Deuteronomy 30

Tswana (BAEBELE e e Boitshepo) 1992

← Chapter 29 Jump to: Chapter 31 →

1“Go tlaa dirala, go re e tlaa re fa dilo tse tsotlhe di tsile mo go wena, tshegofatso le phutso, tse ke di beileng fa pele ga gago, fa o di gakologelwa o le kwa gare ga merafe e Jehofa Modimo wa gago o go leleketseng kwa go yone,

2fa o boela mo go Jehofa Modimo wa gago o ineela go utlwa lentswe la gagwe jaaka tsotlhe tse ke di go laolelang gompieno, wena le bana ba gago, o ineela ka pelo yotlhe ya gago, le ka mowa otlhe wa gago;

3foo Jehofa Modimo wa gago o tlaa sokolola botshwaro jwa gago, o tlaa go tlhomogela pelo, o tlaa bowa a go phutha kwa ditšhabeng tsotlhe, kwa Jehofa Modimo wa gago o go gasameditseng gone.

4Le fa bafaladi bangwe ba gago ba le kwa dikhutlong tsa legodimo, Jehofa Modimo o tlaa go phutha gone, o tlaa ya go go tsaya gone.

5Jehofa Modimo wa gago o tlaa go lere mo lefatsheng le borraeno ba ne ba le ruile, o tlaa le rua, o tlaa go direla molemo, o tlaa go ntsifatsa bogolo go borraeno.

6Jehofa Modimo wa gago o tlaa go rupisa pelo, le pelo ya losika lwa gago, go tla a lo ratisa Jehofa Modimo wa gago ka pelo yotlhe ya gago, le ka mowa otlhe wa gago gore o tle o tshele.

7Jehofa Modimo wa gago o tla baya diphutso tsotlhe tse mo babeng ba gago ba ba go ilang, ba ba go bogisitseng.

8O tlaa bowa o ineela go utlwa lentswe la ga Jehofa, o ba o dira tsotlhe tse ke di go laolelang gompieno.

9Jehofa Modimo wa gago o tlaa go atla mo tirong yotlhe ya seatla sa gago, mo loumong lwa mmele wa gago, le mo loatong lwa dikgomo tsa gago, le mo loungong lwa lefatshe la gago, gore go nne molemo, gonne Jehofa o tlaa ba a go itumelela gore go nne molemo, jaaka a ne a itumelela borraeno; ke go re;

10fa o ineela go utlwa lentswe la ga Jehofa Modimo wa gago, go tshegetsa ditaolo tsa gagwe le ditao tsa gagwe, tse di kwadilweng mo lokwalong lo, lwa molao; fa o retologela mo go Jehofa Modimo wa gago ka pelo yotlhe ya gago, le ka mowa otlhe wa gago.

11“Gonne taolo e ke e go laolelang gompieno, ga e go thatafalele, le gone ga e kgakala.

12Ga e kwa legodimong fa o ka bong o re: ‘E mang yo o tlaa re tlhatlogelang kwa legodimong, a ya go e lere mo go rona, a e re utlwisa, gore re e dire?’

13Le gone ga e kwa moseja ga lewatle, fa o ka bong o re: ‘E mang yo o tlaa re tshelelang lewatle, a ya go e lere mo go rona, a e re utlwisa, gore re e dire?’

14Lefoko le gautshwane nao, mo molomong wa gago, le mo pelong ya gago, gore o le dire.

15Bona, ke beile fa pele ga gago gompieno botshelo le molemo, le loso le bosula;

16ka ke go laola gompieno, gore o rate Jehofa Modimo wa gago, o sepele mo ditseleng tsa gagwe, le go tshegetsa ditaolo tsa gagwe, le ditao tsa gagwe, le dikatlholo tsa gagwe, gore o tshele, o ntsifale, le gore Jehofa Modimo wa gago a go segofatse mo lefatsheng le o tsenang kwa go lone o ya go le rua.

17E tlaa re fa pelo ya gago e fapoga, o gana go utlwa, o gogelwa koo, o ya go obamela medimo e sele, le go e direla,

18ke a lo bolelela gompieno, ka re, ruri lo tlaa nyelela; ga lo ketla lo lelefatsa malatsi a lona mo lefatsheng, le o kgabaganyang Joretane o ya go tsena mo go lone go le rua.

19Ke lo biletsa legodimo le lefatshe gompieno go supa ka ga lona, fa ke beile botshelo le loso fa pele ga gago, tshegofatso le phutso; ke gone itshenkele botshelo, gore o tshele, wena le losika lwa gago;

20gore o rate Jehofa Modimo wa gago, go ineela go utlwa lentswe la gagwe, le go mo ngaparela; gonne ke ene botshelo jwa gago, le boleele jwa malatsi a gago; gore o tle o age mo lefatsheng le Jehofa o le ikanetseng borraeno, Aberahame, le Isake le Jakobe, fa a tlaa le ba naya.”

← Chapter 29 Jump to: Chapter 31 →