Ezekiel 12

Tswana (BAEBELE e e Boitshepo) 1992

← Chapter 11 Jump to: Chapter 13 →

1Lefoko la ga Jehofa la ba la tla mo go nna, la re:

2“Morwa motho, o agile mo gare ga ba lekgotla le le borukhutlhi, e le batho ba ba nang le matlho, mme ga ba bone, ba na le ditsebe, mme ga ba utlwe; gonne ke ba lekgotla le le borukhutlhi.

3“Ke gone wena morwa motho, o ipaakanyetse thoto ya khudugo, mme o e hudutshe go le motshegare mo ponong ya bone; o tloge mo bonnong jwa gago o hudugele gosele mo ponong ya bone; e tlaa re kgotsa ba gopole, le fa ba le ba lekgotla le le borukhutlhi.

4O ntshe thoto ya gago go le motshegare mo ponong ya bone, e le thoto ya khudugo; mme e re maitsebowa le wena o bo o bothologe mo ponong ya bone, jaaka fa batho ba ya phalading.

5O phunye lomota mo ponong ya bone, mme o rore ka teng.

6Thoto o e kabe mo leruding la gago mo ponong ya bone, o e ntshe go le lefifi; o ipipe sefatlhogo gore o se bone lefatshe; gonne ke go beile go nna sekao mo go ba kgotla ya Iseraele.”

7Ka dira jalo jaaka ke laotswe; ka ntsha thoto ya me go le motshegare, jaaka thoto ya khudugo, mme ya re maitsebowa ka phunya lomota ka seatla; ka e ntshetsa kwa ntle go le lefifi, ka e kaba mo leruding la me mo ponong ya bone.

8Ya re ka moso lefoko la ga Jehofa la tla mo go nna, la re:

9“Morwa motho, ba ntlo ya Iseraele, lekgotla le le borukhutlhi, a ga ba a go raya ba re: ‘O dirang?’

10O ba reye o re: ‘Morena Modimo o bua jaana, a re: Molaetsa o o raya kgosana e e mo Jerusalema le botlhe ba kgotla ya Iseraele, ba ba mo go yone.’

11O re: ‘Ke nna sekao sa lona;’ fela jaaka ke dirile, ba tlaa direlwa fela jalo; ba tlaa ya phalading, kwa botshwarong.

12Kgosana e e mo go bone e tlaa kaba mo leruding la yone go le lefifi, mme e tlaa tswa; ba tlaa phunya lomota go tla ba rora ka teng; e tlaa ipipa sefatlhogo sa yone, ka ga e ketla e bona lefatshe ka matlho.

13Le lotloa lwa me ke tlaa lo tsharololela mo go yone, mme e tlaa tshwarwa ka seru sa me; mme ke tlaa e fitlhisa kwa Babilone mo fatsheng la Bakalatea; le fa go ntse jalo ga e ketla e le bona, le fa e tlaa swela teng.

14Botlhe ba ba e dikanyeditseng go e thusa, le masomo otlhe a yone, ke tlaa ba gasamisetsa kwa diphefong tsotlhe; mme ke tlaa ba somolela tšhaka ke ba latelela.

15“Ba tlaa itse fa ke le Jehofa, mogang ke ba falaletsang mo merafeng, ke ba gasamisetsa mo mafatsheng.

16Ke tlaa sadisa bangwenyana ba bone mo tšhakeng, mo popamong le mo kgogoding; gore ba tle ba kakanye tsotlhe tse di makgapha tsa bone mo merafeng e ba tlaa fitlhang kwa go yone; mme ba tlaa itse fa ke le Jehofa.”

17Gape lefoko la ga Jehofa la tla mo go nna, la re:

18“Morwa motho, o je dijo tsa gago ka go tlakasela, o nwe metsi a gago ka go roroma, le ka go ingoka;

19o reye batho ba lefatshe, o re: ‘Morena Modimo o bua jaana ka ga banni ba Jerusalema, le lefatshe la Iseraele, a re: Ba tlaa ja dijo tsa bone ka go ingoka, ba tlaa nwa metsi a bone ka kgakgamalo, ka lefatshe la bone le tlaa swafalelediwa dilo tsotlhe tse di mo go lone, ka ntlha ya thubakano ya ba ba agileng mo go lone botlhe fela.

20Metse e e ntsweng e tlaa ropefadiwa, lefatshe le tlaa swafadiwa, mme lo tlaa itse fa ke le Jehofa.’ ”

21Lefoko la ga Jehofa la tla mo go nna, la re:

22“Morwa motho, seane seo se lo nang naso mo lefatsheng la Iseraele ke sang se se reng: ‘Metlha e ya boleeleng, mme ponatshegelo nngwe le nngwe e a fela’?

23Ke gone o ba bolelele, o re: ‘Morena Modimo o bua jaana, a re: Ke tlaa khutlisa seane seo, mme ga ba ketla ba tlhola ba se tlhaba mo Iseraele; o ba reye, o re: Malatsi a atametse, le tlhomamiso ya ponatshegelo nngwe le nngwe.

24“ ‘Gonne ga go ketla go tlhola go nna ponatshegelo epe ya boithamako, le fa e le boitsejwanape jo bo borethe mo teng ga kgotla ya Baiseraele.

25Gonne nna ke Jehofa; ke tlaa bua, mme lefoko le ke le buang le tlaa dirafadiwa; ga le ketla le tlhola le diiwa, gonne mo metlheng ya lona, lona ba lekgotla le le borukhutlhi ke tlaa bua lefoko, ke ba ke le dirafatsa, go bua Morena Modimo.’ ”

26Gape lefoko la ga Jehofa la tla mo go nna, la re:

27“Morwa motho, bona, ba ntlo ya Iseraele ba tle ba re: ‘Ponatshegelo e o e bonang ke ya malatsi a le mantsi a a sa ntseng a le kwa pele, o perofesa ka ga metlha e e sa ntseng e le kgakala.’

28Ke gone o ba bolelele, o re: Morena Modimo o bua jaana, a re: Ga go ketla go tlhola go diiwa mafoko ape a me, mme lefoko le ke le buang le tlaa dirafadiwa, go bua Morena Modimo.”

← Chapter 11 Jump to: Chapter 13 →