Deuteronomy 12

Tswana (BAEBELE e e Boitshepo) 1992

← Chapter 11 Jump to: Chapter 13 →

1“Tse ke tsone ditao le dikatlholo, tse lo tlaa di tlhokomelang go di dira mo lefatsheng le Jehofa Modimo wa borraeno, o le go neileng go le rua, ka malatsi otlhe a lo tlaa tshelang ka one mo lefatsheng.

2Ruri, lo tlaa senya mafelo otlhe kwa merafe e lo tlaa e ruang e diretseng medimo ya yone gone, mo dithabeng tse di godileng, mo makhubung le fa tlase ga setlhare sengwe le sengwe se setala.

3Lo rutle dibeso tsa bone, lo thubaganye maje a bone a a metloutlo, lo fise medimako ya bone ka molelo; lo reme ditshwantsho tse di setilweng tsa medimo ya bone; lo senyetse ruri leina la tsone mo felong foo.

4“Lo se ka lwa direla Jehofa Modimo wa lona jalo.

5Felo fa Jehofa Modimo wa lona o tlaa go itshenkelang mo ditsong tsotlhe tsa lona, go baya leina la gagwe gone, e bong kwa bonnong jwa gagwe, ke gone kwa lo tlaa gopolelang gone, ke gone kwa o tlaa yang gone.

6Ke gone kwa lo tlaa isang ditshupelo tsa lona gone, le ditlhabelo tse di fisiwang tsa lona, le dilo tsa bosome tsa lona, le tshupelo ya tsholetso ya seatla sa lona, le maikano a lona, le ditshupelo tsa lona tsa peleego, le tsa maitibolo tsa matlhape a lona le tsa matsomane a lona.

7Ke gone kwa lo tlaa jelang gone fa pele ga Jehofa Modimo wa lona, mme lo tlaa itumela mo go tsotlhe tse lo di bayang seatla, lona le ba matlo a lona, tse Jehofa Modimo wa gago o go segofaditseng ka ga tsone.

8“Ga lo ketla lo dira ka fa mokgweng o re dirang dilo tsotlhe ka one fano gompieno, jaaka mongwe le mongwe a dira se se siameng fela mo matlhong a gagwe ka esi.

9Gonne lo sa ntse lo ise lo tle mo boikhutsong le mo bosweng jo Jehofa Modimo wa gago o bo go nayang.

10E tlaa re lo kgabaganya Joretane, lo aga mo lefatsheng le Jehofa o le lo ruisang, a lo naya boikhutso mo babeng botlhe ba lona mo tikologong, mme lo agile mo polokegong;

11foo go tlaa dirala gore, felo fa Jehofa Modimo wa lona o tlaa go itshenkelang go baya leina la gagwe gone, gotlhe mo ke go lo laolelang, lo go ise gone; ditshupelo tsa lona, le tse di fisiwang, le ditlhabelo tsa lona, le tsa bosome tsa lona, le tshupelo ya tsholetso ya seatla sa lona, le maikano a lona a a tlhophegileng, a lo ikanelang Jehofa ka one;

12lo itumele fa pele ga Jehofa Modimo wa lona, lona le bomorwaa lona, le bomorwadia lona, le batlhanka ba lona, le malata a lona, le Molefi yo o mo teng ga dikgoro tsa lona, ka a se na kabelo le fa e le boswa mo go lona.

13O itise gore o se ka wa isa ditshupelo tsa gago tse di fisiwang gongwe le gongwe fa o go bonang;

14fa e se mo felong fa Jehofa o tlaa go itshenkelang mo lotsong longwe lwa gago fela, ke gone kwa o tlaa isang gone ditshupelo tsa gago tse di fisiwang, ke gone kwa o tlaa dirang gotlhe mo ke go go laolelang gone.

15“Le fa go ntse jalo o ka tlhaba wa ja nama mo teng ga dikgoro tsotlhe tsa gago ka fa keletsong ya mowa wa gago, ka fa tshegofatsong ya ga Jehofa Modimo wa gago e o e go neileng; ba ba itshekologileng le ba ba itshekileng ba ka ja ga sone, jaaka ga tshephe le kwalata.

16Fa e se madi osi lo se ka lwa a ja one, o a tshololele fa fatshe jaaka metsi.

17Sa bosome sa mabele a gago o se ka wa se jela mo teng ga dikgoro tsa gago, kgotsa sa lookwane lwa gago, kgotsa tsa maitibolo a matlhape a gago, kgotsa a matsomane a gago, le fa e le maikano mangwe a o ikanneng ka one, le fa e le ditshupelo tsa gago tsa peleego, le fa e le tshupelo ya tsholetso ya seatla sa gago.

18Tsone o laa di jela fa pele ga Jehofa Modimo mo felong fa Jehofa Modimo wa gago o tlaa go itshenkelang, wena, le morwao, le morwadio, le motlhanka wa gago, le lelata la gago, le Molefi yo o mo teng ga dikgoro tsa gago; mme o tlaa itumela fa pele ga Jehofa Modimo wa gago mo go tsotlhe tse o di bayang seatla.

19O itise gore o se ka wa latlha Molefi ka lobaka lotlhe lwa go tshela ga gago mo lefatsheng la gago.

20“E tlaa re Jehofa Modimo wa gago a atlhamolosa molelwane wa gago, jaaka a go solofeditse, wena o ithaya o re: ‘Ke tlaa ja nama,’ ka mowa wa gago o eletsa go ja nama; le gale o ka ja nama ka fa keletsong yotlhe ya mowa wa gago.

21E tlaa re fa felo fa Jehofa Modimo wa gago o tlaa go itshenkelang go baya leina la gagwe gone go le kgakala bobe le wena, foo o ka tlhaba ga matlhape a gago, le ga matsomane a gago, a Jehofa o a go neileng, jaaka ke go laotse, mme o ka jela mo teng ga dikgoro tsa gago ka fa keletsong yotlhe ya mowa wa gago.

22Fela jaaka tshephe e jewa le kwalata, o ka ja ga yone jalo; ba ba itshekologileng le ba ba itshekileng ba ka ja ga yone go tshwana fela.

23Fela o itise gore o se ka wa ja madi, gonne madi ke botshelo; o se ka wa ja botshelo bo pataganye le nama.

24O se ka wa a ja; o a tshololele fa fatshe jaaka metsi.

25O se ka wa a ja; gore go tle go ye sentle nao, le bana ba gago morago ga gago, mogang o dirang se se molemo mo matlhong a ga Jehofa.

26Fa fela e se dilo tse di itshepileng tse o nang natso, le maikano a gago, o di tseye o ye kwa felong fa Jehofa o tlaa go itshenkelang.

27O ise ditshupelo tsa gago tse di fisiwang, nama le madi, mo sebesong sa ga Jehofa Modimo wa gago; madi a ditlhabelo tsa gago a tshololelwe mo sebesong sa ga Jehofa Modimo wa gago, mme nama o tlaa e ja.

28Tlhokomela o bo o utlwe mafoko otlhe a, a ke a go laolelang, gore go tle go ye sentle nao, le bana ba gago morago ga gago ka bosakhutleng, mogang o dirang se se molemo mo matlhong a ga Jehofa Modimo wa gago.

29“E tlaa re Jehofa Modimo wa gago a kgaola merafe fa pele ga gago, kwa o yang go e rua gone, mme wa e rua, o agile mo lefatsheng la yone;

30o itise gore o se ka wa raelwa wa e sala morago, e sena go senyediwa fa pele ga gago; le gore o se ka wa botsa ka ga medimo ya yone, wa re: ‘Ana merafe e e tle e direle medimo ya yone jang? Le nna ke dire fela jalo.’

31O se ka wa direla Jehofa Modimo wa gago jalo; gonne sengwe le sengwe se se makgapha mo go Jehofa, se o se ilang, ba bo ba se diretse medimo ya bone; gonne le ba e leng bana ba bone ba basimane le ba basetsana ba tle ba ba fisetse medimo ya bone mo molelong.

32“Le fa e le eng se ke se lo laolelang, lo tlhokomele sone go se dira; lo se ka lwa se oketsa le fa e le go se fokotsa.

← Chapter 11 Jump to: Chapter 13 →