile matlo a mantle, o ntse mo go one;

13le gone e tlaa re matlhape a gago, le matsomane a gago a ntsifatse, le selefera sa gago, le gouta ya gago di ntsifetse, le tsotlhe tse o nang natso di ntsifetse,

14foo pelo ya gago e ikgogomose, mme o lebale Jehofa Modimo wa gago, yo o go ntshitseng mo lefatsheng la Egepeto, mo ntlong ya botlhanka;

15yo o ne a go goga a go ralatsa naga e kgolo le e e boitshegang, e dinoga tse di bogale le diphepheng di ntseng mo go yone, e le lefatshe le le lokgere le go se nang metsi mo go lone; yo o go ntsheditseng metsi mo lefikeng le le legakwa.

16Jehofa o ne a go jesa mo nageng ka mana, a borraeno ba ne ba sa a itse, gore a tle a go ise tlase le gore a go leke, go go direla molemo kwa bokhutlong jwa gago.

17O ba o bua mo pelong ya gago, o re: ‘Thata ya me, le nonofo ya letsogo la me, ke tsone tse di nneileng khumo e.’

18O gakologelwe Jehofa Modimo wa gago, gonne ke ene yo o go nayang thata ya go bona khumo, gore a tlhomamise kgolagano ya gagwe e o e ikanetseng borraeno, jaaka go ntse gompieno.

19Go tlaa dirala gore, e re fa o lebala Jehofa Modimo wa gago, o sala medimo e sele morago, o e direla, o e obamela, ke supa ka ga lona gompieno, ka re, ruri lo tlaa nyelela.

20Jaaka merafe e Jehofa o e nyeletsang fa pele ga lona, le lona lo tlaa nyelela jalo; gonne lo no lo gana go reetsa lentswe la ga Jehofa Modimo wa lona.

← Chapter 7 Jump to: Chapter 9 →