Deuteronomy 5

Tswana (BAEBELE e e Boitshepo) 1992

← Chapter 4 Jump to: Chapter 6 →

1Moše a bitsa Baiseraele botlhe, a ba raya a re: “Utlwang lona Baiseraele, ditao le dikatlholo tse ke di buang mo ditsebeng tsa lona gompieno, gore lo di ithute, lo di tlhokomele go di dira.

2Jehofa Modimo wa rona o ne a dira kgolagano le rona mo Horebe.

3Jehofa ga a ka a dira kgolagano eo le borraetsho, fa e se le rona fela, e bong rona ba re sa ntseng re tshedile fano rotlhe gompieno.

4Jehofa a buisanya le lona go lebanywe difatlhogo mo thabeng, a le mo gare ga molelo,

5(ke ne ka ema fa gare ga Jehofa le lona ka baka loo, go lo utlwisa lefoko la Jehofa; gonne lona lo ne lo boifa ka ntlha ya molelo, mme lo se ka lwa tlhatlogela mo thabeng;) a re:

6“Ke nna Jehofa Modimo wa gago yo ke go ntshitseng mo lefatsheng la Egepeto le mo ntlong ya botlhanka.

7“O se ka wa nna le medimo epe e sele fa e se nna.

8“O se ka wa itirela setshwantsho sepe se se setilweng, e le setshwano sa sebopego sengwe se se kwa legodimong kwa godimo, kgotsa sa se se mo lefatsheng fa tlase, kgotsa sa se se mo metsing kwa tlase ga lefatshe.

9“O se ka wa di ikobela, le fa e le go di direla, gonne, Nna Jehofa Modimo wa gago, ke Modimo o o lefufa, yo ke beletsang bana tshiamololo ya borra ba bone go ya kokomaneng ya boraro, le go ya mo go ya bone ya ba ba nkilang.

10Mme ba ba makgolokgolo a bone ba ba nthatang, ba tshegetsa ditaolo tsa me, ke ba supetse boutlwelobotlhoko.

11“O se ka wa umakela leina la ga Jehofa Modimo wa gago lefela, gonne ene yo o umakelang leina la gagwe lefela, Jehofa ga a ketla a mo kaya a se na molato.

12“Tlhokomela letsatsi la Sabata go le itshepisa, jaaka Jehofa Modimo wa gago a go laotse.

13O dire o bo o swetse ditiro tsotlhe tsa gago ka malatsi a le marataro.

14Mme letsatsi la bosupa ke Sabata wa ga Jehofa Modimo wa gago; o se ka wa dira tiro epe mo go lone, wena le fa e le morwao, le fa e le morwadio, le fa e le motlhanka wa gago, le fa e le lelata la gago, le fa e le pelesa ya gago, le fa e le esela ya gago, le fa e le diruiwa dipe tsa gago, le fa e le moeng wa gago yo o mo teng ga dikgoro tsa gago; gore motlhanka wa gago le lelata la gago le bone, ba ikhutse jaaka wena.

15Le gone o gakologelwe fa wena o ne o le motlhanka mo lefatsheng la Egepeto, mme Jehofa Modimo wa gago a go ntsha teng ka letsogo la nonofo, le ka letsogo le le otlologileng: ke gone ka moo Jehofa Modimo wa gago o go laotseng gore o ilele letsatsi la Sabata.

16“Tlotla rraago le mmaago, jaaka Jehofa Modimo wa gago a go laotse; gore malatsi a gago a nne maleele, le gore go ye sentle nao mo lefatsheng le Jehofa Modimo wa gago o le go nayang.

17“O se ka wa bolaya motho.

18“Le gone o se ka wa dira boaka.

19“Le gone o se ka wa utswa.

20“Le gone o se ka wa supa maaka ka ga mongwe ka wena.

21“Le gone o se ka wa eletsa mosadi wa mongwe ka wena; le gone o se ka wa eletsa ntlo ya mongwe ka wena; le fa e le motlhanka wa gagwe, le fa e le lelata la gagwe, le fa e le pelesa ya gagwe, le fa e le sepe se e leng sa mongwe ka wena.

22“Mafoko ao, Jehofa a a bua le phuthego yotlhe ya lona mo thabeng, a le mo gare ga molelo, le ga leru, le ga lefifi le le kwenneng, a a bua ka lentswe le le godileng; mme a se ka a a oketsa. Mme a a kwala mo matlapeng a le mabedi a a nneela.”

23“Ga dirala ya re lo utlwa lentswe le tswa mo gare ga lefifi, thaba e ntse e tuka molelo, lwa nkatamela, e bong ditlhogo tsotlhe tsa ditso tsa lona le bagolwane ba lona;

24lwa re: ‘Bona, Jehofa Modimo wa rona o re supeditse kgalalelo ya gagwe, le bogolo jwa gagwe, re utlwile lentswe la gagwe le tswa mo gare ga molelo; re bonye gompieno fa Modimo o bua le motho, mme a tshele.

25Jaana re tlaa bo re swelang? Gonne molelo o mogolo o, o tlaa re laila o re swetsa; gonne fa re fela re tswelela pele go utlwa lentswe la ga Jehofa Modimo wa rona gape, foo re tlaa swa.

26Gonne go na le mang wa nama yotlhe yo o kileng a utlwa lentswe la Modimo o o tshedileng le bua le tswa mo gare ga molelo, jaaka rona re le utlwile, mme a tshela?

27A go atamele wena o utlwe tsotlhe tse Jehofa Modimo o tlaa di buang; a go bue wena le rona, o bue tsotlhe tse Jehofa Modimo wa rona o tlaa di buang nao; re tlaa di utlwa re di dira.’

28“E rile lo bua le nna, Jehofa a utlwa lentswe la mafoko a lona, mme Jehofa a nthaya a re: ‘Ke utlwile lentswe la mafoko a tšhaba e, a ba a buileng nao; gotlhe mo ba go buileng ba buile sentle.

29A bo pelo e e ntseng jalo e ka bo ne ne e le mo go bone, gore ba mpoife, ba tshegetse ditaolo tsa me tsotlhe ka metlha yotlhe, gore go tle go nne sentle nabo, le bana ba bone ka bosakhutleng!

30Ya o ba reye o re: Boelang kwa megopeng ya lona.

31Ka ga gago, wena o eme fano fa go nna, mme ke tlaa bua nao taolo yotlhe, le ditao, le dikatlholo tse o tlaa di ba rutang, gore ba di dire mo lefatsheng le ke le ba nayang go le rua.’

32“Ke gone lo tlhokomeleng go dira jaaka Jehofa Modimo wa lona a lo laotse; lo se ka lwa fapogela ntlheng ya le legolo, kgotsa ntlheng ya la molema.

33Lo sepele fela mo tseleng yotlhe e Jehofa Modimo o e lo laoletseng, gore lo tshele, le gore go nne sentle le lona, le gore lo lelefatse malatsi a lona mo lefatsheng le lo tlaa le ruang.

← Chapter 4 Jump to: Chapter 6 →